Metiu ese E Torea

22 Iesu ese haheitalai ma haida amo e hereva henidia, eto: 2 “Guba Gavamanina na king ta ese natuna merona ena headava ariana e karaia na heto. 3 Ia ese ena hesiai taudia e siaidia headava ariana ai e invaitidia taudia bae boiridia, to idia na se ura baema. 4 Bena ia ese hesiai taudia ma haida e siaidia neganai, eto: ‘Lau ese na invaitidia taudia ba hamaorodia: “A kamonai, lau ese egu aniani vada na heḡaeḡaelaia, egu boromakau bona egu animal namo hereadia vada na aladia, bona ḡau iboudiai na vada heḡaeḡae. Headava ariana baoma.”’ 5 To idia ese una na asie laloa bada, bena e raka oho, ta ela ena uma, ma ta be ena bisnes ḡaukaradia ikaradia ela, 6 a oredia ese king ena hesiai taudia e dabaidia tao, bena e dadabadia bona e hamasedia.

7 “Una dainai king na e badu dikadika bena ena tuari taudia e siaidia, unu ala-ala taudia e aladia bona edia siti danu e doua. 8 Gabeai ia na ena hesiai taudia e hamaorodia, eto: ‘Headava ariana na vada heḡaeḡae, to e invaitidia taudia na dia heḡereḡere baema. 9 Una dainai siti e lao heniamu dalana baola, bona o davaridiamu taudia na ba invaitidia headava ariana baema.’ 10 Una haheḡani heḡereḡerena, hesiai taudia na dala ela bena e davaridia taudia iboudiai, kara namo bona kara dika taudia e invaitidia. Bona idia na teibol badinai e helai, headava ariana gabuna e hahonua.

11 “King na e raka vareai bena e invaitidia taudia e sekedia neganai, tau ta e itaia ia na dia headava negadia ai e karamu dabuana e karaia. 12 Una dainai ia ese e hamaoroa, eto: ‘Turagu, dahaka dainai oma? Oi be headava negadia ai e karamu dabuana ta so karaia.’ To ia na se haere. 13 Bena king ese ena hesiai taudia e hamaorodia, eto: ‘Imana bona aena ba ḡuidia bena murimuri diburana ai ba tahoa lasi. Unuseniai ia na baine tai bona gadigadina baine hahedai.’

14 “Badina be momo e invaitidia to haida mo e abidia hidi.”

15 Bena Farisea taudia* na e hegogo bona e hereva-hereva. Unu amo Iesu ese hereva kererena ta baine gwauraia neganai, idia ese bae samania koikoi diba. 16 Una dainai idia ese edia disaipol bona Herod ena orea taudia* na e siaidia Iesu dekena baela bona baeto: “Hahediba tauna e, ai na mai dibamai oi na hereva momokani o gwauraimu, bona mai momokanimu ida Dirava ena dala o hahedibalaimu, bona ta ena lalonamo so tahuamu, badina taunimanima toadia na so lalomu. 17 Una dainai emu lalohadai be dahaka? Kaisara* ena tax monina ihenina be maoro eiava lasi?” 18 To Iesu na edia lalohadai dikana na mai dibana dainai, e gwa: “Koikoi taumui e, dahaka dainai o tohogumu? 19 Tax koinina ta a haheitalaigu.” Bena idia ese dinari* ta e henia. 20 Bena ia ese e nanadaidia, eto: “Ina be daika laulauna bona ladana?” 21 Bena idia e haere, eto: “Kaisara.” Bena ia eto: “Kaisara ena Kaisara ba henia, to Dirava ena Dirava ba henia.” 22 Idia ese una e kamonaia neganai, e hoa bena ia e rakatania bona ela.

23 Una dina ai Sadukea taudia, idia na toreisi lou asie abia daemu taudia, na ema bona Iesu e nanadaia, eto: 24 “Hahediba tauna e, Mose na eto: ‘Bema tau ta na asi natuna bena baine mase, namona na ia tadina merona* ese ia adavana baine adavaia bena una kakana e mase tauna natuna baine havara.’ 25 Vara hebou memerodia 7 e nohova. Roboana na e headava, to asi natuna bena e mase, a adavana na tadina merona ese e adavaia. 26 To una na mero iharuana bona ihatoina ediai danu unu e vara toma ela bona mero orena. 27 Dokonai hahine danu e mase. 28 Una dainai toreisi lou neganai, unu tatau 7 amo daika be una hahine adavana? Badina iboudiai ese e adavaia.”

29 A Iesu e haere, eto: “Umui na kekerere, badina Toretore Helaḡadia bona Dirava ena siahu na asi dibamui; 30 badina toreisi lou negana ai tatau na basie headavamu bona hahine danu basie headavamu, to idia na guba anerudia heḡereḡeredia be nohomu. 31 A mase amo bae toreisi lou herevana Dirava ese e herevalai henimui be asio duahia, a? Ia na ini e gwau toma: 32 ‘Lau na Abraham ena Dirava, Isaak ena Dirava, bona Jeikob ena Dirava.’ Ia na dia mase taudia edia Dirava, a mauri taudia edia.” 33 Hutuma ese ena hahediba herevadia e kamonai neganai, e hoa.

34 Farisea taudia na e kamonai, Sadukea taudia na se heḡereḡere Iesu bae haere henia dainai, iboudiai na ia dekena ela. 35 Idia ta na Taravatu* mai dibana namonamo tauna bona e ura Iesu baine tohoa dainai, e nanadaia, eto: 36 “Hahediba tauna e, Taravatu lalonai edena be haheḡani hereadaena?” 37 Iesu eto: “‘Iehova* emu Dirava ba lalokau henia mai kudoumu idoinai, emu mauri* idoinai bona daramu idoinai.’ 38 Ina na haheḡani ginigunana bona hereadaena. 39 Iharuana binai: ‘Dekemu tauna ba lalokau henia, sibomu o helalokaumu heḡereḡerena.’ 40 Ini haheḡani ruaosi na Taravatu bona Peroveta Taudia* edia hereva iboudiai badidia.”

41 Farisea taudia dounu nohodia ai, Iesu ese e nanadaidia, eto: 42 “Umui ese Keriso be ede o laloa tomamu? Ia be daika natuna?” Idia eto: “David natuna.” 43 Ia ma eto: “Dahaka dainai lauma helaḡa ena hahekau henunai David ese ia e gwauraia Lohiabada, eto: 44 ‘Iehova ese egu Lohiabada e hamaoroa, eto: “Lau imagu idibana* kahana ai ba helai, ela bona inaimu na aemu henudiai baina atodia”’? 45 Una dainai bema, David ese Keriso na e gwauraia Lohiabada, edena dala ai ia na David natuna?” 46 To idia na dia heḡereḡere ia bae haere henia. Una dainai, una dina amo asie ura ia ma bae nanadaia.