Isaia

62 Siona dainai lau udugu basina hakapua,

bona Ierusalem dainai laḡagu basina ania,

ela bona ia igwaurai-maorona baine lasi, diari na heto,

bona ia ihamaurina, kede na heto.

 2 Basileia idau-idau ese oi igwaurai-maoromu bae itaia,

bona pavapava iboudiai ese oi hairaimu bae itaia;

bona lada matamatana bae hahenemailaimu,

Iehova uduna ese baine heni ladana.

 3 Oi na kwara ihavavalaina ḡauna mai hairaina ai baola, Iehova imana ai,

bona pavapava kwarana ihavavalaina ḡauna ai, emu Dirava imana ai.

 4 Oi ladamu basie hatoa lou “Vada e rakatania”,

bona emu tano basie gwauraia lou “Vada e vahu”;

a oi ladamu bae hatoa “Na moalelaiamu”,

bona emu tano bae gwauraia “Vada e headava”;

badina be Iehova ese oi e moalelaimumu,

bona emu tano na baine headava.

 5 Badina be tauhau ese hane-ulato rami-hebouna e adavaiamu na heto,

oi Ihaginimu Tauna ese baine adavamu;

bona headava matamata tauna ese adavana e moalelaiamu heḡereḡerena,

emu Dirava ese unu baine moalelaimu toma.

 6 Ierusalem e, gima taudia vada na atodia heḡaeḡae,

oiemu maḡu latadiai;

dina idoinai bona hanuaboi idoinai

idia na eredia basie kuma.

Umui Iehova o hahelaloa une taumui,

basio laḡa ani,

 7 bona basio halaḡaia ani,

ela bona ia ese Ierusalem baine haginia auka,

bona heimodai ḡauna ai baine halaoa tanobada ai.

 8 Iehova ese imana idibana bona imana mai goadana

daidiai vada e gwau hamata, eto:

Lau ese emu uit na oi inaimu basina ubulaidia lou,

bona idau taudia ese emu vine ranuna, o hekwarahilaia ḡauna, na basie inua,

 9 a e gogoamu taudia ese bae ania,

bena Iehova bae imodaia,

bona e habouamu taudia ese bae inua,

egu gabu helaḡana ikoudia ai.

10 A raka vareai, ikoukou amo a raka vareai,

taunimanima edia dala a heḡaeḡaelaia;

laolao dalana a haḡoevaia, a haḡoevaia,

nadi na ba gogo oho;

pepe a duduia isi

bese idau-idau daediai!

11 A itaia, Iehova ese vada e gwauraia hedinarai

ela bona tanobada dokona, eto,

Siona hahinena ba hamaoroa, baoto:

A itaia, ihamaurimu na e maimu;

a itaia, ena dava na ia ida,

bona ena ahu na ia vairanai.

12 Idia ladadia bae hato

“Orea helaḡana, Iehova ese vada e rauadia taudia”;

bona oi ladamu bae hatoa

“E tahuamu, se rakataniamu, hanuana”.