Metiu ese E Torea

19 Iesu na unu hereva e gwaurai murinai, Galile e rakatania bona ema Judea ena boda gabudia, Joden sinavaina kahana ai. 2 Bona hutuma bada na ia murina amo ela, bena ia ese e goreredia taudia na unuseniai e hanamodia.

3 Bona Farisea taudia* na ia dekena ema bona e urava ia bae tohoa dainai e nanadaia, eto: “Tau ta ese badi idauidau daidiai adavana baine divosia be maoro, eiava?” 4 Ia e haere, eto: “Matamana negana ai e karadia tauna ese maruane bona hahine e karadia 5 bena eto: ‘Una badi dainai tau ese tamana bona sinana baine rakatanidia bona hanaihanai adavana ida baine noho,* bona raruosi na tauani tamona ai baela.’ Una be so duahia, a? 6 Idia na dia rarua to tauani tamona. Una dainai Dirava ese e hakapudia taudia na ta ese basine hapararadia.” 7 Idia ese Iesu e hamaoroa, eto: “To, dahaka dainai Mose na e haheḡani, tau ese hahine e divosiamu neganai, divos pepana baine henia?” 8 Iesu eto: “Umui na emui kara havara daidiai Mose na gwaumaoro e heni adavamui ba divosidia. To Dirava ese tau bona hahine ginigunadia e karadia neganai be dia unu bamona. 9 Lau ese na hamaoromuimu, bema tau ta adavana na matabodaḡa* karana ta se karaia, to e divosia bona ia na hahine ma ta e adavaia, una tau na heudahanai tauna.”

10 Iesu na ena disaipol ese e hamaoroa, eto: “Bema headava na unu bamona, vada ta basine headava na namo.” 11 A ia eto: “Dia taunimanima iboudiai ese una hereva e badinaiamu, to una harihari ḡauna* e abia taudia mo. 12 Eunuko* taudia haida na unu e vara toma, a haida be taunimanima ese eunuko ai e halaodia, ma haida be sibodia eunuko ai e hahelao guba Gavamanina dainai. E uramu mauri unu bamona baine badinaia tauna na unu baine kara toma.”

13 Natu maraḡidia na ia dekena e laohaidia, ia ese baine hanamodia* to ena disaipol ese sinadia tamadia e gwau henidia. 14 To, Iesu ese e hamaorodia, eto: “Ene maraḡidia na a rakatanidia dekegu aema, badina be guba Gavamanina na unu bamona taudia edia.” 15 Bona Iesu ese e hanamodia bena una gabu e rakatania.

16 Bena eregabe tauna ta na Iesu dekena ela bona e hamaoroa, eto: “Hahediba tauna e, lau be dahaka ḡau namona baina karaia, unu amo mauri hanaihanai baina abia?” 17 Ia eto: “Dahaka dainai lau o nanadaigumu dahaka be namo? Ta dia namo to Dirava mo sibona. Bema o uramu mauri hanaihanai bavabia, nega iboudiai Dirava ena taravatu ba badina.” 18 Una tau eto: “Ededia taravatu?” Iesu eto: “Basio ala-ala, basio heudahanai, basio henaohenao, basio hahebade koikoi, 19 tamamu bona sinamu ba matauraidia, bona dekemu tauna ba lalokau henia sibomu o helalokaumu heḡereḡerena.” 20 Una eregabe tauna ma eto: “Unu iboudiai na vada na badina, lau be ma dahaka baina kara?” 21 Iesu ese e hamaoroa, eto: “Bema o uramu ba ḡoevadae, baola emu kohu ba ha hoihoilai, bona monidia na ogoḡami taudia ba henidia, unu amo guba ai oi na mai emu dava bada kohudia, bena baoma egu disaipol ai baola.” 22 A eregabe tauna ese una hereva e kamonaia neganai, mai lalo-hisihisina ida e raka oho, badina be ena kohu na momo. 23 Bena Iesu ese ena disaipol e hereva henidia, eto: “Na hamaoromui momokanimu, taḡa tauna na guba Gavamanina ai baine vareai na auka. 24 Lau ese ma na hamaoromuimu, kamelo na nila matuna ai baine vareai na haraḡa, a taḡa tauna na Dirava ena Gavamani lalonai baine vareai na mai hekwarahina.”

25 Disaipol ese una hereva e kamonaia neganai, e hoa dikadika, bena eto: “Daika be mauri baine davaria diba?” 26 Iesu ese e raraidia, bena eto: “Taunimanima ese basie karaia diba, a Dirava hari ḡau iboudiai ikaradia dibana.”

27 Bena Pita e haere, eto: “Ai na ḡau iboudiai vada a rakatani, bona oi a badinamumu, una dainai ai be dahaka baia davarimu?” 28 Iesu eto: “Lau ese na hamaoromui momokanimu, ḡau ihamatamatadia negana ai, taunimanima Natuna na ena terono diaridiarina ai baine helai kau neganai, umui o badinagumu taumui na terono 12 ai ba helai, bena Israel iduhudia 12 ba hahemaoro henidia. 29 Bona bema lau daiguai ena ruma, tadikakana, taihuna, tamana, sinana, natuna, eiava tano, vada e rakatanidia tauna na ma nega 100 be abimu, bona mauri hanaihanai danu do baine abia.

30 “A bae guna taudia hutuma na do bae gabe, bona gabe taudia do bae guna.