KĨTHOOMO KĨA 38
Tĩĩa Kĩewa Kĩa Mwoyo
Kũrĩ na mantũ jamaingĩ jameega tũũmba kũgwĩrĩrua ũtũũrone. Kinya rĩrĩa tũgũcemania na mathĩĩna, rĩonthe twomba kũgwĩrĩrua mantũ manna ũtũũrone. Nĩatĩa tũũmba kwonania atĩ nĩtũgũtĩĩa kĩewa kĩa mwoyo? Na nĩ gĩtũmi kĩrĩkũ kĩrĩa kĩnene gĩa kũthithia ũu?
1. Nĩkĩ tũbuĩrĩte gũtĩĩa mwoyo?
Nĩtũbuĩrĩte gũtĩĩa mwoyo tontũ nĩ kĩewa kuuma kĩrĩ Baaba weetũ wa ĩgũrũ ũrĩna wendo, Jehova. Nĩwe “kaumo ka mwoyo”—nĩwe woombĩre bionthe birĩa birĩ mwoyo. (Zaburi 36:9) “Niwe weejaga antu bonthe mioyo yao, o na inya ya gutuma batuure, o na inya ya gwikia miruki, o na into bionthe biria bagitaga.” (Mathithio 17:25, 28) Jehova natwejaga birĩa tũkũbatara nĩkenda twĩta na mbere gũtũũra. Ĩndĩ, nkũrũki ya jau jonthe, namenyagĩĩra ũtũũro bwetũ na njĩra ĩrĩa ĩtũmaga tũbugwĩrĩrua.—Thooma Mathithio 14:17.
2. Nĩatĩa tũũmba kwonia Jehova nĩtũgũtĩĩa kĩewa kĩa mwoyo?
Kuuma nyakwe arĩgũgũkamata kĩune kĩawe, Jehova naambĩrĩĩrie gũkũmenya. Daudi arĩ ũmwe wa athathayia ba Mũrungu, naugĩre ũjũ atongeeretue nĩ kĩrundu: “Metho jaku ijambonaga riria ndaari kiagati.” (Zaburi 139:16) Jehova noonaga ũtũũro bwaku bũrĩ bwa gĩtũmi mono. (Thooma Mathayo 10:29-31.) Jehova naigagua bũbũĩ mono rĩrĩa muntũ oraga ũngĩ akĩendaga kana kinya aciũraga wengwa.a (Kuuma 20:13) Kinya Jehova naigagua bũbũĩ kethĩra tũgekĩra ũtũũro bwetũ ũgwatine tũkĩendaga, kana rĩrĩa twarega kũjũkia matagaaria ja gũkaria ũtũũro bwa bangĩ. Rĩrĩa twamenyeera mwoyo jwetũ na twatĩĩa mwoyo jwa bangĩ, nĩtwonanagia atĩ nĩtũkwona kĩewa kĩu gĩakũrigarania kĩrĩ kĩa gĩtũmi
ĨNJA NKŨRŨKI
Ona imwe cia njĩra irĩa ũũmba kwonania nacio nũgũtĩĩa kĩewa kĩa mwoyo.
3. Menyeera ũgima bwaku bwa mwĩrĩ
Akristũ barĩa bairitĩte kĩrĩ Jehova nĩbatumagĩra ũtũũro bwao bunthe gũtumĩkĩra Jehova. Nĩteka baritaga mĩĩri yaao ĩrĩ kĩgongwana kĩrĩ Mũrungu. Thooma Aroma 12:1, 2, rĩu bwarĩĩrie biũria bibi:
Nĩmbi bibuĩrĩte gũgwĩkĩra inya wenda kũmenyeera ũgima bwaku bwa mwĩrĩ?
Nĩ na njĩra irĩkũ ũũmba kũthithia ũu?
4. Imenyeere na ũjũkie matagaaria jarĩa joomba gũgũkaria ũtĩkagurarue kana ũreta gĩkuũ
Bibiria nĩtwĩkagĩra inya twebane na mantũ jarĩa joomba kũreta ũgwati. Tega VIDIO nĩkenda wiritana jamwe ja mantũ jarĩa ũũmba kũthithia nĩkenda ũtĩgatonye ũgwatine.
Thooma Njuno 22:3, rĩu bwarĩĩrie ũrĩa ũgwe na antũ bangĩ bũũmba kwĩthĩrwa na ũkaria . . .
ũrĩ nja gwaku.
ũrĩ ngũgĩne.
rĩrĩa ũgũcetha.
rĩrĩa wĩtithĩtie ngarĩ kana ũkamati.
5. Tĩĩa mwoyo jwa mwana ũtĩciari
Daudi natarĩĩrie atĩ Jehova nathingatagĩra mantũ jonthe jarĩa jakarĩkaga rĩrĩa mwana agũkũra kĩune kĩa ngˈina. Thooma Zaburi 139:13-17, rĩu bwarĩĩrie kĩũria gĩkĩ:
Methone ja Jehova-rĩ, ũtũũro bwa muntũ bwambagia rĩrĩa ngˈina agĩa ĩu, kana nĩ mwana aciarwa?
Waatho bwa Jehova kĩrĩ Aisraeli ba karaaja, nĩbwakaragia bangˈina na aana barĩa bethagĩrwa bakamatĩte ĩune. Thooma Kuuma 21:22, 23, rĩu bwarĩĩrie biũria bibi:
Nĩatĩa Jehova onaga muntũ ũrĩa woraga mwana ũtĩciari atĩkwenda?
Nĩatĩa ũũmba kwigua muntũ akeja kũthithia ũu akĩendaga?b
Ũrĩna maoni jarĩkũ bwegie mwonere jũu jwa Mũrungu?
Kĩnya muntũ mũka ũrĩa wonaga ũtũũro bũrĩ bwa gĩtũmi, omba kwinyĩĩrua nĩ mantũ na akathũgaania kũrita ĩu. Thooma Isaya 41:10, rĩu bwarĩĩrie biũria bibi:
Muntũ mũka akeja kwĩthĩrwa agĩatĩkagwa arita ĩu, nũũ abuĩrĩte kwĩrĩgĩĩra amũtethia? Nĩkĩ ũkuuga ũu?
ANTŨ BAMWE BAUGAGA: “Muntũ mũka, arĩna wiciathi bwa kũthuura kethĩra akarita ĩu, tontũ nĩwe ũrĩkamatĩte.”
Nĩmbi bigũkũrikithĩria atĩ Jehova nonaga ũtũũro bwa ngˈina, na bwa mwana atĩciari bũrĩ bwa gĩtũmi?
NA NJĨRA ĨNKUĨ
Bibiria nĩtũritanaga kwenda, gũtĩĩa na gũkaria kĩewa kĩa mwoyo kĩrĩa Jehova atwete. Kũu nĩ kuuga, mwoyo jwetũ na jwa bangĩ.
Gũcookera
Nĩkĩ Jehova onaga mwoyo jwa muntũ jũrĩ jwa gĩtũmi?
Nĩatĩa Jehova aigagua rĩrĩa muntũ oraga ũngĩ akĩendaga?
Nĩmbi bikũgwĩragia bwegie kĩewa kĩa mwoyo?
CŨNKŨŨNA
Nĩatĩa tũũmba gũcookeria Jehova nkaatho tontũ bwa kĩewa kĩa mwoyo?
Ona ĩcookio rĩa kĩũria gĩkĩ, Mũrungu-rĩ, omba kũrekera muntũ mũka wanarita ĩu?
“Nĩatĩa Bibiria Yugaga Bwegĩe Kũrita Ĩu?” (Thooma intanetine)
Iritane ũrĩa mwonere jwa Mũrungu jwegie mwoyo jũbũĩrĩte gũtũtongeeria rĩrĩa tũkũthuura mantũ jakwigwĩria.
“‘Mĩcetho Ĩrĩna Ũgwati’—Rĩ, Witonyithie Kĩrĩyo?” (Amkeni!, Oktoba 8, 2000)
A muntũ akethĩrwa akĩthũgaanagia gũciũraga? Ona ũrĩa Bibiria yũũmba kũmũtethia.
a Jehova namakagĩra mono barĩa baunĩki nkoro. (Zaburi 34:18) Nonaga na agaciũkĩrwa nĩ mathũgaanio jamathũũku, jarĩa antũ bethagĩrwa najo jagatũma benda gũciũraga, na nendaga kũbatethia. Nĩkenda wona ũrĩa ũtethio bwawe bũũmba gũgwĩkĩra inya ũregana na mathũgaanio ja gũciũraga, thooma mantũ jarĩa jaandĩki “Nĩndeendaga Gũkua—Rĩ, Bibiria no Ĩntethie Kethĩra Nĩnkũthũgaania Gũciũraga?” jarĩa jarĩ kĩrĩ gĩcuncĩ kĩa Cũnkũũna kĩthomoone gĩkĩ.
b Barĩa banarita ĩu batĩkũbatara gũkara baremeeri nĩkwigua barĩ na ĩatia—Jehova omba kũbarekera. Kenda wona mantũ nkũrũki, ona mantũ ja kũthooma jarĩa jaandĩki “Nĩatĩa Bibiria Yugaga Bwegie Kũrita Ĩu?” kĩrĩ gĩcuncĩ gĩa Cũnkũũna kĩthoomone gĩkĩ.