Metiu ese E Torea
28 Sabati murina dinana ai,* daba matana ai, Maria, hane Magdala, na Maria ta ida, gara itana ela.
2 A itaia! tano mareremarere badana ta e vara, badina Iehova* ena aneru na guba amo e diho, gara nadina e kurea oho, bena latanai e helai kau. 3 Ia na e diaridiariva, kevaru* na heto, bona ena dabua na kuroka-kuroka, snou na heto. 4 Gima taudia na ia garina e gari dainai, taudia e heude-heude bona e mase na heto.*
5 To aneru ese unu hahine e hereva henidia, eto: “Asio gari, badina mai dibagu umui na e hasatauroa* tauna, Iesu, o tahuamu. 6 Ia na dia iniseniai, badina be vada e toreisi lou, ena hereva heḡereḡerena. Aoma, ia e kurea gabuna ame itaia. 7 Bena baola haraḡa, ena disaipol ba hamaorodia, ia na mase amo vada e toreisi lou, bona Galile e laomu. Ia na unuseniai bo ha itaiamu. Ini name hamaoromui herevadia na ba lalotao.”
8 Una dainai idia na haraḡa herea gara* gabuna e rakatania, mai garidia bona mai moaledia ida e heau ela, ena disaipol bae hadibadia. 9 To, una neganai Iesu na idia ediai e hedinarai bona eto: “Dina namona!” A idia na Iesu dekena ela, e igo diho,* bona aena palapaladia e dogo tao. 10 Bena Iesu ese e hamaorodia, eto: “Asio gari! Aola, tadikakagu* ba hamaorodia, unu amo idia na Galile baela, unuseniai lau bae ha itagu.”
11 Idia e laova ai, gadi taudia haida na siti ela bena e vara ḡaudia iboudiai na prist igunalaidia taudia* e hamaorolaidia. 12 Bena prist igunalaidia taudia na hanua tau badadia ida e hebou bona e herevahereva murinai, silva monidia momo na tuari taudia e henidia 13 bena eto: “Baoto, ‘Iena disaipol na hanuaboi ai ema, ai mahutamai ai, ia* eme henaoa.’ 14 Bona gavana ese ina sivarai baine kamonaia neganai, basio lalohekwarahi, badina ai ese ia baia hereva henia.”* 15 Una dainai idia ese hari silva monidia na e abi bona e haḡanidia heḡereḡerena e kara, bona una sivarai* na Jew taudia ese padadiai e herevalaia ema bona hari.
16 To, disaipol 11 na Galile ela, Iesu ese e gwauraia ororona ai bae hedavari. 17 Idia ese e itaia neganai, ia vairanai e igo diho,* to haida be e daradara. 18 Iesu na idia dekedia ela bona eto: “Dirava ese guba ai bona tanobada ai ḡau iboudiai ibiagudia siahuna vada e henigu. 19 Una dainai, baola, bese iboudiai na disaipol ai ba halaodia, Tamana bona Natuna bona lauma helaḡa ladadia ai ba bapatisodia, 20 ba hadibadia lau ese na henimui haheḡanidia iboudiai bae badina. A kamonai! lau na dina iboudiai umui ida baina noho ela bona nega oromana dokona kahana.”*