Nĩ Baaũ Betaga Ĩgũrũ?
Ũrĩa Bibiria yugaga
Mũrungu nathuuraga Akristũ baakai etĩkĩkua barĩa nyuma ya gũkua, bakariũkua beete ĩgũrũ. (1 Petero 1:3, 4) Nyuma ya kũthuurwa, no mwanka beete na mbere kũgwatĩĩra wĩtĩkio bwao bwa Gĩkristũ, na kwĩthĩrwa na mĩĩtĩre ĩmĩega nĩkenda baa eene rũgai rwa ĩgũrũ.—Aefeso 5:5; Afilipi 3:12-14.
Nĩmbi barĩa bageeta ĩgũrũ bakathithia ku?
Bagatumĩkĩra amwe na Jesũ barĩ anene na athĩnjĩri mĩaka 1,000. (Kugwurirwa 5:9, 10; 20:6) Nĩbo bakathithia “Iguru ririeru,” kana thirikarĩ ya ĩgũrũ, ĩrĩa ĩkaatha “nthiguru injeru,” kana antũ barĩa bagatũũra nthĩgũrũne. Aathani bau bagatetheria gũcookia antũ kĩrĩ mĩĩtĩre ya wagĩru ĩrĩa Mũrungu aabangĩte kuuma kĩambĩrĩria.—Isaya 65:17; 2 Petero 3:13.
Ibangʼana bakariũkua beete ĩgũrũ?
Bibiria yonanagia atĩ antũ 144,000 bakariũkua beete ĩgũrũ bagatũũre nao. (Kugwurirwa 7:4) Kĩrĩ Kugwurirwa 14:1-3, mũtũmwa Johana noonere “Gaturume arungi iguru ria kirima gia Zayuni, ari na antu ngiri igana rimwe-na-mirongo-ina-na inya.” Aja, riĩtwa “gaturume” rĩrĩrũngamĩĩra Jesũ ũrĩa wariũkĩrue. (Johana 1:29; 1 Petero 1:19) “Kirima gia Zayuni,” kĩrĩrũngamĩĩra kaanya ka ĩgũrũ ka Jesũ na barĩa 144,000, barĩa bakaathana amwe nawe barĩ ĩgũrũ.—Zaburi 2:6; Ahibirania 12:22.
’Barĩa beetĩtweʼ kwathana na Kristũ kĩrĩ Unene bwa Mũrungu, betagwa “kooriithi kaniini.” (Kugwurirwa 17:14; Luka 12:32) Bũbũ bũrĩonania atĩ bakethĩrwa barĩ baakai bakĩringithanua na ngʼondu cionthe cia Jesũ.—Johana 10:16.
Mantũ jatĩ ja mma jegie barĩa betaga gũtũũra ĩgũrũ
Ũrongo: Antũ bonthe babeega betaga ĩgũrũ rĩrĩa bakua.
Ũmma: Mũrungu naugĩte akaa antũ babeega ũtũuro bwa kenya na kenya nthĩgũrũne.—Zaburi 37:11, 29, 34.
Jesũ aaugĩre: “guti muntu waitia iguru.” (Johana 3:13) Kwou, oonanĩrie atĩ antũ babeega barĩa baakuĩre mbere yaawe kwĩja nthĩgũrune ta Iburahimu, Musa, Ayubu na Daudi bateetĩre ĩgũrũ barĩgũkua. (Mathithio 2:29, 34) Ĩndĩ, nĩbaarĩ na wĩrĩgĩĩro bwa kũriũkua batũũre nthĩgũrũne.—Ayubu 14:13-15.
Kũriũkua kwa barĩa betaga ĩgũrũ gwĩtagwa ’ĩriuka rĩa mbere.ʼ (Kugwurirwa 20:6) Bũu bũrĩonania gũkethĩrwa na kũriũka kũngĩ kwa barĩa bagatũũra nthĩgũrũne.
Bibiria nĩyonanagia rĩrĩa Ũnene bwa Mũrungu bũkaathana, “gikuu gutirio gigacoka gukara o kairi.” (Kugwurirwa 21:3, 4) Gũtĩ nkaanja wĩrane bũbũ nĩ bwa antũ barĩa bagatũũra aja nthĩgũrũne, tontũ gũtethĩrwa na gĩkũũ ĩgũrũ.
Ũrongo: O mũntũ kaithuragĩra kethĩrwa agatũũra nthĩgũrũne kana ĩgũrũ.
Ũmma: Mũrungu nĩwe ũthuuraga nĩ Akristũ barĩkũ etĩkĩkua bakaewa “kiewa kia mwito jwa Iguru,” kana wĩrĩgĩro bwa gũtũũra ĩgũrũ. (Afilipi 3:14) Kũthuurwa kwa muntũ gũtiumanagia na wendi bwa muntũ.—Mathayo 20:20-23.
Ũrongo: Wĩrĩgĩro bwa gũtũũra nthĩgũrũne nĩ bwa barĩa batĩkwagĩra gwĩta ĩgũrũ.
Ũmma: Mũrungu etaga antũ barĩa bakoona mwoyo jwa kenya na kenya nthĩgũrũne “antu bakwa,” “nthuure iu ciakwa,” na “ruciara rwa atharime ba Mwathani.” (Isaya 65:21-23) Bakethĩrwa na wendeeri bwa kũũjũria mworoto jwa karaaja jwa Mũrungu kwerekera antũ, jwa gũtũũra paradiso nthĩgũrũne kenya na kenya barĩ babagĩru.—Kiambiriria 1:28; Zaburi 115:16; Isaya 45:18.
Ũrongo: Namba 144,000 ĩrĩa ĩgweti kĩrĩ iuku rĩa Kũgwũrĩrua nĩ ya ngerekano, na tĩ ya mma.
Ũmma: Kinya kethĩra iuku rĩa Kũgwũrĩrwa irĩtumagĩra namba imwe na njĩra ya ngerekano, namba ingĩ rĩtumagĩra nĩ cia mma. Ngerekano, nĩrĩaragĩĩria, “mariitwa ikumi na jairi ja atumwa baria ikumi na bairi ba Gaturume.” (Kugwurirwa 21:14) Thũgaanĩria ũrikithia bũrĩa bũkwonania atĩ namba 144,000 nĩ ya mma.
Kugwurirwa 7:4 yugaga ũjũ, “utari bwa bau beekiritwe rwano rwa Murungu, nabo ni ngiri igana-na-mirongo-ina-na-inya.” Mũstaarĩ jwa 9 na jwa 10 nĩjũkũgweta gĩkundi kĩa biĩrĩ kĩrĩa nĩ mwanya na kĩa mbere nakĩo nĩ: “ntundu inene ya antu ititarika ni muntu kinya uriku.” Kinya “ntundu inene” ya antu bakoonokua nĩ Mũrungu. (Kugwurirwa 7:9, 10) Gũkethĩrwa namba ĩjĩ 144,000 nĩ ya ngerekano, na yaragĩria gĩkundi gĩtiijekene nĩ kĩa antũ bangʼana, mwanya jwa ikundi biu bio biĩrĩ jũtĩngĩĩthĩrwa jũrĩo.a
Kwongeera nkũrũki, Akristũ 144,000 nĩboonagwa barĩ ‘barĩa baakũũrĩtwe kuuma kĩrĩ kĩrĩndĩ kĩonthe kĩa nthĩgũrũ bakari ta maciara ja mbere.’ (Kugwurirwa 14:4) Biugo “maciara ja mbere” bionanagia gĩkundi kĩa antũ baniini barĩa bathuuri. Biugo biu bitaragĩria bwega antũ barĩa bakaathana na Kristũ ĩgũrũ nĩkenda baatha antũ babaingĩ aja nthĩgũrũne.—Kugwurirwa 5:10.
a Kinya, Profesa Robert L. Thomas aandĩkĩre ũjũ bwegie namba ĩjĩ 144,000 ĩrĩa ĩgweti kĩrĩ Kugwurirwa 7:4: “Nĩ namba ya mma mwanya na ĩrĩa ĩgweti kĩrĩ Kugwurirwa 7:9. Tũkeeja kũmĩjũkia na njĩra ya ngerekano, gũtĩ namba iukune rĩrĩ rĩa Kugwurirwa ĩthĩrwa ĩrĩ ya mma.”—Kugwurirwa 1–7: An Exegetical Commentary, karataci ka 474.