Metiu ese E Torea
3 Gabeai, Jon Baptis na Judea tano ḡaḡaena* ai e haroro, 2 eto: “A helalokerehai, badina be guba Gavamanina vada eme kahirakahira.” 3 Jon na peroveta tauna Isaia ese ini e herevalaia toma, eto: “Gado ta tano ḡaḡaena ai e boimu, etomu: ‘Iehova* ena dala ba heḡaeḡaelaia bona ba lailaia.’” 4 Jon ena dabua na kamelo huina amo e karaia, bona gabana ai na leda beltana. Iena aniani na kwadi* bona hani. 5 Una nega ai, Jerusalem, Judea idoinai bona Joden Sinavaina badina hanuadia iboudiai amo, taunimanima na Jon dekena ela. 6 Bena ia ese idia na Joden Sinavaina ai e bapatisodia,* bona idia na edia dika e gwaurai hedinarai.
7 Jon ese Farisea* bona Sadukea taudia* hutuma e itadia e maiva neganai, e hereva henidia, eto: “Gaigai natudia e, daika ese e hamaoromui Dirava ena badu dinana amo ba heau mauri? 8 Una dainai, emui kara amo ba hahedinaraia umui na o helalokerehaimu. 9 Basioto, ‘Ai tamamai na Abraham.’ Badina be lau ese umui na hamaoromuimu Dirava ese ini nadi amo Abraham natuna baine havaradia diba. 10 Ira na au badidiai heato heḡaeḡae. Una dainai huahua namodia asie havaramu audia na bae utudia bena lahi lalonai bae taho vareai. 11 Lau be emui helalokerehai dainai ranu amo na bapatisomuimu, to lau murigu amo be maimu tauna ese lau na e hereagumu, bona lau na dia heḡereḡere iena sendol baina koki. Ia ese umui na lauma helaḡa bona lahi amo baine bapatisomui. 12 Ia imana ai na witi ihaḡoevana tuluna, bona witi haḡoeva gabuna ai witi baine haḡoeva. Bena witi na aniani habou gabuna ai baine habou, to witi momorudia na basine bodo diba lahina ai baine gabu.”
13 Iesu na Galile amo ela Joden Sinavaina, Jon ese baine bapatisoa totona. 14 To, Jon na se ura bona Iesu e hamaoroa, eto: “Dahaka dainai oi na lau dekegu oma? Oi ese hari lau ba bapatisogu.” 15 Iesu e haere, eto: “Basio kougu, badina be ina dala amo Dirava e uramu ḡaudia iboudiai baita kara diba.” Bena Jon ese ia na se koua. 16 Iesu e bapatiso, bena ranu amo e daeva lalonai guba na e parara, bona Jon ese e itaia Dirava ena lauma na pune na heto, e diho Iesu latanai. 17 Bena gado ta na guba amo eto: “Ina na lau Natugu, egu lalokau, lau ese ia na na lalonamo heniamu.”*