Metiu ese E Torea
1 Ina buka na Iesu Keriso* ena mauri e sivarailaiamu, ia na David natuna, Abraham natuna:
2 Abraham be Isaak tamana;
Isaak be Jeikob tamana;
Jeikob be Juda mai tadikakana veridia ida tamadia;
3 Juda be Peres bona Sera tamadia, sinadia be Tamara;
Peres be Hesron tamana;
Hesron be Ram tamana;
4 Ram be Aminadab tamana;
Aminadab be Nason tamana;
Nason be Salmon tamana;
5 Salmon bona Rahaba natudia be Boas;
Boas bona Ruta natudia be Obed;
Obed be Jesi tamana;
6 Jesi be king David tamana.
David be Solomon tamana. Solomon sinana na guna Uraia e adavaia;
7 Solomon be Rehoboam tamana;
Rehoboam be Abaija tamana;
Abaija be Asa tamana;
8 Asa be Jehosafat tamana;
Jehosafat be Jehoram tamana;
Jehoram be Usaia tamana;
9 Usaia be Jotam tamana;
Jotam be Ahasa tamana;
Ahasa be Hesekia tamana;
10 Hesekia be Manase tamana;
Manase be Amon tamana;
Amon be Josaia tamana;
11 Josaia be Jekonia mai tadikakana veridia ida tamadia. Idia na Jew* taudia Babilon do se laohaidia negana ai e vara.
12 Babilon e laohaidia murinai, Jekonia natuna Sieltiel e vara;
Sieltiel be Serubabel tamana;
13 Serubabel be Abiud tamana;
Abiud be Eliakim tamana;
Eliakim be Asoro tamana;
14 Asoro be Sadok tamana;
Sadok be Akim tamana;
Akim be Eliud tamana;
15 Eliud be Eliasara tamana;
Eliasara be Matan tamana;
Matan be Jeikob tamana;
16 Jeikob be Josef tamana. Josef adavana Maria ese Iesu e havaraia, ia na Keriso ai ela.
17 Abraham ena nega amo ela David ena nega na uru iboudiai 14. David ena nega amo ela Jew taudia e laohaidia Babilon negana na uru iboudiai 14. Jew taudia e laohaidia Babilon negana amo ela bona Keriso ena nega na uru iboudiai 14.
18 Iesu Keriso ena vara dalana na ini bamona. Maria na Josef maohenina. To, idia raruosi na do asie headava lalonai, Dirava ena siahu* amo Maria na e rogorogo. 19 To, ia adavana Josef na kara maoromaoro tauna bona se ura taunimanima vairadiai Maria baine hahemaraia. Una dainai plen e kara, hehuni ai baine divosia. 20 Josef na unu ḡau e lalohadailai murinai e mahuta. Bena Iehova* ena aneru ta ese nihi lalonai e hereva henia, eto: “Josef, David natuna e, asio gari, to adavamu Maria na ba laohaia emu ruma, badina ia na Dirava ena siahu amo e rogorogo. 21 Ia ese mero ta baine havaraia, bona ladana ba hatoa Iesu,* badina be ia ese taunimanima na edia kara dika amo baine hamauridia.” 22 Unu ḡau iboudiai e vara karana amo Iehova* ese ena peroveta tauna amo e gwauraia herevana na e ḡuḡuru, eto: 23 “A kamonai! Haneulato* na baine rogorogo bona mero ta baine havaraia, bona ladana bae hatoa Imanuel,” anina na, “Dirava Na Ita Ida.”
24 Bena Josef na e noga bona Iehova* ena aneru ese e hamaoroa heḡereḡerena, Maria e adavaia.* 25 To ia na Maria ida se mahuta hebou ela bona Maria ese mero e havaraia, bona Josef ese ladana e hatoa Iesu.