KĨTHOOMO KĨA 51
Nĩatĩa Ũũmba Kũgwĩria Jehova Gũkũrũkĩĩra Rwaria Rwaku?
Rĩrĩa Jehova aatũũmbĩre, natwere kĩewa gĩa kũrigarania—ũũmbi bwa kwaria. Rĩ, namakagĩra ũrĩa tũtumagĩra kĩewa kĩu? Kamma namakagĩra ũntũ bũu! (Thooma Jakubu 1:26.) Kwou-rĩ, nĩatĩa tũũmba gũtumĩra ũũmbi bwetũ bwa kwaria na njĩra ĩrĩa ĩkagwĩria Jehova?
1. Nĩatĩa tũbuĩrĩte gũtumĩra kĩewa gĩetũ gĩa kwaria?
Bibiria ĩtwĩraga “ikanagireni wiru o muntu na ungi, bukiumanagiriiria o muntu na ungi.” (1 Athesalonike 5:11) Rĩ, kũrĩ na antũ ũkũthũgaanĩria bomba kwĩthĩrwa bakĩbataraga gwĩkĩrwa inya? Nĩatĩa ũũmba kũbathithĩria nĩkenda baigua bwega? Barikithĩrie atĩ nũboonaga barĩ ba gĩtũmi. Mbuga womba kũbeera ũntũ bũrĩa bũtũmaga ũboona barĩ ba gĩtũmi. Rĩ, kũrĩ ĩandĩko ũkũriikana rĩũmba gwĩkĩra muntũ mũnna inya ũrĩa ũkũmenya aunĩki nkoro? Kũrĩ na Maandĩko jamaingĩ jarĩa ũũmba kũthuura gũtumĩra. Kinya riikana atĩ, ũrĩa ũkauga mantũ kwomba gwĩkĩra antũ bangĩ inya mono. Kwou rĩonthe ciũmie kwaria na njĩra ya kĩao na ya ũboreri.—Njuno 15:1.
2. Nĩ rwaria rwa mũthemba jũrĩkũ tũbuĩrĩte gũciebania naru?
Bibiria yugaga: “Ruteto ruruthuuku rutikeeje kuriuma miromone yenu.” (Thooma Aefeso 4:29.) Kũu nĩkuuga tũtĩtumagĩra biugo biithũũku kana kwaria mantũ jatĩ ja kĩao na jarĩa jomba kũthũũria antũ bangĩ. Kinya nĩ tũbuĩrĩte gũciebania na nguutũ inthũũku na gũcambia bangĩ.—Thooma Njuno 16:28.
3. Nĩmbi bigatũtethia kwaria na njĩra ya gwaka bangĩ?
Kaingĩ mantũ jarĩa twaragia nĩjonanagia kamma nĩmbi bĩrĩ nkorone yeetũ na mathũgaanione jeetũ. (Luka 6:45) Kwou nĩtũkũbatara kwiritana gũtegagĩĩra mantũ jarĩa meega—mantũ jarĩa jarĩ ja wagĩru, jameega, jagwĩtĩkĩrĩka, na ja gũkumagua. (Afilipi 4:8) Kenda tũthingatĩĩra mantũ jau, no mwanka tũthuure na njĩra ya ũũme, mantũ ja kwigwĩria ona kinya acoore beetũ. (Njuno 13:20) Bũu kinya bũgatũtethia kũjũkia kaanya kũthũgaania mbere ya twaria. Thũgaanĩria maumĩĩra jarĩa biugo biaku bikethĩrwa najo kĩrĩ bangĩ. Bibiria yugaga: “Rwaria rwa mpwi-mpwi rukari ta mamuntirwa ja ruciu, indi ruume rwa muntu umuume ni thiiria injega.”—Njuno 12:18.
ĨNJA NKŨRŨKI
Iritane ũrĩa ũũmba kwaria na njĩra ĩrĩa ĩkagwĩria Jehova na ĩrĩa ĩgeekĩra bangĩ inya.
4. Menyeera rwaria rwaku
Magiita jamwe, twinthe nĩ tuugaga mantũ jarĩa jomba gũtũma twirira nyumene. (Jakubu 3:2) Thooma Agalatia 5:22, 23, rĩu bwarĩĩrie biũria bibi:
Kĩrĩ nkuma iu, nĩ ĩrĩkũ ũkũbatara kũromba Jehova agũtethia nayo, nĩkenda wimenyeera rĩrĩa ũkwaria? Nĩatĩa nkuma iu ciũmba gũgũtethia?
Thooma 1 Akorintho 15:33, rĩu bwarĩĩrie kĩũria gĩkĩ:
Nĩ maumĩĩra jarĩkũ mantũ jarĩa ũthuuraga ja kwigwĩria, na acoore baaku boomba kwĩthĩrwa najo kĩrĩ rwaria rwaku?
Nĩmbi biũmba gũtongeeria rwaria rwaku?
Thooma Mutumiiria 3:1, 7, rĩu bwarĩĩrie kĩũria gĩkĩ:
Nĩ ĩgiita rĩrĩkũ rĩũmba kwĩthĩrwa rĩrĩ rĩrĩega gũkira, kana gweteera mwanka kagiita karĩa gakwagĩra nĩkenda uuga ũntũ?
5. Aria mantũ jameega jegie bangĩ
Nĩatĩa tũũmba gũciebania na biugo birĩa biũmba kwigithia bangĩ bũbũĩ kana kũbaarĩria na njĩra ĩtĩ ya kĩao? Tega VIDIO, rĩu bwarĩĩrie biũria bibi bithingatĩte.
Kĩrĩ vidio, nĩkĩ mũtaana-wa-baaba ũjũ eendaga kũgarũra ũrĩa aaragia bwegie antũ bangĩ?
Nĩatĩa aathithĩrie nĩkenda agarũka?
Thooma Mutumiiria 7:16, rĩu bwarĩĩrie kĩũria gĩkĩ:
Nĩmbi tũbuĩrĩte kũriikana rĩrĩa twethĩrwa mũtegone jwa kwaria bũbũĩ bwegie antũ bangĩ?
Thooma Mutumiiria 7:21, 22, rĩu bwarĩĩrie kĩũria gĩkĩ:
Nĩatĩa mĩstaarĩ ĩu yũũmba gũgũtethia ũtĩkathũũre nkũrũki rĩrĩa muntũ aaria mantũ jamathũũku jakwegie?
6. Ĩthĩrwa na kĩao rĩrĩa ũkwaria na antũ ba nja
Jehova arĩenda twaranĩrie na antũ ba nja na njĩra ya kĩao na ya wendo. Tega VIDIO, rĩu bwarĩĩrie kĩũria gĩkĩ kĩthingatĩte.
Nĩmbi bigagũtethia kwaria na njĩra ya kĩao na antũ ba nja yeenu?
Thooma Aefeso 4:31, 32, rĩu bwarĩĩrie kĩũria gĩkĩ:
Nĩ rwaria rwa mũthemba jũrĩkũ rwakaga nja?
Jehova noonanĩrie ũrĩa aigagua bwegie Mũtaanowe, Jesũ. Thooma Mathayo 17:5, rĩu bwarĩĩrie kĩũria gĩkĩ:
Nĩatĩa ũũmba kwigerekania na Jehova rĩrĩa ũkwarananĩria na antũ ba nja yaaku?
Cwaa twanya twa gwĩkĩra bangĩ inya
ANTŨ BAMWE BAUGAGA: “Mbaragia jarĩa jarĩ nkorone yakwa. Ntĩmakagua nĩ ũrĩa antũ baugaga bwegie ũrĩa mbaragia.”
Nũgwĩtĩkanĩĩria na ũntũ bũu? Nĩkĩ, kana nĩkĩ ũtĩgwĩtĩkĩĩria?
NA NJĨRA ĨNKUĨ
Jarĩa twaragia no jaigithie antũ bũbũĩ kana jakabatethia. Nĩtũkũbatara kũthũgaanĩria bwega jarĩa tũkuuga, rĩrĩa tũkũjauga, na ũrĩa tũkũjauga.
Gũcookera
Nĩ na njĩra irĩkũ imwe ũũmba gũtumĩra rwaria rwaku gũtethia bangĩ?
Nĩ rwaria rwa mũthemba jũrĩkũ ũkwenda gũciebania naru?
Nĩmbi biũmba gũtũtethia rĩonthe kwaria na njĩra ya kĩao na ya gwaka bangĩ?
CŨNKŨŨNA
Nĩmbi biũmba gũtũtethia kwaria na njĩra ya gwĩkĩra bangĩ inya?
Iritane nĩmbi biũmba gũgũtethia gũciebania na rwaria rũũthũũku.
“Rĩ, Kũrumana Kamma Nĩ Ũntũ Bũũthũũku Mono?” (Thooma intanetine)
Ona ũrĩa ũũmba gũciebania ũtĩgatonye kĩrĩ nguutũ inthũũku.
Cũnkũũna ũrĩa Jehova aatetherie muntũ mũrũme ũmwe ũrĩa warũjaga nĩkenda atiga rwaria rũthũũku.