Metiu ese E Torea

21 Idia na Jerusalem e laova bona Betfeji ai e kau, Olive Ororona badinai, bena Iesu ese ena disaipol rarua e hamaorodia, 2 eto: “Vairada hanuana ai ba vareai bena doniki ta mai natuna ida bo itadiamu varo amo e kwatudia. Ba ruhadia bona ba mailaidia dekegu. 3 A ta ese e nanadaimuimu neganai, baoto: ‘Lohiabada ese e ura henidiamu.’ Bena baine siaidia haraḡa.”

4 Ina e vara badina na peroveta tauna ese e gwauraia herevana baine ḡuḡuru, ia na eto: 5 “Siona natuna kekenina ba hamaoroa: ‘A itaia! Emu king na mai manauna ida oi e mai henimumu, doniki latanai e helai, oibe, doniki natuna latanai.’”

6 Bena unu disaipol raruosi na ela bona Iesu ese e hadibadia heḡereḡerena ai e kara. 7 Idia ese doniki na mai natuna ida e mailaidia bona edia dabua na dorudia ai e ato bena Iesu e helai kau. 8 Bena hutuma amo momo ese edia dabua na dala ai e laha, a haida be au raudia e utu bena dala ai e ato. 9 Hutuma na ia vairanai bona murinai e raka bona e lolova e gwauva: “A noinoimu, David Natuna ba hamauria! Iehova* ladana ai e maimu tauna a hanamoa. Atai herea ai o nohomu Diravana e, a noinoimu, ba hamauria!”

10 Bona Jerusalem ai e vareai neganai, una gabu taudia iboudiai na e heloḡo-heloḡova, e gwauva: “Ina be daika?” 11 To hutuma na dounu e gwauva: “Ina na peroveta tauna Iesu, Nasaret Galile amo.”

12 Iesu na tempol ai e vareai bona hoihoi taudia iboudiai e luludia lasi, moni e sensiva taudia edia pata bona pune e hoihoilaiva taudia edia helai ḡaudia danu e haketodia. 13 Bona ia ese e hamaorodia, eto: “Vada e torea, ‘Egu ruma na bae gwauraia ḡuriḡuri rumana,’ to umui ese henaohenao taudia edia ruma ai o halaoamu.” 14 Ia na dounu tempol ai lalonai, mata kepulu bona ae dika taudia na ia dekena ema bona ia ese e hanamodia.

15 Prist igunalaidia taudia* bona itorena taudia* na tempol lalonai Iesu ena hoa karadia e ita bona memero na e lolova, e gwauva: “A noinoimu, David Natuna ba hamauria!” neganai, idia na se moale, 16 bona e nanadaia, eto: “Edia hereva be o kamonaimu?” Iesu e haere, eto: “Oibe. To umui ese ina hereva be asio duahia? ‘Natu maraḡidia bona rata e inumu beibidia ududia amo bae hanamomu.’” 17 Bena ia na Jerusalem e rakatania bona ela Betani, unuseniai eha mahuta.

18 Daba matana ai, ia na Jerusalem e lou laova lalonai e hitoloa. 19 Bena dala badinai fig auna ta e itaia bona e lao henia, to huahuana ta se davaria, rauna mo. Bena ia ese fig auna e gwau henia, eto: “Hari amo ela hanaihanai, huahuamu ta basine vara.” Bena maoromaoro fig auna na e kakoro. 20 Ena disaipol ese una e itaia neganai, idia na e hoa bona e gwa: “Dahaka dainai ina fig auna na haraḡa herea eme kakoro?” 21 Iesu ese e haere henidia, eto: “Na hamaoromui momokanimu, bema umui na mai emui abidadama bona so daradaramu, ina fig auna name kara henia heḡereḡerena mo basio karamu, to bema ina ororo bo hamaoroamu: ‘A heabi isi bona davara ai ba henege dobi,’ una na be varamu. 22 Bona mai emui abidadama ida ḡuriḡuri amo bo noimu ḡaudia iboudiai na bo davarimu.”

23 Iesu tempol ai e vareai murinai, ia na e hahedibava bena prist igunalaidia taudia bona tau badadia na ia dekena ema bona, eto: “Edena siahu amo ini ḡau o karamu? Bona daika ese siahu e henimu?” 24 A Iesu ese e haere henidia, eto: “Lau danu umui emui ai ḡau ta do baina henanadailaia. Bema ba haere, vada lau ese ini ḡau na karamu siahudia danu baina hamaorolaimui. 25 Jon be daika ese e siaia taunimanima baine bapatisodia? Guba ai e nohomu Diravana eiava taunimanima?” To idia na sibodia e herevava, e gwauva: “Bema baita gwaumu, ‘Dirava,’* ia na be gwaumu, ‘O dahaka dainai ia na so abidadama heniamu?’ 26 To bema baita gwaumu, ‘Taunimanima,’ hutuma ese vada ede be kara henida tomamu? Badina idia na e laloamu Jon na peroveta tauna.” 27 Una dainai idia na Iesu e haere henia, eto: “Asi dibamai.” Bena Iesu eto: “Lau ese danu, ini ḡau na karamu siahudia na basina hamaorolaimuimu.

28 “Emui lalohadai be dahaka? Tau ta natuna na rarua, bena ia ese roboana e hamaoroa, ‘Natugu, hari dina na vine umana ai ba ha ḡaukara.’ 29 Ia eto: ‘Lau na asina uramu,’ to gabeai lalona e haidaua bena ela. 30 Ia ese natuna iharuana danu una hereva tamona e hamaoroa, a ia ese tamana e hamaoroa, eto: ‘Bainala,’ to sela. 31 Idia raruosi amo, daika be tamana ena ura e karaia?” Idia eto: “Natuna roboana.” Iesu ese e hamaorodia, eto: “Lau ese na hamaoromui momokanimu tax gogo taudia bona matabodaḡa* hahinedia na bae vareai guna Dirava ena Gavamani lalonai. 32 Badina Jon na dekemui ema bona kara maoromaoro dalana e hadibalaimui, to asio kamonai. A tax gogo taudia bona matabodaḡa hahinedia be e kamonai. Umui be o itaia to asio helalokerehai bona asio kamonai.

33 “Haheitalai ma ta mani a kamonaia: Tau ta e nohova. Ia na tano biaguna. Ena tano ai vine umana ta e karaia bona e maḡua ahu. Ia na wain imoina gabuna* danu e ḡeia bona kohoro ta e haginia, bena biru taudia imadia ai e atoa bae naria, bona ia na gabu daudauna ela. 34 Huahua igogodia negana vada e kau, ia ese ena hesiai taudia na biru taudia dekedia e siaidia lao, vine huahuana bae gogoa. 35 To biru taudia ese unu hesiai taudia na e dabaidia tao, ta e dadabaia, ma ta e alaia mase, bona ta be nadi amo e hodoa. 36 Bena hesiai taudia ma haida e siaidia, idia na momo dia orea ginigunana heḡereḡerena, to idia danu unu e kara henidia toma. 37 Dokonai ia ese natuna e siaia, badina e lalova, ‘Idia ese natugu na be matauraiamu.’ 38 A biru taudia ese natuna merona e itaia neganai, sibodia e hereva heheni, eto: ‘Uma be biaguamu tauna bina, aoma, baitame alaia bena ena kohu baita abi.’ 39 Bena e dabaia tao, vine umana murimurinai e veria lasi bona e alaia mase. 40 Una dainai uma biaguna be maimu neganai, biru taudia ediai be dahaka be karamu?” 41 Prist igunalaidia taudia bona tau badadia na eto: “Edia kara dika daidiai, ia ese baine aladia mase bona vine umana na biru taudia ma haida baine henidia, bena huahuadia igogodia negana ai idia ese huahuadia na ia* bae henia.”

42 Iesu ese e hamaorodia, eto: “Toretore Helaḡadia ai asio duahia, a? Eto: ‘Ruma ihaginina taudia ese e dadaraia nadina na ruma ena kona nadina badana* ai vada ela. Una nadi na Iehova* ena amo ema bona ita matada ai una na namo herea.’ 43 Una dainai lau ese na hamaoromuimu, Dirava ese ena Gavamani na emui amo baine kokia bona huahuana e havaramu taudia baine henidia. 44 Danu, una nadi latanai baine moru tauna na dika bada herea be davarimu. Bona una nadi na tau ta latanai be morumu neganai, una tau na be hapataiamu.”

45 Prist igunalaidia taudia bona Farisea taudia* na una haheitalai e kamonai neganai, e laloparara ia na idia e herevalaidiava. 46 Ena be idia na e urava ia bae dogoa,* to hutuma garidia e gariva badina hutuma na e laloava ia na peroveta tauna ta.