Nĩ Mũtaratara Jũrĩkũ Akũũjĩ ba Jehova Bethagĩrwa Naju jwa Kũritana Antũ Bibiria?
Akũũjĩ ba Jehova nĩbaciũmagia gũtetheeria antũ kũmenya jarĩa Bibiria ĩritanaga. Mũtaratara jwetũ jwa kũritana antũ Bibiria jũgagũtethia:
Kwĩthĩrwa na kũgwĩrua
Kwaa mũcoore wa Mũrungu
Kwiritana mawĩrane ja Mũrungu ja ĩgiita rĩĩjĩte
Tũgacũnkũũna macookio ja biũria bibi
Rĩ, no ngwate ũgeni antũ bangĩ rĩrĩa nkwiritana Bibiria, tũkairitana tũrĩ amwe?
Rĩ, kethĩra nĩndairitanaga Bibiria na Akũũjĩ ba Jehova au mberene, no mpambĩrie kwiritana kaĩrĩ?
Nĩatĩa wiritani bwa Bibiria bũthithagua?
Mwarimũ waaku agagũtethia gũciũkĩrwa nĩ Bibiria agĩtumagĩra ithoomo mwanya mwanya. Ũkiiritanaga Bibiria na njĩra ya kwaranĩria na bũgĩtumagĩra iuku, Gwĩrĩrua Ũtũũro Kenya na Kenya, ũgeeta na mbere kũmenya mantũ jarĩa jarĩ Bibiriene na ũrĩa jomba gũgũtethia ũtũũrone bwaku. Nĩkenda wiritana jamaingĩ nkũrũki, no ũtege vidio ĩjĩ.
Rĩ, nĩnkũbatara kũrĩa nĩkenda nditanwa Bibiria?
Arĩ. Akũũjĩ ba Jehova nĩbathingataga mwerekera jũrĩa Jesũ aaere aritwa baawe: “bwei o uu na magi nikenda nabwi bucoke bwejanage o uu na magi.” (Mathayo 10:8) Kinya ũkaewa Bibiria na iuku Gwĩrĩrua Ũtũũro Kenya na Kenya.
Nkajũkia ĩgiita rĩngʼana kwiritana?
Iuku rĩrĩ rĩna ithoomo 60. Ũgwe wengwa ũkathũũra ũrĩenda kũthooma ithoomo bingʼana o kiumia. Aritwa babaingĩ nĩbathuuraga kũthooma kĩthoomo kĩmwe kana nkũrũki o kiumia.
Nĩatĩa mpũũmba kwambĩrĩria?
1. Ũjũrĩĩria fomu kĩrĩ webusaĩti yeetũ ya JW.ORG. Mantũ jaaku jarĩa ũkaejana jagatumĩrwa akĩ kwaranĩria nagwe nĩkenda bũbangania ũrĩa bũkambĩrĩria kũthooma na ũmwe wa Akũũjĩ ba Jehova.
2. Mwarimũ waaku agakũringĩra. Mwarimũ waaku agakwĩra mantũ jarĩa jathithagua kĩrĩ wiritani bwa Bibiria na agacookia biũrĩa birĩa bionthe ũũmba kwĩthĩrwa nabio.
3. Thithieni mĩbango bũrĩna mwarimũ waaku. No bwiritane gũkũrũkĩĩra thimu kana gũcemania antũ anna nĩkenda bwiritana. No bwiritane ĩthaa rĩmwe, kana ndagĩka irĩa ĩgũkwagĩra nkũrũki.
Rĩ, no ngerie na kĩthoomo kĩmwe mbone ũrĩa gwĩtaga?
Ĩĩ. Nĩkenda ũthithia ũjũ, ũjũrĩria fomu kĩrĩ webusaĩti yeetũ ya JW.ORG. Rĩrĩa mwarimũ waaku akaranĩria nagwe, mũmenyithie no wende kwiritana ithoomo bikai nĩkenda wona kethĩra ũgeeta na mbere kwiritana. Agatumĩra gauku Gwĩrĩrua Ũtũũro Kenya na Kenya, karĩa karĩna ithoomo bithatũ bia mwambĩrĩrio jwa kwiritana Bibiria, nĩkenda wona kethĩra ũkagwĩrĩrua kwiritana.
Rĩ, ndetĩkĩĩria kwiritana, no mwanka mpe Mũkũũjĩ wa Jehova?
Arĩ. Akũũjĩ ba Jehova nĩbendete kũritana antũ Bibiria, ĩndĩ gũtĩwe tũkinyaĩria aa Mũkũũjĩ wa Jehova. Na njĩra ya gĩtĩĩo, nĩtwonanagia ũrĩa Bibiria yugaga, na o muntũ nĩwe ũthuuraga jarĩa agetĩkia.—1 Petero 3:15.
Rĩ, no ntumĩre Bibiria yaakwa kwiritana?
Ĩĩ, no ũtumĩre Bibiria yaaku ĩrĩa ĩrĩna mũgambo jũrĩa ũkwenda, rĩrĩa ũkwiritana. Kinya kethĩra nĩtũgwĩragĩrua gũtumĩra Biblia Takatifu—Tafsiri ya Ulimwengu Mpya ĩrĩa ĩtaũri bwega na ĩtĩatĩtie, antũ babaingĩ nĩbendete gũtumĩra Bibiria ciao irĩa bamenyeretie.
Rĩ, no ngwate ũgeni antũ bangĩ rĩrĩa nkwiritana Bibiria, tũkairitana tũrĩ amwe?
Ĩĩ. Wenda no ũgwate ũgeni antũ ba nja yaaku kana acoore.
Rĩ, kethĩra nĩndairitanaga Bibiria na Akũũjĩ ba Jehova au mberene, no mpambĩrie kwiritana kaĩrĩ?
Ĩĩ. Ũkagwĩrĩrua mono kwiritana Bibiria kaĩrĩ tontũ mũtaratara jũjũ, nĩjwagĩrithĩtue nkũrũki nĩkenda jwagĩra mobatu ja antũ. Nĩkwĩthagĩrwa na vidio na kinya kwaranĩria na mũritwa nkũrũki, mwanya na ũrĩa kwathithagua au mberene.
Rĩ, kũrĩna njĩra ĩngĩ ya kwiritana Bibiria ntĩna mwarimũ?
Ĩĩ. Kinya kethĩra aritwa babaingĩ nĩbairitanaga bwega bagĩtethagĩrua nĩ mwarimũ wa Bibiria, bangĩ nĩbendaga kwiritana barĩ bonka mbere. Kĩrĩ webusaĩti yeetũ kũrĩna gacuncĩ ga Into bia Gũtũtethia Kwiritana Bibiria, karĩa karĩna into bibiingĩ bĩrĩa biũmba gũgũtethia kwiritana Bibiria. Bimwe nĩ bibi:
Vidio cia Bibiria. Vidio iji inkuĩ nĩ iritanaga ithoomo bia gĩtũmi kuuma Bibiriene.
Macookio ja Biũrĩa bia Bibiria. Ithoomo bibi nĩbicookagia biũria bibiingĩ bia Bibiria.
Mĩstaarĩ ya Bibiria Ĩtaarĩĩrĩtue. Gacuncĩ gaka gataarĩĩragia mĩstaarĩ na biugo bia Bibiria ĩrĩa ijĩkene mono.