Isaia

 2 Ierusalem ba hereva manada henia;

ba boi henia, ba hamaoroa,

ena tuari vada e ore,

bona ena kara havara vada eme hegwau tao,

bona Iehova imana amo

ena kara dika iboudiai davadia na vada e abi harua.

 3 Gado ta e boimu, e tomu,

Tano ḡaḡaena ai Iehova ena dala ba lailaia,

bona tano kaukauna ai laolao dalana ba hamaoromaoroa,

eda Dirava ena.

 4 Koura iboudiai bae heabi isi,

ororo badadia bona ororo maraḡidia iboudiai bae hataora;

tano diho-dae bae hedaga maoro,

bona gabu gudu-isidia bae hataora.

 5 Iehova hairaina baine hedinarai,

bona taunimanima iboudiai ese bae itaia,

badina be Iehova uduna vada e hereva.

 6 Gado ta e tomu, A boiboi!

Bena lau nato, Dahaka baina boilaia?

Hidio idoinai na rei na heto,

bona ia hairaina idoinai na tano heraheradia na heheto.

 7 Rei e kakoromu, herahera e maraimu,

Iehova ese e hahodi henidiamu negana ai;

momokani, taunimanima na rei mo.

 8 Rei e kakoromu, herahera e maraimu;

a eda Dirava ena hereva baine gini hanaihanai.

 9 Sivarai namona Siona o gwaurai heniamu taumu e,

ororo latana ta ai ba dara dae,

Sivarai namona Ierusalem o gwaurai heniamu taumu e,

gadomu ba habadaia mai goadamu ida;

ba habadaia, basio gari.

Iuda hanuadia ba hamaorodia, baoto,

Emui Dirava ba itaia.

10 A itaia, Ḡaubada Iehova na mai siahuna ida e maimu,

ia imana na e lohiamu;

a itaia, dava na ienai,

bona ahu na ia vairanai.

11 Ia ese ena seri baine ubua, mamoe ireḡudia tauna na heto;

mamoe natudia na imana ai baine rosidia,

bona kemena ai baine rosidia lao,

bona e rogorogomu ḡaudia na metaira-metaira baine hakaudia.

12 Daika ese imana nuana ai davara vada e hahetohoa,

bona imana kwakikwakina amo guba vada e hahetohoa?

Daika ese tanobada ḡahuna na hahetoho ḡauna ai vada e udaia,

bona ororo badadia na metau ihahetohona ḡauna ai vada e atoa,

bona ororo maraḡidia metaudia vada e hahetoho?

13 Daika ese Iehova ena Lauma vada e duanai henia,

eiava ena hahelao amo vada e hadibaia?

Daika ese aonega e hadibalaia,

bona lalo-parara dalana e haheitalaia?

15 A itaia, tanobada besedia na ranu hetuturuna tamona na heto,

hodu amo e hetuturu dobimu;

idia na ḡahu, metau ihahetohona ḡauna ai, na heto.

A itaia, motumotu na e abidia isimu,

ḡahu dimura-dimurana na heto.

16 Lebanon audia na basie heḡereḡere, au rakuraku ai baela,

bona ia boromakauna na basie heḡereḡere, ḡole-oho bouboudia ḡaudia ai baela.

17 Bese iboudiai na dia ḡau ta ia vairanai;

ia ese e haerodiamu, idia na dia ḡau ta, bona asi anidia.

19 Kaivakuku na ima-idibaka tauna ese e hahetariamu,

bona gold iḡaukaralaina tauna ese gold amo e ḡovaiamu,

bena ena silver varodia e hahetaridiamu.

20 Ogoḡami tauna ese basine houka-houka auna e abia hidimu,

ena herahia ḡauna ai e halaoamu;

ia ese ima idibaka tauna ta e tahuamu,

kaivakuku ta, basine marere diba ḡauna, baine haginia totona.

Tanobada na ena gabu ai e haginia guna negana amo,

lalomui asie parara a?

22 Tanobada kuboruna daenai e helaimu,

bona inoholaina taudia e nenediamu, ita-itadia kwadi na heto, Diravana,

ia ese guba e idia roromu, seseahu na heto,

e veria roromu, palai rumana na heto,

baine noholaia totona;

23 ia ese lohia na e hamorudiamu,

bona tanobada lohiadia e veridia dobimu.

24 E hadodiamu, bena e kobomu,

bona ramudia e tubu matamamu;

bena asi vanahana ia ese e hahodi henidiamu, bena e maraimu;

bena lai gubana ese e odadia ohomu, rei kakoro na heto.

25 Helaḡa Diravana na e tomu, Daika ida ba haheḡereḡeregu,

bena ia ida baina heḡereḡere?

26 Ba gaga dae, ba itaia,

unu hisiu na daika ese e karadia?

Ia ese edia orea na ta ta amo e halasidiamu,

bona iboudiai ladadia e hatomu;

ena goada herea-daena amo,

bona ena siahu na bada dainai,

ta se boiomu.

27 Iakob e, dahaka dainai o gwaumu,

Israel e, dahaka dainai o herevamu, o tomu

“Egu dala na Iehova ena amo eme hehuni,

egu Dirava ese ahugu korikorina se laloamu”?

Iehova na noho-hanaihanai Diravana;

ia na tanobada dokodia ikaradia Diravana.

Ia tauna se manorimu, se boeramu;

ena diba na ta ese basine davaria diba.

29 Manori taudia na ia ese e hagoadadiamu,

bona asi ena goada tauna enai goada e habadaiamu.

30 Uhau na taudia bae manori, bae boera;

eregabe na edia goada bae ore bena bae keto.

31 A Iehova e nariamu taudia ese edia goada bae hamatamata,

hanidia amo bae roho dae, ugava na heheto;

idia na bae heau, taudia basie boera,

bae raka, taudia basie manori.