Hosea

12 Efraim ese lai e reḡuamu,

bona laurabada e ḡavaia loamu, dina idoinai.

Idia ese koikoi bona daḡedaḡe e habadadiamu,

Asuria ida e herohe mainomu,

bona dehoro na Aigupto e laohaiamu.

 2 Iehova na mai ena hahebade Iuda latanai,

bona Iakob matana baine hakania, ena dala heḡereḡeredia,

bona davana baine henia, ena kara heḡereḡeredia.

 3 Sinana bogana ai ia ese kakana ae-geduna e dogoa tao,

bona tau-badana ai ia na Dirava ida e hedaverai.

 4 Aneru ida e hedaverai, bena e kwalimu;

e taitai, ena lalo-namo e noinoilaia.

Betele ai ia na Dirava ida e hedavari,

unuseni ai Dirava na ia ida e hereva;

 5 Iehova, tuari oreadia edia Dirava,

ia ladana na Iehova.

 6 Taunabunai, Dirava ena hekaha ai a lou,

lalokau bona hahemaoro ḡoevaḡoeva ba dogodia tao,

bona emu Dirava ba naria tarika-tarika.

 7 Hoihoi tauna, metau ihahetohona ḡauna koikoina na imana ai

tauna ese taunimanima ihahisihisidia e uramu.

 8 Efraim eto “Momokani, to lau vada na taḡa,

kohu momo vada na habou egu”.

Ḡau tamona ena taḡa idoinai ese

ena kerere basine rohoa.

 9 Aigupto tanona amo

lau na Iehova, emui Dirava;

kalaga ai baina hanohomui lou,

e gwaurai ariadia dinadia ai heḡereḡerena.

10 Peroveta taudia na hereva henidia;

mata-hanai na hahohodia,

bona peroveta taudia ududia amo

sivarai heḡereḡeredia na heni.

11 Bema kara havara na Gilead ai mia,

idia na momokani bae baia;

bema Gilgal ai boromakau mamaruanedia e hahelaḡadiamu,

edia ihaboulaina patadia na nadi senudia ai baela,

uma dadairadia ai e habou nadi senudia na heheto.

12 (Iakob na Aram tanona e heau lao,

unuseni ai Israel na hesiai karadia e karava,

adavana idavalaina, adavana iabina totona mamoe e reḡudiava.)

13 Peroveta tauna imana amo Iehova ese Israel na Aigupto tanona amo e hakaua lasi;

bona peroveta tauna imana amo ia ese e hamauria.

14 Efraim vada e daḡedaḡe dikadika,

taunabunai ena Ḡaubada ese rara ihahebubuna gwauna na

ia latanai baine hamiaia, bona ena maumau na ia latanai ma baine halou henia.