Ũrĩa Ũũmba Kũgunĩka Nkũrũki Kuumania na Bibiria

Kũrĩ rĩo wenda kwambia mũradi jũmũnene ĩndĩ ũraigua ũkĩremeerwa mono? Nĩkenda jũũtha, wajũgaanĩrie tũcuncĩ tũniini, na ũraritĩra ngũgĩ o kamwe kamwe. Ũũ nou gũkarĩkaga kĩrĩ kũthooma Bibiria. No ũciũrie, ‘Mpambĩĩrie kũ?’ Kĩthoomone gĩkĩ, tũkaarĩĩria mantũ jamwe jamoothũ jarĩa ũũmba kũthithia nĩkenda jagũtethia kũgwĩrĩrua kũthooma na kwiritana Bibiria.

1. Nĩkĩ Tũbuĩrĩte kũthooma Bibiria na Wĩthĩre?

Muntũ ũrĩa ũthoomaga Bibiria na wĩthĩre, kana “rwatho rwa Mwathani,” akethĩrwa na kũgwĩrua na akoombana. (Thooma Zaburi 1:1-3.) Nĩkenda wambia, geria kũthooma ndagĩka inkai o ntukũ o ntukũ. O ũrĩa ũgeeta na mbere kũmenyanĩria na Rũteto rwa Mũrungu, nou ũkagwĩrĩrua kũthooma Bibiria.

2. Nĩmbi bigagũtethia ũgunĩka kuumania na kũthooma Bibiria?

Nĩkenda tũgunĩka nkũrũki kuumania na ũthoomi bwa Bibiria, nĩtũkũbatara gũkira na kũthũgaanĩria jarĩa tũkũthooma. Nĩtũbuĩrĩte kũmĩthooma na ‘kuthuganagia mantu jayo.’ (Joshua 1:8) O ũrĩa ũkũthooma, ciũrie biũria ta bibi: ‘Nĩatĩa ũntũ bũbũ bũkũnditana bwegie Jehova Mũrungu? Nĩatĩa mpũmba kũbũtumĩra mũtũrĩrene jwakwa? Nĩatĩa mpũmba gũtumĩra mĩstarĩ ĩjĩ gũtethia bangĩ?’

3. Nĩrĩ ũũmba gũcwaa kaanya ga kũthooma Bibiria?

Rĩ, nwĩthagĩrwa na ĩgiita rĩrĩũmo gũcwaa kaanya ga kũthooma Bibiria? Babaingĩ beetũ nĩ tũgwatagwa nĩ ũntũ bũu. Ciũmie gũtumĩra bwega ‘igiita riaku riria riagirite.’ (Aefeso 5:16) No ũthithie ũu na njĩra ya kũthuura kaanya kanna ga kũthooma Bibiria o ntukũ o ntukũ. Antũ bamwe, nĩbathuurĩte kũthoomaga Bibiria o rũkĩĩrĩ kaiinda. Bangĩ nĩbacwaga kaanya ndene ya ntukũ, mbuga ĩgiita rĩa biakũrĩa bia mũthenya. Amwe na bũu, bangĩ nĩbathoomaga Bibiria ũgoro mbere bamaama. Nĩ ĩgiita rĩrĩkũ rĩũmba gũkwagĩra nkũrũki?

ĨNJA NKŨRŨKI

4. Iritane kũgwĩrĩrua kũthooma Bibiria

No bwĩthĩrwe bũtĩ bũbũũthũ kwambia kũthooma Bibiria. Amwe na bũu, no tũkũrie ‘wiririria’ bwa kũthithia ũu, o ta ũrĩa muntũ oomba gũkũria wendi bwa biakũrĩa atĩmenyeretie. Thooma 1 Petero 2:2, rĩu bwarĩĩrie kĩũria gĩkĩ:

• Ũrĩthũgaania ũkeeja kũthooma Bibiria ntukũ cionthe, ũkamĩgwĩrĩrua na wende kũmĩthooma nkũrũki?

Tega VIDIO nĩkenda wona ũrĩa antũ bamwe baambĩrĩĩrie kũgwĩrĩrua kũthooma Bibiria. Rĩu bwarĩĩrie biũria birĩa bithingatĩte.

VIDIO: Antũ Babeethĩ Bakiiritanaga Kwenda Rũteto Rwa Mũrungu (5:33)

• Kĩrĩ vidio, nĩ mantũ jarĩkũ jamoomũ antũ babeethĩ baaciindĩre?

• Nĩmbi biabatetherie batĩgatige mworoto jwao jwa kũthooma Bibiria?

• Nĩmbi baathithagia nĩkenda bagwĩrĩrua nkũrũki kũthooma Bibiria?

Meendekithia ja gũgũtethia kwambĩrĩria:

• Thuura Bibiria ya mũgambo jwa kĩ-nandĩ, na ya kwĩrĩgĩrĩka. Geria gũtumĩra Tafsiri ya Ulimwengu Mpya kethĩra nĩkwonekana na mũgambo jwaku, kana mũgambo jũngĩ jũrĩa jũgũkwagĩra.

• Mbere, thooma icuncĩ birĩa wendeete nkũrũki. Kwona meendekithia, tega chati “Ambia kũthooma Bibiria.”

• Andĩka jarĩa ũrĩĩkĩtie kwiritana. Tumĩra chati ĩjĩ “Thingatĩĩra Ũthoomi Bwaku bwa Bibiria” ĩrĩa ĩrĩ iukune rĩrĩ.

• Tumĩra app ya JW Library^®. App ĩjĩ, no ĩgũtethie kũthooma na kũthikĩĩra ũthoomi bwa Bibiria ũgĩtumagĩra thimũ ya kũringithia na kĩara (smartphone) kana gĩntũ kĩngĩ ta kĩu.

• Tumĩra Mantũ jarĩa jongeeri kĩrĩ Tafsiri ya Ulimwengu Mpya. Najo nĩ mapu, chati, na ũtaarĩĩrio bwa biugo, into birĩa biũmba gũtũma ũgwĩrĩrua nkũrũki ũthoomi bwaku.

5. Thuranĩra wiritani bwaku bwa Bibiria

Thooma Zaburi 119:34, rĩu bwarĩĩrie kĩũria gĩkĩ:

• Nĩkĩ bũrĩ ũntũ bwa gĩtũmi kũromba mbere ya kũthooma Bibiria, kana mbere ya kwithuranĩra kwiritana Bibiria?

Nĩatĩa ũũmba kũgunĩka nkũrũki o ĩgiita rĩonthe rĩrĩa ũkwiritana? Rĩrĩa ũkũthuranĩra o kĩthoomo kĩrĩ iuku rĩrĩ, geria kũthingatĩĩra njĩra ĩjĩ:

1. Thooma icuncĩ bia kwambĩrĩria bia kĩthoomo.

2. Cwaa maandĩko, ũjathoome na ũgerie gũciũkĩrwa nĩ ũrĩa jakũgwatanĩra na jarĩa ũkũthooma.

3. Ringĩra biugo mũstaarĩ kana mantũ jarĩa jagũciumĩria jarĩa jagũcookia o kĩũria; bũu bũgagũtethia kwarĩĩria kĩthoomo amwe na mũritani waaku.

Ũramenya?

Akũũjĩ ba Jehova nĩbatumĩrĩte mĩthemba mwanya mwanya ya Bibiria. Amwe na bũu nĩ tũgwĩragĩrua mono mono gũtumĩra Biblia Takatifu Tafsiri ya Ulimwengu Mpya tontũ ĩtĩatĩtie, nĩ ĩmbũthũ gũciũkĩrwa nĩyo, na nĩtumagĩra riĩtwa rĩa Mũrungu.—Tega mantũ ja kũthooma intanetine “Rĩ, Akũũjĩ ba Jehova ka bethagĩrwa na Bibiria yaao bongwa?”

NA NJĨRA ĨNKUĨ

Nĩkenda ũgunĩka nkũrũki kuumania na Bibiria, cwaa kaanya ga kũmĩthooma, romba nĩkenda ũciũkĩrwa nĩ jarĩa ũkũthooma, na withuranĩre tontũ bwa ĩgiita rĩaku rĩa kũthooma Bibiria.

Gũcookera

• Nĩmbi bigagũtethia kũgunĩka nkũrũki kuumania na Bibiria?

• Nĩrĩ ũũmba kũjũkia kaanya ga kũthooma na kwiritana Bibiria?

• Nĩkĩ nĩ bwega kwithuranĩra tontu bwa ĩgiita rĩakũ rĩa kwiritana Bibiria?

CŨNKŨŨNA

Cookera jamwe ja mantũ jarĩa joomba gũgũtethia kũgunĩka nkũrũki kuumania na ũthoomi bwaku bwa Bibiria.

“Ũrĩa Ũũmba Kũgunĩka Nkũrũki Kuumania na Ũthoomi bwa Bibiria” (Mnara wa Mlinzi Na. 1 2017)

Iritane njĩra ithatũ cia kũthooma Bibiria.

“Nĩatĩa Bibiria Yũũmba Gũntethia?—Gĩcuncĩ kĩa 1: Gũcũnkũũna Bibiria Yaaku” (Thooma intanetine)

Ona ũrĩa ũũmba kũgwĩrĩrua kũthooma Bibiria.

“Nĩatĩa Bibiria Yũũmba Gũntethia?—Gĩcuncĩ kĩa 2: Gwĩrĩrua Kũthooma Bibiria” (Thooma intanetine)

Ona mantũ jagũgũtethia kwiritana kuuma kĩrĩ antũ barĩa bathoomete Bibiria mĩaka ĩmiingĩ.

Wiritani Bibiria Bwaku Kĩũmbe Bũrĩa Bũrĩna Maumĩĩra (1:58)