Metiu ese E Torea

26 Iesu na unu hereva e gwaurai murinai, ena disaipol e hamaorodia, eto: 2 “Umui na mai dibamui dina rua muridiai Pasova* ariana baita karaiamu, bona taunimanima Natuna na inaina imadia ai bae atoa bena satauro* ai bae hamasea.”

3 Una nega ai prist igunalaidia taudia* bona hanua tau badadia na prist badana* Kaiafas ena ruma ariarana ai e hegogo, 4 bona e herevahereva, koikoi dalana ai Iesu bae dogoa* bona bae hamasea. 5 To, idia na e gwauva: “Dia aria dinana ai, taunimanima bae heloḡo na garina.”

6 Iesu na Betani ai, Saimon, lepera tauna ena ruma ai, 7 bena hahine ta na ia dekena ela imana ai na kavabu ta, lalonai na oela mai bonana namo hereana, dava bada ḡauna. Iesu e anianiva* lalonai una hahine ese oela na ia kwarana ai e bubuava. 8 Iesu ena disaipol ese e itaia neganai, se moale dainai eto: “Dahaka dainai ina oela e haorea kavamu? 9 Bema hoihoilaia moni momo bema abi, bena ogoḡami taudia bema henidia.” 10 Iesu na mai dibana dainai, e hamaorodia, eto: “Dahaka dainai ina hahine na unu o herevalaia tomamu? Ia ese lau egu ai kara namona eme hahedinaraia. 11 Ogoḡami taudia be hanaihanai umui ida o nohomu, to lau be umui ida basina noho hanaihanaimu. 12 Ina oela amo taugu vada eme dahua heḡaeḡae, igurigu totona. 13 Lau ese na hamaoromui momokanimu, tanobada heḡeḡemadai, ina sivarai namona bae harorolaia gabudia ai, ina hahine ese eme karaia karana danu bae gwauraia, unu amo ia bae laloatao.”

14 Bena apostol taudia 12 amo, ta ladana na Judas Iskariot, na prist igunalaidia taudia dekedia ela 15 bona e gwa: “Bema ia na imamui ai ba atoamu, lau be dahaka bo henigumu?” Bena idia na e gwauhamata silva monidia 30 bae henia. 16 Una nega amo ia ese taona itorena negana namona e tahuava.

17 Asie Hatubua Paraona Ariana dinana ginigunana ai, disaipol na Iesu dekena ela, bena eto: “Oi be o uramu Pasova ariana be edeseniai baia heḡaeḡaelaia?” 18 Ia eto: “Aola siti lalonai ba vareai, tau ta ba davaria, bena ba hamaoroa baoto, ‘Hahediba tauna na e gwaumu: “Egu mase negana na vada kahirakahira, egu disaipol ida Pasova ariana na emu ruma ai baia karaia.”’” 19 Bena disaipol na Iesu ena hereva heḡereḡerena ai e kara bona idia ese Pasova ariana e heḡaeḡaelaia.

20 Dina e diho ai, Iesu na ena disaipol 12 ida teibol badinai e helai. 21 Idia na e anianiva lalonai, ia eto: “Lau ese na hamaoromui momokanimu, umui ta ese taogu baine torea.” 22 Lalodia na e hisihisi bada herea dainai, ta ta e gwauva: “Lohiabada e, una be lau?” 23 Ia e haere, eto: “Lau ida disi tamona ai a dau dobimu tauna ese taogu baine torea. 24 Momokani, taunimanima Natuna na be laomu, Toretore Helaḡadia heḡereḡerena, to taunimanima Natuna taona baine tore tauna madi ihabaina! Una tau na basinema vara hari namo.” 25 Judas, ia taona baine torea tauna na eto: “Hahediba Tauna* e, una be lau?” Iesu eto: “Haerena be vada mai dibamu.”

26 Idia na e anianiva lalonai Iesu ese parao e abia, bona e hanamoa murinai, e bitua, bona ena disaipol e henidia bena eto: “Avabia, avania. Ina na lau taugu e laulaulaiamu.” 27 Kapusi ta e abia, e hanamoa, e henidia, eto: “Iboumui ai a inu, 28 badina ina na lau raragu e laulaulaiamu, ‘herohemaino rarana,’ hutuma daidiai baine hebubu, dika igwautaona. 29 To lau ese na hamaoromuimu, vine ranuna do basina inua lou, ela bona dinana baine kau lau na umui ida matamatana baita inua, Tamagu ena Gavamani lalonai.” 30 Idia na ane* e abi murinai, Olive Ororona ela.

31 Bena Iesu ese e hamaorodia, eto: “Ina hanuaboi, umui iboumui ai na lau daiguai bo hekwakwanaimu, badina be vada e torea: ‘Lau ese mamoe ireḡudia tauna baina gwadaia bena mamoe na bae karoho.’ 32 To lau baina toreisi lou murinai, Galile bainala guna, bona unuseniai umui baina narimui.” 33 To Pita eto: “Ena be haida na oi daimu ai bae hekwakwanai, to lau na lasi.” 34 Iesu ese e hamaoroa, eto: “Na hamaoromu momokanimu, hari hanuaboi, kokoroku do basine tai, oi ese nega toi lau ba ḡoregu.” 35 A Pita eto: “Ena be oi ida baita mase hebou, to lau ese oi na basina ḡoremu.” Disaipol iboudiai danu unu e gwau toma.

36 Bena Iesu na ena disaipol ida gabu ta ladana Getsemane ema, bona e hamaorodia, eto: “Ini kahai ba helai a lau be unu kaha bainala, baina ha ḡuriḡuri.” 37 Ia ese Pita bona Sebedi natuna memerodia raruosi e laohaidia. Una nega ai e lalohisihisi bona lalona na e hekwarahi bada herea. 38 Bena ia ese e hamaorodia, eto: “Lau* lalogu na e hisihisi bada hereamu, mokona ba masemu. Iniseniai ba noho, baita gima.” 39 Taina ma e raka lao, bena tano ai e goru diho, e ḡuriḡuri, eto: “Tamagu e, bema mai dalana ina kapusi na egu amo boma abia oho; to dia lauegu ura, oiemu ura hari.”

40 Ia na ena disaipol dekedia e lou lao neganai, e itadia idia na mamahuta. Bena ia ese Pita e hamaoroa, eto: “Umui be lau ida hora tamona basita gima diba, a? 41 Hanaihanai ba gima bona ba ḡuriḡuri, unu amo hedibaḡani ai basio vareai. Momokani, lalo na e uramu, a tauani na e manokamu.” 42 Nega iharuana ma ela, e ḡuriḡuri, eto: “Tamagu e, bema ina kapusi iabi-ohona na asi dalana, to baina inua, vada emu ura na baine vara.” 43 Ma e lou mai bena mahutadiai e davaridia, badina be matadia e mahutava. 44 Una dainai e rakatanidia, bona ela nega ihatoina eha ḡuriḡuri, hereva tamodia ma e gwaurai. 45 Bena ia na ena disaipol dekedia ela bona e hamaorodia, eto: “Dahaka dainai ina mai anina bada negana ai, o mahutamu bona o laḡa-animu? A kamonai! Taunimanima Natuna na kara dika taudia imadia ai taona bae torea negana na vada kahirakahira. 46 A tore isi, aitala. A itaia! Taogu itorena tauna na vada e maimu.” 47 Ia dounu e herevava lalonai, a itaia! Apostol taudia 12 tauna ta, Judas na hutuma ida mai tuari kaiadia bona audia ida ema. Idia na prist igunalaidia taudia bona hanua tau badadia ese e siaidia.

48 Bena taona baine torea tauna ese toa ta e henidia, eto: “Baina harahua tauna, tauna bunai, ba dogoa.” 49 Bena maoromaoro ia na Iesu dekena ela bona e gwa: “Hahediba Tauna e! Hanuaboi namona.” Bena e harahua. 50 Iesu ese e hereva henia, eto: “Oi oma be dahaka ba kara?” Bona idia ese Iesu e dogoa, bena e laohaia. 51 To a itaia! Iesu ena orea tauna ta na e dau dobi, ena tuari kaiana e veria lasi, bena prist badana ena hesiai tauna taiana e utua oho. 52 Bena Iesu ese e hamaoroa, eto: “Emu tuari kaiana na gabuna ai avatoa, badina be tuari kaiadia e abimu taudia iboudiai na tuari kaiadia amo do bae mase. 53 O laloamu lau ese Tamagu basina noia diba, ina hora ai aneru tausen momo* baine siaidia, a? 54 To bema unu ba kara tomamu, Dirava ena hereva Toretore Helaḡadia ai be ede bae ḡuḡuru toma?” 55 Una nega ai Iesu ese hutuma e hereva henidia, eto: “Umui na mai tuari kaiamui bona mai aumui ida lau idogotaogu oma, henaohenao tauna idogotaona boma mai na heto. Lau be dina iboudiai tempol ai na helaiva bona na hahedibava, to umui ese asio dogogutao. 56 To unu iboudiai na e vara, peroveta taudia edia toretore herevadia bae ḡuḡuru totona.” Bena ena disaipol iboudiai ese e heautania.

57 Iesu e dogoa taudia ese ia na prist badana Kaiafas dekena e laohaia, itorena taudia* bona hanua tau badadia na unuseniai e hegogo. 58 A Pita ese e ḡavaia, to mai padana, ela bona prist badana ena ruma ariarana lalonai e raka vareai, bena hesiai taudia ida e helai hebou, baine vara ḡauna baine itaia helaoreana.

59 Prist igunalaidia taudia bona Sanhedrin* taudia iboudiai ese hahebade koikoi taudia e tahudia malaka-malaka, e urava Iesu ialana badina bae davaria. 60 Ena be hahebade koikoi taudia momo ema, to ta asie davaria. Gabeai rarua ma ema 61 bona e gwa: “Ina tau na e gwa, ‘Lau ese Dirava ena tempol na baina rohoa, bena dina toi lalodiai ma baina haginia diba.’” 62 Bena prist badana e tore isi, e nanadaia, eto: “Oi asi emu hereva, a? Ini edia hahebade herevadia o kamonaimu, a?” 63 To Iesu na ḡau ta se gwauraia. Una dainai prist badana na ia e hereva henia, e gwa: “Mauri Diravana ladana ai na haḡanimumu a hamaoromai, oi be Keriso, Dirava Natuna, a?” 64 Iesu e haere, eto: “Oi sibomu ese vada ovasi gwauraia. To lau ese na hamaoromuimu: Hari amo bainela, umui ese taunimanima Natuna do ba itaia, Siahu Diravana imana idibana* kahana ai baine helai, bona guba oridia ai bainema.” 65 Bena prist badana na sibona ena dabua e darea, eto: “Dirava ihadikana herevana vada e gwauraiamu, ma dahaka hahebadena ta tahuamu? Ome kamonai! Ia na Dirava ihadikana herevana vada eme gwauraia. 66 Emui lalohadai be dahaka?” Idia e haere, eto: “Ia baine mase na maoro.” 67 Bena idia ese ia vairana e kanudia, bona e paisia. A haida ese vairana e pataia, 68 bena eto: “Keriso e, bema oi na peroveta tauna, vada a hamaoromai, daika ese e dadabamumu?”

69 Pita na murimuri ai, ruma ariarana ai helai, bena hesiai kekenina ta na ia dekena ela, eto: “Oi danu, Galile tauna, Iesu o bamoava, ani?” 70 To, ia na iboudiai vairadiai e heḡore, eto: “Asina lalopararamu oi be dahaka o gwauraimu.” 71 Bena Pita na e raka oho, geidi kahana ela neganai, ma kekeni ta ese e itaia, bena una kekeni ese unuseniai nohodia e hamaorodia, eto: “Ina tau danu, Iesu, Nasaret Tauna* e bamoava.” 72 Bena ia na e hereva auka bona e heḡore lou, eto: “Una tau na asi dibagu.” 73 Bena nega taina e ore murinai, unuseniai ginidia na Pita dekena ela bena eto: “Momokani, oi na idia ta, badina be emu hereva dalana* ese e hahedinaraiamu.” 74 A Pita na e gwau dika bona e gwauhamata, eto: “Una tau na asi dibagu.” Bena haraḡa herea kokoroku na e tai. 75 Bena ia na Iesu ese e gwauraia herevana e laloatao, eto: “Kokoroku do basine tai, oi ese nega toi ba ḡoregu.” Bena e raka lasi, e tai dikadika.