Nthũũmba cia Ũtungatĩri Ciĩthagĩrwa na Ngũgĩ Irĩkũ?

Bibiria nĩtaarĩrĩĩtie ikundi biĩrĩ bia antũ-arũme Akristũ barĩa bamenyagĩĩra ngũgĩ cia kĩũthũrano—“ategeeri na nthũũmba cia ũtungatĩri.” (Afilipi 1:1, NW) Nĩkwĩthagĩrwa na akũrũ na nthũũmba cia ũtungatĩri barĩa batumĩkaga kĩrĩ o kĩũthũrano. Nĩ ngũgĩ irĩkũ nthũũmba cia ũtungatĩri iritaga cia gũtũguna?

Nĩbateethagĩĩria kĩama gĩa akũrũ. Nthũũmba cia ũtungatĩri nĩ ataana ba baaba bethagĩrwa na ngwatanĩro ya akuĩ na Jehova, bakwĩrĩgĩrĩka, ariti ngũgĩ na wĩru, na bamwe nĩ baakũrũ na bangĩ nĩ babaanake. Nĩbaritaga ngũgĩ cia bata irĩa ibuĩrĩte kũritwa kĩũthũranone. Ũntũ bũu nĩbwejaga akũrũ kaanya ga kũthũgaanĩria ngũgĩ ya ũritani na ũrĩĩthi bwa kĩũthũrano.

Nĩbatumĩkaga na njĩra irĩna ũguni.  Bamwe ba nthũũmba cia ũtungatĩri no baewe ngũgĩ ya kũgwata ũgenĩ barĩa bakwĩja mĩcemanione. Bangĩ no baewe ngũgĩ ya kũmenyeera macini cia kaajũ, kwejana mauku, gũtara ĩthabu rĩa kĩũthũrano, na kũgaĩra atũmĩĩria ba kĩũthũrano icigo bia gũtũmĩĩria. Kinya nĩbateethagĩĩria kũmenyeera Nyomba ya Ũnene. Akũrũ kĩũthũranone boomba kũbaromba bateetherie antũ barĩa akũrũ. Nthũũmba cia ũtungatĩri nĩciendaga kũrita o ngũgĩ yonthe ĩrĩa baejawa, na kĩũthũrano nĩkĩbatĩĩaga nĩũntũ bwa ngũgĩ yao ĩnjũmũ na mwerekera jwao jwa gũciendera.—1 Timotheo 3:13.

Nĩ bekĩĩte ngerekano ĩnjega ta antũ-arũme Akristũ. Nthũũmba cia ũtungatĩri ithuuragwa nĩũntũ bwa nkuma ciao injega cia Gĩkristũ. Rĩrĩa baingia twaanya twaao twa kũritana mĩcemanione, nĩbeekagĩra wĩtĩkio bwetũ inya. Gũkũrũkĩĩra gwĩka ngerekano ĩnjega ngũgĩĩne ya gũtũmĩĩria, nĩbatũteethagia kwĩthĩrwa na wĩru nkũrũki. Nĩũntũ nĩbagwatanagĩra bwega na kĩama gĩa akũrũ, nĩ batũmaga kwĩthĩrwa na kũgwĩrua na ũrũmwe. (Aefeso 4:16) Nyuma ya ĩgiita, kinya bo no baagĩre gũtumĩka ta akũrũ.

• Nthũũmba cia ũtungatĩri nĩ antũ bakarakari atĩa?

• Nĩatĩa nthũũmba cia ũtungatĩri iteethagia kĩũthũrano gwĩta bwega?