Nĩatĩa Mawaatho ja Mũrungu Jatũteethagia?

1.Nĩkĩ tũbataraga ũtongeeria?

Mũũmbi weetũ arĩ ũũme nkũrũki yeetũ. Ta Baaba ũrĩna wendo, natũmenyagĩĩra. Kinya ateendete twĩtongeeria twingwa. (Jeremia 10:23) Kwou, o ta ũrĩa mwaana mũnyi abataraga ũtongeeria bwa mũciari, nou twinthe tũbataraga ũtongeeria bwa Mũrungu. (Isaya 48:​17, 18) Mooritani ja Bibiria nĩjaejanaga ũtongeeria bũrĩa bũrĩ kĩewa kuuma kĩrĩ Mũrungu. ​—Thooma 2 Timotheo 3:​16.

Mawaatho ja Jehova na mooritani jaawe, jatũritanaga kwĩthĩrwa na mũtũũrĩre jũmwega nandĩ, na jagatwoneeria ũrĩa tũũmba kwona itharimo bia ũcii na ũcii ĩgiitene rĩĩjĩte. Tontũ Mũrungu nĩwe watũũmbĩre, nĩtũbuĩrĩte gwĩtĩkĩra ũtongeeria bwawe na kwoonania nkaatho. ​—Thooma Zaburi 19:​7, 11; Kugwurirwa 4:​11.

2.Mooritani ja Bibiria nĩmbi?

Mooritani ja Bibiria nĩ mma cia mũsingi irĩa itũteethagia kũmenya ũrĩa Mũrungu endaga tũthithia mantũũne mwanya mwanya. Mawaatho najo jatumĩkaga kĩrĩ ũntũ bũna. (Kuriikanithia Maathana 22:⁠8) No mwanka tũthũgaanĩrie bwega nĩ ũritani bũrĩkũ tũũmba gũtumĩra magiita mwanya mwanya. (Njuno 2:​10-​12) Ngerekano, Bibiria ĩritanaga ũtũũro nĩ kĩewa kuuma kĩrĩ Mũrungu. Ũritani bũu bwa mũsingi bwomba gũtũtongeeria ngũgĩĩne, nja, na kinya rĩrĩa tũrĩ rũgendone. Bũgatũtongeeria kũjũkia matagaaria ja kwimenyeera. ​—Thooma Mathithio 17:⁠28.

3.Nĩ mawaatho jarĩkũ jaĩrĩ jamanene?

Jesũ naaritanĩre mawaatho jaĩrĩ ja gĩtũmi mono. Waatho bwa mbere, bwonanagia mworoto jwa ũtũũro bwa antũ—kũmenya Mũrungu, kũmwenda, na kũmũtumĩkĩra tũrĩ etĩkua. Nĩtũbuĩrĩte kũthũgaanĩria waatho bũbũ bwa mbere rĩrĩa tũgũtua matua jeetũ jonthe. (Njuno 3:⁠6) Barĩa bajũkagia waatho bũbũ na ũrito kuuma nkorone, nĩbaejaga acoore ba Mũrungu, bakoona kũgwĩrua kwa mma, na mwoyo jwa kenya na kenya. ​—Thooma Mathayo 22:​36-​38.

Waatho bwa jaĩrĩ bwomba gũtũtongeeria kũgĩa ngwatanĩro ĩrĩna thĩĩrĩ amwe na bangĩ. (1 Akorintho 13:​4-7) Gũtumĩra waatho bũbũ bwa jaĩrĩ, nĩkwendaga gũcierekania na ũrĩa Mũrungu athithagĩria antũ.​—Thooma Mathayo 7:​12; 22:​39, 40.

4.Nĩatĩa Mawaatho ja Mũrungu jatũteethagia?

Mawaatho ja Mũrungu nĩjaritanaga ũrĩa nja ciũmba kũgwatithanua nĩ wendo. (Akolosai 3:​12-​14) Rũteto rwa Mũrungu kinya nĩrũteethagia nja na njĩra ya ũritani bũbũ bwa mũsingi atĩ​​—⁠mũkũrũ na mwekũrũ batĩbuĩrĩte kwathũkana.​—Thooma Kiambiriria 2:​24.

Kũthingatĩĩra mooritani ja Bibiria kwomba gũtũteethia kũmenyeera into bietũ na kinya mũkarĩre jwetũ. Ngerekano, barĩa baejanaga ngũgĩ kaingĩ baandĩkaga barĩa bathingatagĩĩra mooritani ja Bibiria, nĩkwĩthĩrwa nĩ etĩkua na ariti ngũgĩ barĩna wĩru. (Njuno 10:​4, 26; Ahibirania13:18) Rũteto rwa Mũrungu kinya nĩrũtũritanaga kũng’anĩrwa nĩ into bia mũsingi, na kwona ũcoore na Mũrungu bũrĩ bwa gĩtũmi gĩkĩnene nkũrũki ya into bia nthĩgũrũ. ​—Thooma Mathayo 6:​24, 25, 33; 1 Timotheo 6:​8-​10.

Gũtumĩra mawaatho ja Mũrungu kwomba gũtũteethia kũmenyeera ũgima bwetũ bwa mwĩrĩ. (Njuno 14:30; 22:​24, 25) Ngerekano, kũthingatĩĩra waatho bwa Mũrungu bwa kũregana na mbogita nĩgũtũteethagia gũciebania na mĩrimo ĩmĩthũũku na kinya moogwati jangĩ. (Njuno 23:20) Jehova netĩkĩĩrĩtie tũtumĩra ndivei ĩndĩ na kĩthimi. (Zaburi 104:15; 1 Akorintho 6:​10) Mawaatho ja Mũrungu nĩjatũteethagia na gũtũritana gũkaria mathithio jeetũ na kinya mathũgaanio. (Zaburi 119:​97-​100) Kwou, Akristũ ba mma batĩathĩkagĩra mawaatho ja Mũrungu nĩkenda jabaguna akĩ. Ĩndĩ bathithagia ũũ nĩkenda bakumithia Jehova. ​—Thooma Mathayo 5:​14-​16.