Metiu ese E Torea

15 Jerusalem amo Farisea* bona itorena taudia* haida na Iesu ihereva henina ema, bena eto: 2 “Dahaka dainai emu disaipol ese sene taravatudia e utumu? Heḡereḡere, aniani negadiai imadia na asie hurimu.”*

3 Iesu ese e haere henidia, eto: “Dahaka dainai senemui edia taravatu daidiai Dirava ena haheḡani o utumu? 4 Heḡereḡere, Dirava na e gwa: ‘Tamamui bona sinamui ba matauraidia,’ bona ‘hereva dika rohorohodia* amo tamana o sinana e gwau heniamu tauna na bavalaia mase na namo.’ 5 To umui na o gwaumu: ‘Bema ta ese tamana eiava sinana e hamaoroamu: “Lau ese baina hanamolaimui ḡaudia na Dirava enai vada na gwauhamatalai harihari ḡaudia,” 6 ia ese tamana bona sinana na se matauraidiamu.’ Una dainai umui na senemui edia taravatu daidiai Dirava ena hereva na ḡau asi anina ai o halaoamu. 7 Umui na koikoi taumui, Isaia ese ina peroveta herevana amo umui na e herevalaimui ḡoevaḡoeva, eto: 8 ‘Ini taunimanima na ududia bibinadia amo lau e matauraigumu, to kudoudia be idau gabu ai. 9 Idia ese e tomadiho henigu kavamu, badina idia na taunimanima edia taravatu e hahedibalaimu.’” 10 Una dainai ia ese hutuma e boiridia bena e hamaorodia, eto: “A kamonai bona ba laloparara: 11 Ta na e animu ḡaudia ese se hadikaiamu, to e gwauraimu ḡaudia ese e hadikaiamu.”

12 Bena Iesu ena disaipol na ia dekena ema bona eto: “Oi mai dibamu, Farisea taudia na o gwaurai herevadia daidiai e hekwakwanai?” 13 Iesu ese e haere henidia, eto: “Tamagu guba ai ese se hado ḡaudia na bae raḡadia oho. 14 A rakatanidia. Idia na mata kepulu taudia, a ma haida e hakaudiamu. Una dainai, bema kepulu tauna ta ese kepulu tauna ta be hakauamu, raruosi na guri ai be morumu.” 15 Pita e gwa: “Mani hari haheitalai anina a hadibamai.” 16 Iesu e gwa: “Oi doini so lalopararamu, a? 17 Bona ta ese e animu ḡaudia na bogana ai e dihomu, bena inegena gabuna amo e lasimu be asi dibamu, a? 18 To udu amo e lasimu ḡaudia na kudou amo e maimu, bona una ese ta na e hadikaiamu. 19 Heḡereḡere, kudou amo e maimu ḡaudia na lalohadai dikadia: ala-ala, heudahanai, matabodaḡa,* henaohenao, hahebade koikoi, hahedika herevadia. 20 Unu ese tau ta e hadikaiamu. To aniani negadiai imadia asie hurimu* karana ese tau ta se hadikaiamu.”

21 Iesu na una gabu e rakatania bena Tairos bona Saidon kahadia ela. 22 Una gabu amo Fonisia hahinena ta na ema bona mai taina ida e hereva, eto: “Lohiabada, David Natuna e, ame bogagu hisi. Natugu kekenina na demoni ese e biagua dikadika.” 23 To Iesu na haere ta se heni. Una dainai ena disaipol na ema bona ia e hamaoroa, eto: “A siaia, badina ia na doini mai taina ida ita murida amo e maimu.” 24 A Iesu eto: “Dirava ese lau e siaigu na Israel taudia mo baina durudia, idia na boio mamoedia na heheto.” 25 To una hahine na ema bona Iesu vairanai e tui diho,* bona eto: “Lohiabada e, a durugu!” 26 Iesu ma eto: “Natu edia parao na sisia maraḡidia bae henidia na dia maoro.” 27 A hahine eto: “Oibe Lohiabada, to sisia maraḡidia na biagudia edia teibol amo e morumu momorudia na e animu.” 28 Bena Iesu ese e hamaoroa, eto: “Hahine e, emu abidadama na bada; emu ura ḡauna na baine vara.” Bena una horana ai natuna kekenina na e namo.

29 Iesu na una gabu e rakatania bena Galile Gohuna badina ela, ororo ai e dara dae bena unuseniai e helai. 30 Bena hutuma bada na ia dekena ela, bona ae dika, ima dika, mata kepulu, mu taudia* bona ma gorere taudia momo na e laohaidia, Iesu aena badinai e rakatanidia, bena ia ese e hanamodia. 31 Hutuma na e hoa badina e ita, mu taudia e herevava, ima dika taudia imadia e namo, ae dika taudia e rakava bona mata kepulu taudia e roharohava, bena Israel Diravana e imodaia.

32 Iesu ese ena disaipol e boiridia bona e hamaorodia, eto: “Ini hutuma na na bogadia hisimu, badina dina toi vada ame noho to asi edia aniani. Asina uramu mai hitolodia ida baina siaidia, dala ai tauanidia bae manoka-manoka na garina.” 33 To ena disaipol na e gwa: “Ina ta se nohomu gabuna ai parao be edeseniai baia ha’abi, ina hutuma iubulaidia?” 34 Una dainai Iesu ese e hamaorodia, eto: “Dekemui paraodia be hida?” Idia eto: “Parao 7 bona gwarume maraḡidia haida.” 35 Bena Iesu ese hutuma e hamaorodia tano ai bae helai diho, una murinai 36 ia ese hari parao 7 bona gwarume e abi, Dirava e tenkiu henia murinai, e bitu sisi bena ena disaipol e henidia bena idia ese hutuma e henidia. 37 Idia iboudiai e aniani bona bogadia e kunu, bona disaipol ese bosea badadia 7 na parao bahudia amo e hahonu. 38 E aniani taudia na tatau 4,000, to hahine bona maraḡidia na se duahidia. 39 Iesu na hutuma e siaidia murinai, bouti ai e gui bena Magadan tanona ela.