Metiu ese E Torea
16 Unuseniai, Farisea* bona Sadukea taudia* na ia dekena ela, bona e ura bae tohoa dainai e nanadaia Dirava ladana ai toa ta baine hahedinarai henidia. 2 Bena Iesu na e gwa: “Dina e dihomu neganai, umui na o gwaumu, ‘Kerukeru nega na be namomu, badina guba na kakakaka lahi na heto,’ 3 to daba ai, o gwaumu ‘hari dina ai nega na be dikamu bona medu be dihomu, badina guba na kakakaka lahi na heto bona daga-ahu.’ Guba toana anina be mai dibamui, to ina nega toana anina be asi dibamui. 4 Kara dika bona heudahanai* uruna ese toa ta e tahuamu, to toa ta basie abia, Jona toana mo.” Una murinai Iesu ese e rakatanidia.
5 A Iesu ena disaipol na gohu e hanaia ela kahana, to bae abi kau paraodia na e laloboio. 6 Bena Iesu ese e hamaorodia, eto: “Matamui bae papa, Farisea bona Sadukea taudia edia hatubu muramurana* dainai ba gima.” 7 Una dainai idia na sibodia e herevahereva, e gwa: “Ita na parao ta asita abi kau.” 8 Iesu na una e diba dainai, eto: “Abidadama maraḡi-maraḡi taumui e, dahaka dainai o gwaumu parao asio abi kau? 9 Umui doini asio lalopararamu, eiava asio helalotaomu tatau 5,000 na parao 5 amo ta ubudia bona bosea hida ai bahudia o kara? 10 Eiava tatau 4,000 na parao 7 amo ta ubudia bona bosea badadia hida ai bahudia o kara? 11 Dahaka dainai so lalopararamu lau na dia parao na herevalaiamu? To Farisea bona Sadukea taudia edia hatubu muramurana dainai nahuamui ba toho.” 12 Bena idia na e laloparara Iesu na dia hatubu muramurana e gwauraia, to Farisea bona Sadukea taudia edia hahediba herevadia daidiai nahuadia bae toho karana e herevalaia.
13 Iesu na Sesaria Filipai ai e kau neganai, ena disaipol e nanadaidia, eto: “Taunimanima be dahaka e gwaumu, taunimanima Natuna be daika?” 14 Idia eto: “Haida be e gwaumu Jon Baptis, haida be Elia, a haida be Jeremaia eiava peroveta tauna ta.” 15 Iesu ese ma e nanadaidia, eto: “O umui be dahaka o gwaumu, lau be daika?” 16 Saimon Pita e haere, eto: “Oi na Keriso, mauri Diravana Natuna.” 17 Iesu ese e haere henia, eto: “Saimon, Jona natuna e, ba moale badina hidio bona rara* ese asie hahedinarai henimu, a Tamagu guba ai e nohomu ese. 18 Danu, lau ese na hamaoromumu: Oi na Pita, bona lau ese egu kongrigeisin na ina nadi latanai baina haginia, bona Gara* iduaradia ese basie hadarerea. 19 Lau ese guba Gavamanina kidia baina henimu, tanobada ai ba ḡui ḡaudia na guba ai vada e ḡui, bona tanobada ai ba ruha ḡaudia na guba ai vada e ruha.” 20 Bena ia ese ena disaipol e haḡanidia, ta basie hamaoroa ia na Keriso.
21 Una nega amo, Iesu ese ena disaipol e hadibadia matama ia na Jerusalem bainela bona tau badadia, prist biagudia bona itorena taudia* ese bae hahisia bona bae hamasea, bona dina ihatoina ai Dirava ese baine hatorea isi lou. 22 Pita ese e hakaua siri bona e gwau henia matama, eto: “Lohiabada e, asio lalohekwarahi, emu ai una na basine varamu.” 23 To Iesu ese Pita e muria, eto: “Satana e, murigu kahana aola, oi na ihahekwakwanaigu ḡauna, badina emu lalohadai na dia Dirava ena, to taunimanima edia.”
24 Bena Iesu ese ena disaipol e hamaorodia, eto: “Bema ta na e uramu lau murigu ai baine raka, ia na sibona baine hedadarai, ena hisihisi auna* baine abia isi bona lau murigu ai baine raka.” 25 Badina be e uramu ena mauri* baine gimaia tauna ese ena mauri na baine haboioa, to lau daiguai ena mauri* baine haboioa tauna ese ena mauri na baine davaria. 26 Oibe, bema tau ta ese tanobada ibounai baine abia, to ena mauri* baine haboioa, ena namo be dahaka? Eiava tau ta be dahaka baine heni ena mauri* baine abia helaoreana? 27 Badina taunimanima Natuna na Tamana hairaina ai bainema ena aneru ida, bena ta ta edia kara heḡereḡerena davadia baine heni. 28 Lau ese na hamaoromui momokanimu, iniseniai gigini taudia haida ese mase mamina na basie abia ela bona taunimanima Natuna bae itaia, ena lohia hairaina ai bainema.”*