Metiu ese E Torea
11 Iesu ese ena disaipol 12 na haheḡani e henidia murinai, ia na ela siti idauidau ai e hahediba bona e haroro.
2 To Jon na dibura ruma ai, bona Keriso ena ḡaukara sivaraidia e kamonai neganai, ena disaipol na ia dekena e siaidia lao, ia bae nanadaia. 3 Una dainai idia ese Iesu e nanadaia, eto: “Bainema Tauna be oi, eiava idauna ta baia naria?” 4 Iesu ese e haere henidia, eto: “Aola ini ome kamonai bona ome ita ḡaudia na Jon ba hamaorolaia. 5 Mata kepulu taudia na e roharohamu, ae dika taudia na e rakamu, lepera taudia na e ḡoevamu, taia kudima taudia na e kamonaimu, mase taudia na e hatoredia isi loumu bona ogoḡami taudia na sivarai namona e kamonaiamu. 6 Lau na karamu ḡaudia ese se hahekwakwanaiamu tauna na e moalemu.”
7 Jon ena disaipol na e raka ohova lalonai, Iesu na hutuma ediai Jon e herevalaia matama, eto: “Tano ḡaḡaena ola be dahaka ba ita? Lai ese e odaia evaevamu sirihona* ba itaia, a? 8 Umui ola be dahaka o ita? Dabua namodia* e hahedokilai tauna ta o itaia, a? Lasi, badina dabua namodia e hahedokilaimu taudia na king edia ruma ai e nohomu. 9 Una dainai, umui ola badina be dahaka? Peroveta tauna ta ba itaia totona, a? Oibe, ia na peroveta tauna, to lau ese na hamaoromuimu, ia ese peroveta taudia na e hereadia. 10 Ia na Toretore Helaḡadia ese ini e gwauraia toma: ‘Lau ese gwaukau tauna ta na siaiamu oi vairamu ai bainela guna, ia ese emu dala baine heḡaeḡaelaia.’ 11 Lau ese na hamaoromui momokanimu, e vara taudia iboudiai bogaraḡidiai, ta ese Jon Baptis se hereaia, to guba Gavamanina ai dagi maraḡi tauna ese Jon e hereaia. 12 Jon Baptis ena ḡaukara e hematama negana amo ema bona hari, taunimanima ese guba Gavamanina na e tahuamu, bona asie hesikumu taudia ese e davariamu. 13 Badina Peroveta Taudia bona Taravatu* bukana na e peroveta ela bona Jon Baptis ena hesiai ḡaukara e hematama negana. 14 Ena be o uramu bavabia dae eiava lasi, to Jon na Elia, Peroveta taudia ese e gwauraia bainema tauna. 15 Mai taiana tauna na baine hakala.
16 “Ina uru taudia be daidia ida baina haheḡereḡeredia? Idia na natu maraḡidia na heheto, makedi ai e helaimu bena bamodia e boi henidiamu, 17 e tomu: ‘Ai na umui daimui ai fluti* a gadaralai, to umui na asio mavaru. Ai na umui daimui ai lalohisihisi anedia a abi, to umui na asio tai heala-heala.’ 18 Una heḡereḡerena, Jon na se anianiva bona se inuinuva, to taunimanima na e gwauva: ‘Ia na mai ena demoni.’ 19 Taunimanima Natuna na e anianimu bona e inuinumu to taunimanima na e gwaumu, ‘A itaia! Una tau na e aniani momomu bona wain e inu momomu, ia turana na tax gogo bona kara dika taudia.’ Ta na ena kara amo e hahedinaraiamu ia na mai aonegana.”*
20 Bena Iesu ese hoa karadia e kara gabudia* e gwau henidia matama, badina unuseniai e nohova taudia na asie helalokerehai. 21 Ia eto: “Korasin e, madi ihabaimu! Betsaida e, madi ihabaimu! Bema Tairos bona Saidon ai ini hoa karadia nama kara, idia na idaunega ai bema helalokerehai, mai puse dabuadia bona kahudia ida bema helai. 22 To lau ese na hamaoromuimu, Hahemaoro Dinana ai emui dika ese Tairos bona Saidon edia be hereaiamu. 23 Bona oi, Kapenaum e, oi be bae abimu isi guba ai bae atomu, a? Lasi, oi na Gara* gabuna bo diho laomu, badina bema oiemu ai na kara hoa karadia na Sodom ai nama kara, ia na bema noho ema bona hari. 24 To lau ese na hamaoromuimu, Hahemaoro Dinana ai oiemu dika ese Sodom ena na be hereaiamu.”
25 Una nega ai Iesu na eto: “Tamagu, guba bona tanobada Lohiadia e, taunimanima vairadiai na imodaimumu, badina oi ese ini ḡau na aonega bona diba bada taudia edia amo o hunimu, to natu maraḡidia ediai o hahedinaraimu. 26 Oibe, Tamagu e, badina be ina na oi ese o hamomokania dalana. 27 Ḡau iboudiai na Tamagu ese e henigu, bona ta asi dibana Natuna, a Tamana mo mai dibana, bona ta asi dibana Tamana, a Natuna mo mai dibana. Ma haida ese Tamana na basie dibaia dibamu, to Natuna baine ura neganai, Tamana na idia ediai baine hahedinaraia. 28 O hesikumu bona maduna metaudia o huamu taumui e, lau dekegu aoma, bona lau ese goada matamata baina henimui. 29 Egu maduna ba huaia bona lauegu amo diba bavabi, badina lau na lalo-manada bona manau taugu, unu amo umui* na goada matamata bavabia. 30 Badina egu maduna na asi metauna bona ihuana na haraḡa.”