GĨCUNCĨ KĨA 5

Mũguũ Jũmũnene jwa Ĩkondoria—Nũũ Wathikĩrĩĩre Mũrungu? Nũũ Ũtamũthikĩrĩĩre?

Antũ babaingĩ ntukũne cĩa Nuhu bathithagia mantũ jamathũku. Kiambiriria 6:5

Araĩka bathũũku barĩ na mĩĩrĩ ya antũ, barĩ amwe na antũ aka

Adamu na Hawa nĩbagĩĩre na aana na antũ baraingĩa nthĩgũrũne. Nyumene araĩka bamwe nĩbagwatanĩĩre na Shaitani kũrema.

Nĩbaigarũrĩre barekĩra mĩĩrĩ ya antũ bareeja nthĩgũrũne baraijũkĩrĩa aka. Aka bau baracĩara aana babanene barĩa baarĩ athangani na baarĩ na inya mono.

Mũtana ũmũniini akĩringaga mwekũrũ agwete mwana; Anefili, atana ba araĩka bathũũku, bakĩthithagia mantũ jamathũũku

Nthĩgũrũ nĩyojũrĩrwe nĩ antũ barĩa bathithagia mantũ jamaĩ. Bibiria yugaga: “Uthuku bwa muntu ibwari buunene mono nthiguru, na kung’aniiria kunthe kwa mathuganio ja nkoro ciao kwari gukuthuku magita jonthe.”

Nuhu nathikĩrĩĩre Mũrungu na araaka sabina. Kiambiriria 6:13, 14, 18, 19, 22

Nuhu arĩ mũntũ ũmwega. Jehova erĩre Nuhu atĩ akathirĩa antũ babathũku na mũguũ jũmũnene jwa ĩkondoria.

Mũrungu nerĩre Nuhu aake gĩtarũ gĩkĩnene mono, gĩetagwa sabina, na akũrũkie antũ ba njewe na nyomoo cionthe.

Nuhu akĩejaga antũ mũkaana bwegie kwĩja kwa Mũguũ jwa ĩkondoria, ĩndĩ neka bakũmũthekera

Nuhu nerĩre antũ kwĩja kwa Mũguũ jwa ĩkondoria, ĩndĩ batamũthikĩrĩĩre. Bamwe nĩbathekeere Nuhu; bangĩ baramũmena.

Nuhu na antũ ba njewe bagĩkũrũkagia nyomoo ndene ya sabina

Rĩrĩa sabina yojũrĩre, Nuhu nakũrũkirie nyomoo ndene.