Nĩ Akũũjĩ ba Jehova bang’ana wijiĩ? Bamwe mbuga nĩ atũũri baaku, barĩa bũritaga ngũgĩ nabo, kana bũthoomaga nabo. Kana mbuga tũraaranĩria nagwe mantũ ja Bibiria. Rĩ, nĩtwĩ baaũ kamma, na nĩkĩ tũtũmagĩĩria wĩtĩkio bwetũ tũtĩkwitha?

Tũrĩ antũ ba wĩthĩre. Tuumĩte kĩrĩ mĩrerere na mĩtũũrĩre mwanya mwanya. Mberene, bamwe beetũ twaarĩ ba ndini mwanya mwanya, na kinya bangĩ bateetĩkĩtie Mũrungu. Ĩndĩ mbere ya kwaa Akũũjĩ ba Jehova, twinthe nĩtwajũkĩrie kaanya gũcũnkũũna bwega mooritani ja Bibiria. (Mathithio 17:11) Nĩtwetĩkĩrĩrie jarĩa twairitanĩre, na tũrathuura twingwa kũthaathayia Jehova Mũrungu.

Nĩtũgunĩkaga kuumania na kwiritana Bibiria. O ta antũ bangĩ, nĩtũrũjaga na mathĩĩna na gũtaũkĩrwa gwetũ. Ĩndĩ gũkũrũkĩĩra gwiciũmia gũtumĩra mooritani ja Bibiria mũtũũrĩrene jwetũ jwa ntũku cionthe, nĩ tũũmbĩte kwĩthĩrwa na ũtũũro bũbwega. (Zaburi 128:1, 2) Kĩu nĩ kĩmwe gĩtũmaga tũtũmĩrĩria bangĩ mantũ jameega jarĩa twiritanĩte kuuma Bibiriene.

Tũtongagĩĩrua nĩ mooritani ja Mũrungu. Mooritani jau, o ta ũrĩa jaritanagwa Bibiriene, jatũteethagia kwaa antũ babeega, na gũtĩĩa bangĩ, na kwĩthĩrwa na nkuma ta wĩtĩkua na kĩao. Nĩjatũteethagia kwĩthĩrwa tũrĩ antũ babeega na bakũguna bangĩ, na jagateethia nja kwĩthĩrwa na ngwatanĩro na mĩtũũrĩre ĩmĩagĩru. Tontũ tũrĩ na mma atĩ “Murungu atiendaga bamwe nkuruki ya bangi,” twĩ nĩ ndũgũ ya ataana na aarĩ ba baaba ba nthĩgũrũne yonthe, batĩ na mĩanka ya kĩrũrĩĩjo na ya gĩsiasa. Kinya kethĩra twĩ nĩ antũ ba wĩthĩre, tũrĩ antũ ba mwanya mono.—Mathithio 4:13; 10:34, 35.

• Nĩ mantũ jarĩkũ ja wĩthĩre Akũũjĩ ba Jehova bethagĩrwa najo o ta antũ bangĩ?

• Nĩ mooritani jarĩkũ Akũũjĩ ba Jehova bairitanĩte kuuma kĩrĩ Bibiria?

Antũ babaingĩ bathũgaanagia atĩ Akũũjĩ ba Jehova nĩ riĩtwa rĩa ndini ĩnjerũ. Ĩndĩ, mĩaka nkũrũki ya 2,700 mĩthiru, nthũmba cia Mũrungu wa mma cietagwa “akuuji” baawe. (Isaya 43:10-12) Mwanka mwakeene jwa 1931, twetagwa Aritwa ba Bibiria. Nĩkĩ twambĩrĩrie gwĩtwa Akũũjĩ ba Jehova?

Riĩtwa rĩrĩ rĩmenyithanagia Mũrungu weetũ. Kũringana na mauku ja karaaja ja gũkũnjwa, riĩtwa rĩa Mũrungu Jehova, nĩ rĩonekaga maita ngiri inyiingĩ kĩrĩ Bibiria. Bibiriene inyiingĩ riĩtwa rĩrĩ nĩ rĩriti, na mariĩtwa ja gĩtĩĩo ta Mwathani kana Mũrungu jagatumĩrwa. Mũrungu wa mma naagwũrĩĩre Musa riĩtwa rĩawe, Jehova, akiugaga: “Riu nirio riitwa riakwa kenya na kenya.” (Kuuma 3:15, 6;3) Na njĩra ĩu, naaciathũranĩre na mĩrungu yonthe ya ũrongo. Nĩtũkũgwĩrĩrua gwĩtanĩrua na riĩtwa rĩa Mũrungu rĩrĩtheru.

Nĩrĩtaaragĩĩria ngũgĩ yeetũ. Mũthingatano jũmũraaja jwa antũ ba karaaja, kwaambĩrĩria na muntũ ũmwagĩru Abeli, nĩbaaritaga ũkũũjĩ bwegiĩ wĩtĩkio bwao kĩrĩ Jehova. Karine inyiingĩ ithiri, Nuhu, Abrahamu, Sara, Musa, Daudi, na bangĩ baarĩ bamwe ba “akuuji babaingi mono uu, bakari ta itu ririnene.” (Ahibirania 11:4–12:1) O ta ũrĩa muntũ omba kũrita ũkũũjĩ kootini bwegiĩ muntũ ũtĩna ĩatia, no ũu tũthuurĩte kũmenyithania ũmma bwegiĩ Mũrungu weetũ.

Ka twigerekanagia na Jesũ. Bibiria ĩmwĩtaga “mukuuji uria wa witikika na wa mma.” (Kugwurirwa 3:14) Jesũ wengwa naugĩre ‘nagwuriire antu riitwa’ rĩa Mũrungu na areeta na mbere ‘gukujiira umma bungwa’ bwegiĩ Mũrungu. (Johana 17:6; 18:37) Kwou athingati ba mma ba Kristũ no mwanka betanĩrue na riĩtwa rĩa Mũrungu na barĩmenyithanie. Bũu nĩbu Akũũjĩ ba Jehova baciũmagia kũthithia.

• Nĩkĩ tontũ Aritwa ba Bibiria baambĩrĩĩrie gwĩtwa Akũũjĩ ba Jehova?

• Jehova ethĩrĩtwe arĩ na akũũjĩ nthĩgũrũne ĩgiita rĩng’ana atĩa?

• Nũũ Mũkũũjĩ ũrĩa mũnene nkũrũki wa Jehova?

Nĩkwaroretue Bibiriene atĩ nyuma ya gũkua kwa Kristũ, aritani ba ũrongo barĩngĩ kuumĩĩra kĩrĩ Akrĩstũ ba mbere na kũthũũkia ũmma bwa Bibiria. (Mathithio 20:29, 30) Nyuma ya kagiita, ũu nou gwakarĩkĩre bungwa. Nĩbaunganĩrie mooritani ya Jesũ na mooritani ya ndini cia ũrongo, na Akristũ batĩ ba mma baraumĩra. (2 Timotheo 4:3, 4) Nĩatĩa tũũmba kũmenya kamma atĩ naarua tũrĩ na ũmenyo bwa mma bwa ũrĩa Bibiria ĩritanaga bungwa?

Ĩgiita nĩ rĩakinyĩre rĩa Jehova kũgwũra ũmma. Jehova naaroretie atĩ magiita ja mũthiro “umenyo bukoongereka nthiguru.” (Danieli 12:4) Mwakeene jwa 1870, gakuundi kaniini ka antũ, nĩ gaacwaaga ũmma kuuma kĩrĩ Bibiria na baramenya atĩ mooritani jamaingĩ ja makanisa jataumanĩĩtie na Bibiria. Kwou, baraambĩrĩria gũcũnkũũna kenda bamenya mooritani jongwa ja ũmma ja Bibiria, na Jehova arabatharima na ũmenyo bwa gĩkĩrundu.

Antũ eendi ũmma nĩ baacũnkũũnĩre Bibiria bwega. Barĩ na wĩru, Aritwa bau ba Bibiria, o ta ũrĩa Akũũjĩ ba Jehova beetagwa, nĩ baambĩrĩĩrie njĩra ya kwiritana ĩrĩa tũtumagĩra kinya naarua. Baarĩĩragia o ũntũ bũmwe bũmwe bwa Bibiria. Rĩrĩa baatirimaga gĩcuncĩ batĩgũciũkĩrwa nĩkĩo Bibiriene, nĩ baacwaaga Maandĩko jangĩ kĩrĩyo jagũgĩtaarĩĩria. Rĩrĩa baakinyagĩra ĩtua rĩkũgwatanĩra na Maandĩko jau jangĩ, nĩbaandĩkaga ũntũ bũu. Na njĩra ĩu ya kũrekeeria Bibiria ĩitaũra yongwa nĩ baacookerie kaĩrĩ ũmma bwegiĩ riĩtwa rĩa Mũrungu na Ũnene bwawe, mworoto jwawe kĩrĩ antũ na nthĩgũrũ, ũrĩa gũkarĩkaga kĩrĩ akuũ, na wĩrĩgĩĩro bwa kũriũkua. Ũcũnkũũni bwao nĩ bwabaritĩre ũkombone bwa mooritani na mawĩthĩre jamaingĩ ja ũrongo.—Johana 8:31, 32.

Gũkinyia mwaka jwa 1879, Aritwa ba Bibiria nĩ boonere atĩ ĩgiita rĩgũkinya rĩa kũmenyithania ũmma na njĩra ĩnene. Kwou mwakeene jũu, nĩ baambĩrĩĩrie kwaandĩkithia ngacĩti ĩrĩa tũcabithagia kinya naarua ĩjĩ, Mnara wa Mlinzi Unaotangaza Ufalme wa Yehova. Nandĩ nĩ tũgũtaambia ũmma bwa Bibiria kĩrĩ nthĩgũrũ 240, tũgĩtumagĩra mĩgambo nkũrũki ya 750. Gũtĩrĩo kaĩrĩ ũmenyo bwa mma bwethĩrwa bwingĩĩte ũjũ!

• Nyuma ya gũkua gwa Kristũ, nĩatĩa gwakarĩkĩre kĩrĩ ũmma bwa Bibiria?

• Nĩmbi bitũteethetie kũmenya ũmma kaĩrĩ kuuma kĩrĩ Rũteto rwa Mũrungu?

Mĩaka ĩmiingĩ ĩkũrũkĩĩte, Akũũjĩ ba Jehova nĩbatumĩrĩte, bagacaba, na kũgaa mĩthemba mwanya mwanya ya Bibiria. Ĩndĩ nĩtwoonere kũrĩ na ũbatu bwa kũrita Bibiria ĩnjerũ ĩrĩa ĩrĩngĩteethia antũ kwiritana “mantu jaria jari ja mma,” bũrĩa bũrĩ wendi bwa Mũrungu kĩrĩ antũ bonthe. (1 Timotheo 2:3, 4) Kwou mwakeene jwa 1950, nĩtwambĩrĩĩrie kũrita icuncĩ bia Bibiria ya Tafsiri ya Ulimwengu Mpya na mũgambo jwa kĩnandĩ. Bibiria ĩjĩ ĩtaũrĩtwe na njĩra ya wĩtĩkĩka na ĩtĩgwaatia kĩrĩ mĩgambo nkũrũki ya 130.

Nĩkweendekaga Bibiria ĩmpũũthũ gũciũkĩrwa nĩyo. Mĩgambo nĩgarũkaga nyuma ya ĩgiita, na Bibiria inyiingĩ nĩ ciĩthagĩrwa na biugo bitĩgũciũrĩka kana bikũrũki nĩ ĩgiita. Kinya mauku ja karaaja ja gũkũnjwa jarĩa jataatĩtie, na jarĩa jaakuĩrĩrĩtie maandĩko ja kaumo, nĩjoonekere na jarateetheria gũciũkĩrwa bwega nĩ biugo birĩa birĩ Bibiriene bia Kĩhibirania, Kĩaramu na Kĩgiriki.

Nĩkweendekaga Bibiria ĩtĩgwaatithia Rũteto rwa Mũrungu. Antũ a kũgarũra maandĩko jarĩa jatongereetue nĩ kĩrundu kĩa Mũrungu, ataũri ba Bibiria babuĩrĩte kwĩthĩrwa barĩ etĩkua kĩrĩ maandĩko ja kaumo. Ĩndĩ Bibiria inyiingĩ, itĩtumĩrĩte riĩtwa rĩa Mũrungu Jehova, kĩrĩ Maandĩko Jamatheru.

Bibiria nĩyeendekaga ĩgũkumia Mũtuungi waayo. (2 Samweli 23:2) Kĩrĩ Tafsiri ya Ulimwengu Mpya, riĩtwa rĩa Jehova nĩrĩcooketue arĩa rĩonekaga ta maita 7,000 kĩrĩ mauku jamakũrũ jagũkũnjwa ja Bibiria, ta ũrĩa ngerekano ĩkwonania au gaiti. (Zaburi 83:18) Nĩũntũ bwa ũcũnkũũni bwa mĩaka ĩmiingĩ, nĩtũgwĩragĩrua kũthooma Bĩbiria ĩjĩ nĩũntũ nĩmenyithanagia mathũgaanio ja Mũrungu na njĩra ĩmpũũthũ. Kethĩra ũrĩ na Bibiria ya Tafsiri ya Ulimwengu Mpya na mũgambo jwaku kana ũtĩ nayo, nĩtũgũgwĩkĩra wĩru wĩthĩrwe na rũmenyeria rũrwega rwa kũthooma Bibiria ntukũ cionthe.—Joshua 1:8; Zaburi 1:2, 3.

• Nĩkĩ tontũ twoonere atĩ Bibiria ĩnjerũ nĩyeendekaga gũtaũrwa?

• Muntũ ũrĩa ũkwenda kwiritana wendi bwa Mũrungu abuĩrĩte kũmenyeria kũthithagia atĩa ntukũ cionthe?