Metiu ese E Torea

27 Daba e rere neganai, prist igunalaidia taudia* bona hanua tau badadia iboudiai na e henega bou, Iesu bae alaia totona. 2 Idia ese imana e ḡuia murinai, e hakaua lao, gavana Pilato, e henia.

3 Bena Judas, Iesu taona e torea tauna, na Iesu bae hamasea herevana e kamonai neganai, ena hemami na e dika herea, bona silva monidia 30 na prist igunalaidia taudia bona hanua tau badadia e henidia lou, 4 bona eto: “Vada na kara dika, badina be asi ena kerere tauna* taona vada na torea.” Idia eto: “Una na dia ai ese baia lalohekwarahilaia ḡauna.” 5 Bena Judas ese unu silva monidia na tempol ai e taho vareai, bona ela sibona eha hemata. 6 A prist igunalaidia taudia ese hari silva monidia e abi, bona eto: “Dia maoro tempol ai moni e atomu gabuna ai baita uda, badina be ina na rara davana.” 7 E herevahereva murinai, uro ikarana tauna ena tano e hoilaia, idau bese taudia iguridia gabuna ai e halaoa. 8 Una dainai, una tano ladana e hatoa “Rara Tanona” ema bona hari. 9 Una nega ai, peroveta tauna Jeremaia ena amo e gwauraia herevana na e momokani, eto: “Bona idia na silva monidia 30 e abi, una tau davana, Israel taudia haida ese e gwauraia heḡereḡerena, 10 bena e heni uro ikarana tauna ena tano e hoilaia, Iehova* ese lau e haḡanigu heḡereḡerena.”

11 Iesu na gavana vairanai e gini, bena gavana ese e nanadaia, eto: “Oi be Jew taudia edia King?” Iesu eto: “Oi sibomu ese ome gwauraia.” 12 To prist igunalaidia taudia bona hanua tau badadia ese e habadelaia koikoiva neganai, ia na se herevava. 13 Bena Pilato ese e hamaoroa, eto: “Hahebade herevadia momo e gwauraimu be so kamonaimu, a?” 14 To ia na se haere bona hereva ta se gwauraia, una dainai gavana na e hoa.

15 Pasova* negadia ta ta ai, gavana na vaia ena kara dibura tauna ta e ruhaiava, hutuma ese e abia hidiva tauna. 16 Una nega ai, tau dika hereana ta ladana Baraba na dibura ai e nohova. 17 Una dainai idia e hebou neganai, Pilato ese e nanadaidia, eto: “Umui be o uramu daika baina ruhaia, Baraba eiava Iesu, e gwauraiamu Keriso?” 18 Badina be Pilato dibana idia na e mama dainai taona e torea. 19 Danu, ia na ena diadi seana ai helaina ai, adavana na hereva e siai, eto: “Ena kara maoromaoro tauna enai ḡau ta basio karaia, badina be hari dina ai vada na nihi, egu nihi ai hisi badana ese e hadikagu ia dainai.” 20 To prist igunalaidia taudia bona hanua tau badadia ese hutuma lalodia e veri Pilato bae noia, Baraba baine ruhaia, a Iesu be baine hamasea. 21 A Pilato eto: “Umui be o uramu idia raruosi amo daika baina ruhaia?” Idia eto: “Baraba.” 22 Pilato ma eto: “O Iesu, e gwauraiamu Keriso, enai be dahaka baina kara?” Iboudiai e gwa: “Satauro* ai ba hamasea!” 23 To ia eto: “Dahaka dainai? Ia be dahaka kerere e kara?” Idia na dounu e lolova, e gwauva: “Satauro ai ba hamasea!”

24 Pilato na e ita, una ese ḡau namona ta se havaraia, a idia na edia boi reḡena e habadaiava dainai, ia na ranu e abia, hutuma vairadiai imana e huri, bena eto: “Ina tau enai lau na asi egu kerere. Una na umui sibomui emui metau.” 25 Una nega ai, taunimanima iboudiai na e gwa: “Ia rarana na ai bona natumai latadiai.” 26 Bena ia ese Baraba e ruhaia nege, a Iesu e dadabaia, bena e henidia, satauro ai bae hamasea.

27 Bena gavana ena tuari taudia ese Iesu e hakaua lao, gavana ena ruma ariarana lalonai, bena edia orea taudia iboudiai ia dekenai e haboudia. 28 Bena idia ese Iesu ena dabua e kokia bona dabua kakakakana ta e hakaralaia, 29 bona au mai hegwada-hegwadana amo kraun ta e karaia, bena kwarana ai e atoa; siriho heḡereḡerena auna ta danu imana idibana* ai e atoa.* Bena ia vairanai tuidia e hadai, bona hekirikirilai dalana ai e hamaoroa, eto: “Dina namona, Jew edia King e!” 30 Bena e kanudia bona hari siriho auna e abia, kwarana e kwadia. 31 Idia ese e hevasehalaia murinai, dabua kakakakana e kokia oho, ena dabua korikorina ma e hakaralaia. Bena e hakaua lao, satauro ai bae kokoa kau.

32 E raka lasiva ai, Sairini tauna ta e davaria, ladana na Saimon, bena e haḡania, Iesu ena hisihisi auna* baine huaia. 33 Bena gabu ta ai e lasi, ladana na Golgota, anina na kwara koukouna. 34 Unuseniai, idia ese tubutubu ḡaudia mai iditadia* ida e miksia wainina e henia, to Iesu ese e mamia toho murinai, se ura baine inua. 35 Satauro ai e kokoa kau murinai, ena dabua na gadara ḡauna ta* amo e hari, 36 bena e helai diho bona ia e gimaia. 37 Danu idia ese ia e samania herevana na ia kwarana daenai ini e torea toma: “Ina na Iesu, Jew edia King.”

38 Henaohenao taudia rarua na ia badinai e kokodia kau, ta idibana kahanai, ta laurina* kahanai. 39 Bona e raka hanaiva taudia na ia e gwauraia dikava bona kwaradia e taiko-taikova, 40 e gwauva: “E, vanegai be o gwauva tempol ba rohoa bena dina toi muridiai ma ba haginia lou, sibomu a hahemauri! Bema oi na Dirava natuna, hisihisi auna* amo a diho!” 41 Prist igunalaidia taudia, itorena taudia* bona hanua tau badadia danu ia e kirikirilaia matama, eto: 42 “Haida be e hamauridia a sibona be se hahemaurimu! Ia na Israel edia King, hisihisi auna* amo aine diho, bena baita abidadama henia. 43 Ia na Dirava e abidadama heniamu dainai, bema Dirava na e uramu baine durua, vada aine hamauria, badina ia na eto: ‘Lau na Dirava Natuna.’” 44 Ia badinai e kokodia kau henaohenao taudia raruosi ese danu ia na e gwau dika heniava.

45 Dina tubua 12 oklok* amo ela bona adorahi 3 oklok,* gabu ibounai na e dibura. 46 Adorahi 3 oklok heḡereḡerena ai, Iesu na e lolo, eto: “Eli, Eli, lama sabaktani?” Anina na, “Egu Dirava e, egu Dirava e, dahaka dainai ome rakatanigu?” 47 Unuseniai e gini taudia haida na una e kamonaia neganai, eto: “Ia na Elia e boiriamu.” 48 Bena idia ta na maoromaoro e heau ela spansi ta e abia, wain iditana lalonai e urua diho, bona siriho ta ai e atoa kau bena e henia baine inua. 49 A haida na e gwa: “A rakatania! Mani baita itaia Elia ese beme hamauriamu eiava.” 50 Iesu na ma e lolo badabada bena e mase.*

51 Bena tempol ketinina na e hedare parara, atai amo ela bona henu, tano e marere bena nadi e parara. 52 Bona gara* e hekeho, bena guna e mase helaḡa taudia* momo tauanidia* na e hedinarai, 53 bona momo ese unu na e ita. (Iesu e toreisi lou murinai, taunimanima na gara* e rakatani, bena siti helaḡana ai e vareai.) 54 To tuari biaguna bona Iesu e gimaia taudia na tano mareremarere bona e vara ḡaudia e ita neganai, e gari dikadika bona e gwa: “Momokani ina na Dirava Natuna.”

55 Bona hahine momo na daudauna amo e varava ḡaudia e itava. Idia na Iesu Galile e rakatania negana amo ia e bamoa, isiaina bae lao heni dainai. 56 Idia haida na Maria hane Magdala, bona Maria, Jeims Joses ida sinadia, bona Jeims Jon ida sinadia,* ia na Sebedi adavana.

57 Dina na kahirakahira baine diho ai, Arimatea amo taḡa tauna ta ema, ladana na Josef, ia danu Iesu ena disaipol ta ai ela. 58 Ia na Pilato dekena ela bona Iesu tauanina baine abia eto, bena Pilato na e haheḡani bae henia. 59 Josef ese Iesu tauanina e abia dobi, dabua ḡoevana bona namo hereana amo e kumia, 60 bena gara* matamatana ai e atoa. Una na Josef ese nadi kohuana ta lalonai e karaia garana. Bena gara iduarana na nadi badana ta amo e koua* ahu, bena e raka oho. 61 To Maria hane Magdala bona Jeims Joses ida sinadia Maria, na dounu gara vairanai hehelai.

62 Heḡaeḡae* dinana murina dinana ai, Sabati dinana ai, prist igunalaidia taudia bona Farisea taudia na Pilato vairanai e hebou, 63 bena eto: “Gavana e, ai na ame lalo lou, una koikoi tauna na maurina ai e hereva, eto: ‘Dina toi muridiai, lau na baina toreisi lou.’ 64 Una dainai, mani ba haheḡani, gara bae gimaia namonamo ela bona dina ihatoina; ena disaipol baela, tauanina bae henaoa, bena taunimanima bae koidia, baeto: ‘Ia na mase amo vada e toreisi lou,’ na garina. Unu bema heto, koikoi gabena ese koikoi gunana bema hereaia.” 65 Pilato ese e hamaorodia, eto: “Tuari taudia haida avabidia, gara bae ha gimaia namonamo.” 66 Una dainai idia na ela, gara bae koua namonamo totona, ikouna nadina aukana e atoa bona gima taudia e atodia.