Metiu ese E Torea

10 Iesu na ena disaipol 12 e boiridia bona siahu e henidia, lauma dikadia* bae luludia bona gorere idauidau bae hanamodia.

2 Apostol 12 ladadia be ini: Saimon, ladana ma ta na Pita, bona ia tadina Andru, bona Sebedi natuna memerodia raruosi Jeims bona Jon, 3 Filip, Batolomeo, Tomas, tax gogo tauna Metiu, Alfeos natuna Jeims, Tadies, 4 Kananaia tauna* Saimon, bona Judas Iskariot, ia na gabeai Iesu taona e torea tauna.

5 Iesu ese unu apostol 12 e siaidia neganai e haḡanidia, eto: “Idau bese taudia dekedia basiola, bona Samaria sitina ta ai basio vareai. 6 To, Israel besena ai boio mamoedia dekedia baola. 7 O laomu neganai, ba haroro, baoto: ‘Guba Gavamanina vada eme kahikahi.’ 8 Gorere taudia ba hanamodia, mase taudia ba hatoredia isi, lepera taudia ba hanamodia, demoni ba luludia. O abi asi davana, ba heni asi davana. 9 Emui moni pusedia ai golo, silva, eiava kopa na basio uda, 10 eiava dabua ma ta,* sendol,* bona itotohi, eiava aniani danu basio abi kau, badina ḡaukara tauna na aniani bae henia.

11 “Siti ta o hanua ta o laomu neganai, umui baine abimui dae bona o laohaia sivaraina baine abia dae tauna ba tahua, bena unuseniai ba noho ela bona ba raka oho negana. 12 Ruma ta ai o vareaimu neganai, ruma tauna ba hanamoa. 13 Bema ruma tauna ese baine abimui dae, emui maino na ia enai ba rakatania. To bema basine abimui dae, emui maino na bavabia lou. 14 Bema o lao heniamu rumana eiava sitina ai basie abimui dae eiava emui hereva basie kamonai, una gabu o rakataniamu neganai, aemui kahudia na ba dahu oho. 15 Lau ese na hamaoromui momokanimu, Hahemaoro Dinana* ai una siti ena hisihisi ese Sodom bona Gomora edia hisihisi baine hereaia.

16 “A kamonai! Lau ese na siaimuimu mamoe na heheto uda sisiadia bogaraḡidiai. Una dainai ba aonega gaigai heḡereḡeredia, bona ba manau pune heḡereḡeredia. 17 Nahuamui ba toho, badina taunimanima ese kota ai bae atomui bona edia sinagog* ai bae dadabamui. 18 Lau daiguai umui na gavana bona king vairadia bae hakaumui lao, unu amo emui abidadama na idia bona idau bese taudia ba hamaorolaidia. 19 To, idia vairadia e hakaumui laomu neganai, ba gwaurai herevadia daidiai basio lalohekwarahi, badina ba gwaurai herevadia na una nega ai be henimuimu. 20 Bona umui na sibomui basio herevamu, badina Tamamui ese ena siahu amo be durumuimu. 21 Ta ese tadikakana* na mase ai baine atoa, tama ese natuna taona baine tore, natu ese tamadia sinadia bae gwauedeede henidia bona bae aladia mase. 22 Lau ladagu dainai taunimanima iboudiai ese bae inai henimui, to baine haheauka ela bona dokona tauna na Dirava ese baine hamauria. 23 Siti ta ai e daḡedaḡe henimuimu neganai, siti ma ta ba heau lao. Badina lau ese na hamaoromui momokanimu, Israel ena siti iboudiai bona hanua iboudiai lalodiai emui haroro ḡaukara do asio haḡuḡurua ai, taunimanima Natuna na baine gini dae.

24 “Stiuden ese ena hahediba* na se hereaiamu, bona hesiai tauna ese biaguna na se hereaiamu. 25 Stiuden na ena hahediba ida baine heḡereḡere bona hesiai tauna na biaguna ida baine heḡereḡere, una na namo. Bema taunimanima ese ruma tauna bae gwauraia Belsebul,* ena ruma taudia danu unu bae gwauraidia toma, ani? 26 Una dainai garidia na basio gari, badina ḡau hehunidia na do bae hedinarai, bona hereva hehunidia na do bae dibadia. 27 Dibura ai lau ese na hamaorolaimuimu herevadia na diari ai ba gwaurai, bona taiamui ai na boi dobimu herevadia na ruma guhidia amo ba harorolai. 28 Tauani baine alaia diba, to mauri* basine hadikaia ore diba tauna garina na basio gari. To Gehena* ai mauri bona tauani baine hadikadia ore diba tauna hari garina ba gari. 29 Manu maraḡidia rua na koin maraḡina ta* amo e hoimu, ani? To bema idia ta tano ai be morumu, Tamamui na be dibamu. 30 Ia ese kwaramui huidia iboudiai na vada e duahi vaitani. 31 Una dainai basio gari, umui ese manu maraḡidia momo o hereadiamu.

32 “Bema ta na taunimanima vairadiai e gwaumu ia na mai dibana lau, lau danu Tamagu guba ai e nohomu vairanai baina gwau hedinarai lau na mai dibagu ia. 33 To lau e ḡoregumu tauna na lau ese danu Tamagu guba ai e nohomu vairanai baina ḡorea. 34 Basioto lau nama na tanobada ai maino na mailaia. Lau nama na, dia maino, a tuari kaiana na mailaia. 35 Badina lau na bese ihapararadia nama, mero ese tamana baine inai henia, kekeni ese sinana baine inai henia, bona eregabe hahinena ese ravana hahinena baine inai henia. 36 Oibe, tau ta inaina na iena bese korikori taudia. 37 Bema ta na tamana eiava sinana baine ura henia bada, a lau baine ura henigu maraḡi, ia na dia heḡereḡere egu disaipol ai bainela. Bona bema ta na natuna merona eiava kekenina baine ura henia bada, a lau baine ura henigu maraḡi, ia na dia heḡereḡere egu disaipol ai bainela. 38 Bona se uramu daḡedaḡe* baine haheaukalai bona lau murigu ai baine raka tauna na dia heḡereḡere egu disaipol ai bainela. 39 Ena mauri* e dogoataomu tauna ese ena mauri baine haboioa, bona lau daiguai ena mauri* e henimu tauna ese ena mauri baine abia lou.

40 “Umui e abimui daemu tauna ese lau danu e abigu daemu, bona lau e abigu daemu tauna ese e siaigu Tauna danu e abia daemu. 41 Bema ta ese peroveta tauna ta e abia daemu badina e dibamu una na peroveta tauna, ia ese peroveta tauna ahuna baine abia. Bona bema ta ese kara maoromaoro tauna ta e abia daemu badina e dibamu una tau na kara maoromaoro tauna, ia ese kara maoromaoro tauna ahuna baine abia. 42 Bona bema ta ese ini maraḡidia ta na ranu paraka baine henia badina una tau na disaipol, lau ese na hamaoromui momokanimu, ia ese ahuna na baine abia.”