Metiu ese E Torea
4 Iesu na lauma helaḡa* ese tano ḡaḡaena* e hakaua lao, bena Diabolo* ese ia na e dibaḡania.* 2 Iesu na dina 40 bona hanuaboi 40 se aniani dainai e hitoloa. 3 Bena Diabolo na Iesu dekena ela bona eto: “Bema oi na Dirava natuna, ini nadi na ba hamaorodia aniani* ai baela.” 4 To ia na Diabolo e haere henia, eto: “Toretore Helaḡadia na e gwaumu: ‘Taunimanima na dia aniani ai mo bae mauri. To Iehova* uduna amo e lasimu herevadia iboudiai amo danu.’”
5 Bena Diabolo ese ia na siti helaḡana e hakaua lao, tempol guhina ai e karaia maḡuna latanai* e haginia kau. 6 Bona Diabolo ese Iesu na e hamaoroa, eto: “Bema oi na Dirava natuna, a roho dobi, badina be Toretore Helaḡadia ai vada e torea: ‘Ia ese ena aneru baine haḡanidia oi bae durumu,’ bona, ‘Idia ese imadia amo oi bae huamu, unu amo aemu na nadi ta ai basine tubu.’” 7 Iesu ese ma e haere henia, eto: “Bona Toretore Helaḡadia ai vada e torea: ‘Oi ese emu Dirava Iehova* na basio tohoa.’”
8 Bena Diabolo ese ia na e hakaua lao ororo bada hereana ta, bena tanobada gavamanidia iboudiai bona edia dava bada ḡaudia e hahedinarai henia. 9 Bona ia ese Iesu e hamaoroa, eto: “Ini ḡau iboudiai na lau ese baina henimu, bema nega tamona ba tui diho bona lau ba tomadiho henigu.” 10 Iesu eto: “Satana e, a siri aola! Badina be Toretore Helaḡadia ai vada e torea: ‘Iehova* emu Dirava ba tomadiho henia, bona ia mo sibona isiaina ba lao heni.’” 11 Bena Diabolo ese ia na e rakatania, bona aneru na Iesu dekena ema bona idia ese e durua.
12 Iesu e kamonai Jon Baptis na dibura ruma ai e atoa neganai, ia na Galile ela. 13 Ia na Nasaret e rakatania murinai, ela gohu* badina hanuana Kapenaum ai e ha noho, una na Sebulun bona Naptali tanodia ai. 14 Unu amo peroveta tauna Isaia ese e gwauraia herevana na e ḡuḡuru, ia na eto: 15 “Galile e, idau bese taudia edia gabu! Sebulun tanona bona Naptali tanona taumui e, umui na davara* e lao heniamu dalana badinai o nohomu, Joden Sinavaina ena west kahana ai. 16 Dibura masemase ai e helaimu taudia ese diari badana ta e itaia, bona mase diburana ese e koua gabuna ai e nohomu taudia ediai diari e hedinarai.” 17 Una nega amo, Iesu na vada e haroro matama bona eto: “A helalokerehai, badina be guba Gavamanina vada eme kahirakahira.”
18 Ia na Galile Gohuna badinai e rakava ai, tadikaka* rarua e itadia, ta be Saimon, ia na e gwauraiava Pita, bona ma ta be Andru. Idia na davara ai reke e toreava, badina idia na haoda taudia. 19 Bena ia ese e hamaorodia, eto: “Murigu ai ame raka, bena lau ese taunimanima ihaoda henidia taumui ai baina halaomui.” 20 Idia na maoromaoro edia reke e rakatani bona Iesu murinai e raka. 21 Unu amo e laova ai, ia ese ma tadikaka rarua, Jeims Sebedi bona tadina Jon e itadia. Idia na tamadia Sebedi ena bouti ai reke e hanamova* lalonai e boiridia. 22 Idia danu maoromaoro bouti bona tamadia e rakatanidia bena Iesu murinai e raka.
23 Bena Iesu na ela Galile idoinai, sinagog* lalodiai e hahedibava bona Dirava ena Gavamani sivaraina namona e harorolaiava bona gorere idauidau e hanamodiava. 24 Ia sivaraina na Siria ibounai lalonai e kamonai, bona gorere idauidau daidiai e hisihisiva taudia, demoni ese e biagudiava taudia, fit* gorerena e abia taudia bona paralais taudia iboudiai na ia dekena e laohaidia, bena ia ese edia gorere iboudiai e hanamodia. 25 Una dainai, Galile, Dekapolis,* Jerusalem, Judea bona Joden Sinavaina ena east kahana amo hutuma bada na ia murina amo ela.