Metiu ese E Torea
2 Herod* na king neganai, Iesu na Betelehem, Judea ai e vara. Una murinai astroloji taudia* na East kahana amo ema Jerusalem. 2 Bena idia na e henanadai, eto: “Jew* edia king ai bainela merona be edeseniai? Badina be iena hisiu na ai East kahana ai nohomai ai a itaia, bona ai na ama ia vairanai emai hemataurai karana baia hahedinaraia.”* 3 King Herod bona Jerusalem taudia iboudiai ese una hereva e kamonai neganai, e gari. 4 Bena ia ese prist igunalaidia taudia* bona itorena taudia* iboudiai e haboudia, bona Keriso* baine vara gabuna e henanadailaia. 5 Bena idia na e haere, eto: “Betelehem, Judea ai, badina be peroveta tauna ese ini e torea toma: 6 ‘Bona Betelehem e, oi na Juda tanona ai o nohomu. Juda gavanadia ediai oi na dia siti maraḡina, badina be oiemu amo hegunalai tauna ta bainema bona ia ese egu taunimanima Israel baine lohiadia.’”
7 Bena Herod ese astroloji taudia e boiridia hehuni, hisiu e hedinarai negana baine diba totona. 8 Bena Betelehem e siaidia lao neganai, e gwa: “Aola, hari mero ba ha tahua, bona o davariamu neganai baoma bame hadibagu, unu amo lau danu bainala ia vairanai egu hemataurai karana baina hahedinaraia.”* 9 Idia na king ena hereva e kamonai murinai vada ela, bena East kahana ai e itaia hisiuna ese e gunalaidia ela bona hisiu na mero ena noho gabuna daenai e stopu. 10 Idia na una hisiu e itaia neganai, e moale hisi dae. 11 Bona idia na ruma ai e raka vareai neganai, mero na sinana Maria ida e itadia, bena edia hemataurai karana e hahedinaraia.* Danu, idia ese harihari ḡaudia, golo bona pauda mai bonadia namodia rua* e heni. 12 To, Dirava ese nihi ta amo e haḡanidia Herod dekena na basie lou lao, una dainai idia na dala ma ta amo edia hanua ela.
13 Idia ela murinai, Iehova* ena aneru ta na nihi ai Josef enai e hedinarai, bona eto: “A tore isi, mero sinana ida avabidia bena ba heaulaidia lao Egypt, bona unuseniai ba noho ela bona lau ese baina hamaoromu negana ai, Egypt ba rakatania. Badina be Herod na mero e tahuamu, e uramu baine alaia.” 14 Una dainai, una hanuaboi ai Josef na e tore isi mero sinana ida e abidia bena ela Egypt. 15 Idia na unuseniai e noho ela bona Herod e mase. Unu amo Iehova ese ena peroveta tauna amo e gwauraia herevana e ḡuḡuru, eto: “Lau ese Egypt amo natugu na boiria.”
16 Herod na e diba astroloji taudia ese ia na e koia dainai e badu dikadika. Bena ia ese haida e siaidia Betelehem bona badina hanuadia iboudiai lalodiai, laḡanidia rua amo e diho memerodia iboudiai bae aladia mase, una na astroloji taudia ese ia e hamaoroa negana heḡereḡerena. 17 Unu amo Dirava ese peroveta tauna Jeremaia ena amo e gwauraia herevana e ḡuḡuru, eto: 18 “Rama ai gado ta e kamonaia, e tai lolololova. Una na Rahela, natuna daidiai e taiva, bona se ura ta ese tauna baine haloa, badina be natuna vada lasihidia.”
19 Herod e mase murinai, Egypt ai Iehova ena aneru ta na nihi amo Josef enai e hedinarai, 20 bena eto: “A tore isi, mero sinana ida avabidia bona Israel tanona baola, badina be e uramu mero bae alaia taudia na vada e mase.” 21 Una dainai Josef na e tore isi, mero sinana ida e abidia bena Israel tanona ela. 22 To ia na e kamonai Akelaos na tamana Herod gabuna ai Judea e lohiaiava dainai, unu bainela na e gari. Danu, Dirava ese nihi ma ta amo e haḡania unu na basinela, una dainai ia na Galile ela. 23 Bona siti ta ladana Nasaret ai e noho, unu amo peroveta taudia ese e gwauraia herevana na e ḡuḡuru, eto: “Ia na bae gwauraia Nasaret Tauna.”*