KĨTHOOMO KĨA 58
Kara Ũrĩ Mwĩtĩkĩkua Kĩrĩ Jehova
Akristũ ba mma nĩbatuĩte batĩkororekeeria gĩntũ kinya kĩrĩkũ, kana muntũ kinya ũrĩkũ aangaratania ũthathayia bwao kĩrĩ Jehova. Gũtĩ nkanja kinya gwe nĩu ũthuurĩte kũthithia. Jehova nagwĩragua nĩ wĩtĩkĩkua bwaku. (Thooma 1 Mantu ja Karaja 28:9.) Nĩ mantũ jarĩkũ joomba kũgeria wĩtĩkĩkua bwaku, na nĩatĩa ũũmba kũthithia rĩrĩa jaumĩra?
1. Nĩatĩa antũ bangĩ bomba kũgeria wĩtĩkĩkua bwetũ kĩrĩ Jehova?
Antũ bamwe bakageria gũtũrigĩĩria tũtĩgatumĩkĩra Jehova. Nĩ baaũ bomba kũgeria gũtũthithĩria ũu? Nĩ bamwe barĩa batigĩte ũmma, na baragia ũrongo bwegie ũthuranĩri bwa Jehova nĩkenda bomba kũthũũkia wĩtĩkio bwetũ. Betagwa aregani na wĩtĩkio. Kinya, atongeeria bamwe ba ndini nĩbatambagia nteto cia ũrongo bũtwegie, nĩkenda batũma barĩa batĩkwimenyeera batiga gũtumĩkĩra Jehova. Nĩ ũntũ bwa ũgwati kũgeria gũkararania na muntũ ũrĩa ũkũregana na wĩtĩkio, kũthooma mauku jaao kana ndwaria ciao intanetine, kana gũtonya webũsaĩtine ciao, kana gũtega vidio ciao. Bwegie barĩa bageragia kuuna bangĩ nkoro batĩgatumĩkĩre Jehova na njĩra ya wĩtĩkĩkua, Jesũ augĩre: “Tiganeni nabo; bo nibo atongeeria baria batina metho; na kethira mutumumu agatongeeria mutumumu ungi, bo bairi bakagwa irinyene”—Mathayo 15:14.
2. Nĩatĩa tũũmba kwonania tũrĩ etĩkĩkua kĩrĩ Jehova gũkũrũkĩĩra matua jeetũ?
Wendo bwetũ kĩrĩ Jehova bũgatũtethia kweba ũntũ kinya bũrĩkũ bũkũgwatanĩra na ndini cia ũrongo. Tũtĩbuĩrĩte kũrita ngũgĩ kana kũgwatanĩra na gĩkundi kinya kĩrĩkũ gĩa kĩndini, kana kũthithia ũntũ kinya bũrĩkũ bũkũgwatanĩra na ndini ya ũrongo. Jehova arĩtwĩra ũjũ: “Umagareni ku [Babiloni iria nene] bwi antu bakwa.”—Kugwurirwa 18:2, 4.
ĨNJA NKŨRŨKI
Iritane ũrĩa ũũmba kũrega gwĩtĩkĩĩria muntũ kinya ũrĩkũ atũma wĩtĩkĩkua bwaku kĩrĩ Jehova bwaga inya. Ona kinya ũrĩa ũũmba kwonania wĩtĩkĩkua bwaku kĩrĩ Jehova na njĩra ya kuuma buru kĩrĩ Babiloni Ĩrĩa Nene.
3. Imenyeere kuumania na aritani ba ũrongo
Nĩatĩa tũbuĩrĩte kũthithia rĩrĩa twaigua mantũ jagũcambia ũthuranĩri bwa Jehova? Thooma Njuno 14:15, rĩu bwarĩĩrie kĩũria gĩkĩ:
Nĩkĩ tũbuĩrĩte kwimenyeera tũtĩgetĩkie o ũntũ bunthe bũrĩa tũraigua?
Thooma 2 Johana 9-11, rĩu bwarĩĩrie biũria bibi:
Nĩatĩa tũbuĩrĩte kũthithĩria barĩa bareganaga na wĩtĩkio?
Kinya kethĩra tũtĩkũgwatanĩra ĩmwe kwa ĩmwe na barĩa bareganaga na wĩtĩkio, nĩatĩa tũũmba gwitonyithania na moritani jaao?
Ũrĩthũgaania Jehova akaigua atĩa kethĩra tũkathikĩĩra ndwaria itĩagĩrĩte irĩa ikũmũcambia na ĩgũcambithia ũthuranĩri bwawe
4. Kara ũrĩ mwĩtĩkĩkua kĩrĩ Mũrungu rĩrĩa Mũkristũ ũngĩ athithia wĩyia
Rĩrĩa twamenya muntũ mũnna kĩũthũranone akũthithia wĩyia bũũrito, tũbuĩrĩte kũjũkia ĩtagaaria rĩrĩkũ? Ona ũntũ bũrĩa tũkwiritana kuumania na waatho bũrĩa Mũrungu aaete Israeli ba karaaja. Thooma Mantu ja Alawi 5:1.
Kũringana na mũstaarĩ jũu, rĩrĩa twamenya atĩ muntũ mũnna nathithĩtie wĩyia bũũrito, nĩtũbuĩrĩte kwĩra akũrũ mantũ jarĩa tũkũmenya. Ĩndĩ mbere ya kũthithia ũu, bũrĩngĩthĩrwa bũrĩ ũntũ bwa kĩao kũromba muntũ ũu eete kĩrĩ akũrũ na aumbũre wĩyia bwawe wengwa. Kethĩra akarega kũthithia ũu wĩtĩkĩkua bwetũ kĩrĩ Jehova bũgatũtethia kwĩra akũrũ jarĩa tũkũmenya. Nĩatĩa kũthithia ũu kũũmba kwonania wendo bwetũ bwa mma kĩrĩ . . .
Jehova Mũrungu?
muntũ ũrĩa ũthithĩtie wĩyia?
bangĩ kĩũthũranone?
Muntũ ũrĩa twĩtĩkĩtie ũmwe nawe akeja kwĩthĩrwa arĩ thĩnene, mũtethie!
5. Umagara kĩrĩ Babiloni Ĩrĩa Nene
Thooma Luka 4:8 na Kugwurirwa 18:4, 5, rĩu ũcookie biũria bibi:
Rĩ, riĩtwa rĩakwa no rĩandĩki ndĩ mũmemba wa ndini ya ũrongo?
Rĩ, ndĩ gĩkundine kĩnna kĩrĩa kĩgwatanagĩra na ndini ya ũrongo?
Rĩ, ngũgĩ ĩrĩa nditaga nĩgwataga mbaru ndini ya ũrongo na njĩra kinya ĩrĩkũ?
Rĩ, kũrĩ na mantũ jangĩ ũtũũrone bwakwa nthithagia nkũbatara gũciebania najo jarĩa joomba kwĩthĩrwa jakĩgwatanagĩra na ndini ya ũrongo?
Nkeja kwĩthĩrwa kũrĩ kĩũria ndĩracookia ĩĩ kĩrĩ bibi, nĩ mogarũrũku jarĩkũ mbuĩrĩte kũthithia?
Mantũne jonthe, tua matua jarĩa jagatũma wĩthĩrwa na thamiri ĩnjega, na jarĩa jakonania wĩtĩkĩkua bwaku kĩrĩ Jehova.
Nĩatĩa ũũmba kũthithia ũkeja kũrombwa mbeca cia gũtethia mantũ ja ndini?
ANTŨ BAMWE BAUGAGA: “Nĩnkũbatara kũmenya ũrĩa antũ barĩa bareganaga na ũmma baugaga bwegie Akũũjĩ ba Jehova, nĩkenda mpũmba gũteteera ũmma.”
Rĩ, kũthithia ũu nĩ ũntũ bwa ũũme? Nĩkĩ, kana nĩkĩ tĩ ũntũ bwa ũũme?
NA NJĨRA ĨNKUĨ
Nĩkenda tũkara tũrĩ etĩkĩkua kĩrĩ Jehova, tũtĩbuĩrĩte kũgwatanĩra na barĩa bageragia kũthũũkia ngwatanĩro yeetũ amwe nawe.
Gũcookera
Nĩkĩ tũtĩbuĩrĩte kũthikĩĩra mantũ ja barĩa bareganĩte na wĩtĩkio?
Nĩatĩa tũbuĩrĩte kũthithia tũkeeja kũmenya atĩ mũtana kana mwarĩ wa baaba nathithĩtie wĩyia bũũrito?
Nĩatĩa tũũmba kũthingatĩĩra mũkaana jwegie kuumagara kĩrĩ ndini cia ũrongo?
CŨNKŨŨNA
Iritane ũrĩa ũbuĩrĩte kũthithia rĩrĩa bangĩ bataambia nteto cia ũrongo ciegie Akũũjĩ ba Jehova.
“Rĩ, Ũrĩna Ũmma Bwegie Ũntũ Bũu?” (Mnara wa Mlinzi, Agasti 2018)
Nĩatĩa ũũmba kũmenya ikundi kana mantũ jarĩa jakũgwata mbaru Babiloni Ĩrĩa Nene?
Nĩatĩa bamwe ba aregani bathithĩtie nĩkenda bageria gũtũma wĩtĩkio bwetũ bwaga inya?
Kĩrĩ rũgono “Nĩmbĩthĩrĩtwe Ngĩcwaa Mũrungu Kuuma Wana Bwakwa,” thooma bwegie ũrĩa mũtongeeria wa ndini ya Shinto aatigĩre kũgwatanĩra na ndini ya ũrongo.
“Bibiria Nĩgarũraga Ũtũũro” (Mnara wa Mlinzi, Julaĩ 1, 2011)