Metiu ese E Torea
20 “Guba Gavamanina na ruma biaguna ta na heto. Ia na daba matana ai e raka lasi ena vine umana ai bae ḡaukara taudia e tahudia. 2 Ia na ḡaukara taudia ida e lalotamona dina ta davana na dinari* tamona baine henidia murinai, ena uma e siaidia lao. 3 Daba 9 oklok heḡereḡerena* ai, ia na ma e raka lasi, haida e itadia hoihoi gabuna ai gigini kakava 4 bena e hamaorodia, eto: ‘Umui danu aola vine umana, bona lau ese davamui korikori baina heni,’ 5 bena vada ela. A ia na dina tubua 12 oklok heḡereḡerena* bona adorahi 3 oklok* ai ma e raka lasi bena unu e kara toma. 6 Gabeai, adorahi 5 oklok heḡereḡerena* ai ma e raka lasi, bena haida e itadia gigini bona e hamaorodia, eto: ‘Dahaka dainai umui na ina dina ibounai lalonai iniseniai gigini ḡaukara ta so karaiamu?’ 7 Idia e gwa: ‘Ta ese ḡaukara se henimai dainai.’ Ia eto: ‘Bema unu bamona, umui danu egu vine umana aola.’
8 “Adorahi ai uma biaguna ese uma e itaia taomu tauna e hamaoroa, eto: ‘Ḡaukara taudia ba boiridia bona davadia ba heni, gabeai ema taudia edia amo ba hematama, bona ema guna taudia ediai ba hadokoa.’ 9 Adorahi 5 oklok ai e ḡaukara taudia ema neganai, idia ta ta na dinari* ta ta e abi. 10 Una dainai dina ibounai e ḡaukara taudia ema neganai, e laloava idia na moni momo be abimu, to idia danu dinari* ta ta amo e henidia. 11 Davadia e abi neganai, ruma biaguna vada e maumauraia matama 12 bona e gwauva: ‘Gabe amo ema taudia be hora tamona mo eme ḡaukara, a ai be dina ibounai ame ḡaukara, dina siahu ai, a davamai be idia ida o haheḡereḡerediamu.’ 13 To ia ese idia ta e hamaoroa, eto: ‘Turagu e, lau na kerere ta asina karaia oiemu ai. Ita raruosi na ta lalotamona, dinari* tamona bavabia, ani? 14 Oiemu avabia, vada aola. Na uramu ina gabe tauna baina henia, oi na henimu heḡereḡerena. 15 Be lau be asi egu maoro sibogu egu kohu na egu ura dalana ai baina ḡaukaralai, a? Eiava egu kara namo dainai o mama* henigumu, a? 16 Ina dala amo, gabe taudia na bae guna, bona guna taudia na do bae gabe.”
17 Jerusalem e dae laova lalonai, Iesu na ena disaipol 12 e hakaudia siri bona e hamaorodia, eto: 18 “A kamonai, ita na Jerusalem baita laomu, bona taunimanima Natuna na itorena taudia* bona prist biagudia imadia ai bae atoa. Idia ese taona bae torea, ihamasena herevana bae gwauraia 19 bona idau bese taudia imadia ai bae atoa. Bena bae kirikirilaia, bae kwadia bona bae hasatauroa.* To dina ihatoina ai, Dirava ese baine hatorea isi lou.”
20 Bena Sebedi adavana na mai natuna memerodia ida Iesu dekena ela, e tui diho* bona ia ena amo ḡau ta e noia. 21 Iesu ese e nanadaia, eto: “Oiemu ura ḡauna be dahaka?” Hahine e haere, eto: “Emu Gavamani ai o vareaimu neganai, natugu memerodia na oi ida bae helai, ta idibamu* kahana ai, ta laurimu* kahana ai.” 22 Iesu e haere, eto: “O noiamu ḡauna na asi dibamui. Lau baina inua kapusina amo umui danu ba inu diba, a?” Idia eto: “Oibe, baia inu diba.” 23 Bena ia ese e hamaorodia, eto: “Egu kapusi amo ba inu diba, to idibagu bona laurigu ai bae helai taudia na lau ese basina abidia hidi, a Tamagu ese baine abidia hidi taudia hari.”
24 Disaipol 10 na una e kamonai neganai, Jeims bona Jon e badu henidia. 25 To Iesu ese e boiridia bona e hamaorodia, eto: “Umui na mai dibamui, bese idauidau taudia edia lohia na edia ura heḡereḡeredia ai edia taunimanima e biagudiamu bona dagi bada taudia ese taunimanima e biagudia aukamu. 26 Umui na unu basio kara toma. Badina bogaraḡimui ai e uramu baine bada tauna na emui hesiai tauna ai bainela. 27 Bona bogaraḡimui ai e uramu baine guna tauna na emui hesiai tauna ai bainela. 28 Taunimanima Natuna ema na heto, dia haida ese ia isiaina bae lao heni, to edia hesiai tauna ai bainela bona ena mauri* baine heni, mauri idavalaina boubouna* ai bainela, hutuma baine hoidia lou helaoreana.”
29 Idia na Jeriko amo e raka lasiva ai, hutuma na ia murina amo ela. 30 Bena dala badina ai e helai mata kepulu taudia rarua na e kamonai Iesu na e raka hanaiva dainai, e boi eto: “Lohiabada, David Natuna e, ame bogamai hisi.” 31 Hutuma ese e gwau henidia basie hereva, to idia na dounu e boi badabadava e tomava: “Lohiabada, David Natuna e, ame bogamai hisi.” 32 Una dainai, Iesu na e gini, idia e boiridia bona eto: “Umui be o uramu lau be dahaka baina kara?” 33 Idia eto: “Lohiabada e, matamai boma hapapa.” 34 Iesu ese e bogadia hisi dainai matadia e dau toho, bena maoromaoro matadia e papa, bona ia murinai e raka.