Metiu ese E Torea

13 Una dina ai, Iesu na ruma e rakatania bona ela kone ai e helai. 2 Bena hutuma bada na ia dekena ela, una dainai ia na bouti ta ai e gui bona e helai diho, a hutuma be kone ai gigini. 3 Bena ia ese idia na haheitalai idauidau amo e hadibadia, e gwa: “A kamonai! Hadohado tauna ta na ela e hadohado. 4 E hadohadova lalonai uhe haida na dala badinai e moru, bona manu ese e anidia. 5 Uhe haida be nadi padadiai e moru bona maoromaoro e tubu badina tano na dia uduna. 6 To dina e dae neganai, uhe na e aradia bena e mase, badina asi ramudia. 7 Uhe haida be au ginigini bogaraḡidiai e moru, bena au ginigini ese uhe na e koudia. 8 To uhe haida be tano namona ai e moru bona huahuadia e ato matama, haida be nega 100 e hanaia, haida be 60 e hanaia bona ma haida be 30 e hanaia. 9 Mai taiana tauna na baine hakala.”

10 Una dainai, Iesu ena disaipol na ia dekena ema bona eto: “Dahaka dainai idia na haheitalai amo o hadibadiamu?” 11 Ia ese e haere henidia, eto: “Umui na maoro e henimui guba Gavamanina ena hehuni hereva helaḡadia ba lalopararalai, to idia be se henidia. 12 Mai ena tauna na ma haida bae henia, bena ena na bae momo herea. To asi ena tauna na dekenai miana danu bae abia oho. 13 Idia na e roharohamu to ḡau ta asie itaiamu, e hakalamu to ḡau ta asie lalopararalaiamu. Una dainai lau ese haheitalai amo na hadibadiamu. 14 Idia ediai Isaia ena peroveta herevana na e ḡuḡuru, eto: ‘Umui na bo hakalamu, to anina na basio lalopararalaiamu, bona momokani umui na bo roharohamu, to ḡau ta basio itaiamu. 15 Badina be idia kudoudia na a’auka nadi na heheto, bona taiadia na kukudima. Idia na matadia bona taiadia e koumu, unu amo ḡau ta basie ita bona ḡau ta basie kamonai, bona e kamonaimu ḡaudia anidia basie lalopararalai, bena basie helalokerehai bona basina hanamodia.’

16 “To, umui na o moalemu badina umui ese ini ḡau na o itamu bona o kamonaimu. 17 Badina be lau ese na hamaoromui momokanimu, peroveta taudia momo bona kara maoromaoro taudia na e ura umui ese o itamu ḡaudia bae ita, to se ita, bona umui o kamonaimu ḡaudia bae kamonai, to se kamonai.

18 “Una dainai hadohado tauna ena haheitalai a kamonaia. 19 Tau ta ese Dirava ena Gavamani sivaraina e kamonaimu to lalona se pararamu, bena Dika Tauna* e maimu una tau kudouna ai e hadoa ḡauna e dadihaiamu. Dala badina ai e moru uhena bunai. 20 Nadi padadiai e moru ḡauna na, ta ese mai moalena ida hereva e kamonaiamu bona e abia dae haraḡamu. 21 To, ia na asi ramuna dainai nega sisina e tubumu, bona hisihisi eiava daḡedaḡe e varamu neganai, maoromaoro e hekwakwanaimu. 22 Hegwada-hegwada audia bogaraḡidiai e hadoa ḡauna na ta ese hereva e kamonaiamu, to ina nega* ena lalohekwarahi bona taḡa amo taunimanima e koidiamu karana ese hereva na e kouamu. Una dainai ia na asi huahuana. 23 Tano namona ai e hadoa ḡauna be, ta ese hereva e kamonaiamu bona anina e lalopararalaiamu, ia huahuana na e varamu, haida be nega 100 e hanaia, haida be 60 e hanaia bona ma haida be 30 e hanaia.”

24 Ia ese haheitalai ma ta e gwauraia, eto: “Guba Gavamanina na ena uma ai uhe namona e hadoa tauna na heto. 25 To taunimanima mahutadia ai, ia inaina na ema ava dikadia na witi bogaraḡidiai e hado, bena e raka oho. 26 Bona witi na e tubu bona huahuana e vara neganai, ava dikadia danu e hedinarai. 27 Bena ruma biaguna ena hesiai taudia na ia dekena ela, eto: ‘Biagumai e, oi ese uma ai na uhe namodia mo o hado, ani? To dahaka dainai ava dikadia e tubu?’ 28 Ia eto: ‘Inai tauna ta ese una e karaia.’ Bena ena hesiai taudia ese e nanadaia, eto: ‘O uramu baiala, baia ha butudia oho?’ 29 Ia eto: ‘Lasi, badina ava dikadia ibutudia ai witi danu ba butu oho na garina. 30 A e tubu hebou ela bona witi igogona negana, bena lau ese iutuna taudia baina hamaorodia: Ava dikadia ba habou guna, ba ḡui lahi ḡauna. A witi be ba habou bena egu aniani habou rumana ai bavato.’”

31 Iesu ese haheitalai ma ta e gwauraia, eto: “Guba Gavamanina na masted uhena* na heto, tau ta ese e abia bona ena uma ai e hadoa. 32 Momokani, uhe iboudiai amo ia na uhe maraḡi-maraḡina, to e tubumu neganai, e bada hereamu, uma anidia iboudiai e hanaidiamu bona au ai e laomu. Unu amo manu na rigina ai e nohomu.”

33 Ia ese haheitalai ma ta e gwauraia, eto: “Guba Gavamanina na hatubu muramurana* na heto, hahine ta ese e abiamu flaoa disi toi ida e buloamu ela bona idoinai e tubumu.”

34 Iesu ese hutuma ediai unu hahediba herevadia na haheitalai amo e hahedinarai. Ia na hanaihanai haheitalai amo taunimanima e hadibadiava, 35 unu amo peroveta tauna ese e gwauraia herevana na e ḡuḡuru, eto: “Udugu baina kehoa haheitalai baina gwauraidia; lau ese tanobada e hematama negana* amo e hehuni ḡaudia baina herevalai.”

36 Bena ia na hutuma e siaidia oho murinai, ruma ai e vareai. Ena disaipol na ia dekena ela bena eto: “Uma ai ava dikadia haheitalaina anina mani a hadibamai.” 37 Ia eto: “Uhe namona e hadoa tauna na taunimanima Natuna; 38 uma be tanobada. A uhe namona be guba Gavamanina ai be vareaimu taudia,* to ava dikadia be Dika Tauna natuna, 39 bona ava dikadia e hado inai tauna na Diabolo. Gogogogo negana be nega oromana dokona kahana,* bona gogogogo taudia be aneru. 40 Una dainai, ava dikadia e gogo bona lahi ai e gabu heḡereḡerena, nega oromana dokona kahana* ai danu unu baine vara toma. 41 Taunimanima Natuna ese ena aneru do baine siaidia, bona idia ese Gavamani amo hekwakwanai e havaramu ḡaudia bona taravatu e utumu taudia iboudiai bae gogodia, 42 bona idia ese lahi hururuhururuna lalonai bae tahodia vareai. Unuseniai bae tai bona gadigadidia bae hahedai. 43 Una nega ai kara maoromaoro taudia na Tamadia ena Gavamani lalonai bae diaridiari, dina na heto. Mai taiana tauna na baine hakala.

44 “Guba Gavamanina na tano ai e hehuni dava bada kohuna na heto, tau ta ese e davaria bena e hunia. Bona e moaleva dainai ela ena ḡau iboudiai e hoihoilai bena una tano e hoia.

45 “Bona guba Gavamanina na pel namodia e tahumu hoihoi tauna na heto. 46 Ia na dava bada pel nadina ta e davaria neganai, ela bona maoromaoro ena kohu iboudiai e hoihoilai bena una pel e hoia.

47 “Danu, guba Gavamanina na haoda rekena na heto, davara ai e torea bona gwarume idauidau e toa. 48 Reke e honu neganai, kone kahana e veria lao, e helai diho bena namodia na bosea ai e habou, a dikadia be e nege. 49 Nega oromana dokona kahana* ai unu baine vara toma. Aneru na baema bena kara dika taudia na kara maoromaoro taudia amo bae hapararadia, 50 bena lahi hururuhururuna ai bae tahodia vareai. Unuseniai bae tai bona gadigadidia bae hahedai.

51 Iesu ese e nanadaidia, eto: “Ini hereva iboudiai anidia ome lalopararalai, a?” Idia eto: “Oibe.” 52 Bena ia ese e hamaorodia, eto: “O lalopararamu dainai, guba Gavamanina e dibaia hahediba taudia iboudiai na ruma biaguna ta na heto, ia na dava bada kohudia e haboumu gabuna amo kohu matamatadia bona gunadia e abi lasimu.”

53 Iesu na unu haheitalai e gwauraidia murinai, una gabu e rakatania. 54 Ena hanua ai e kau murinai, sinagog* ai taunimanima e hadibadia matama, bena idia na e hoa bona eto: “Ina tau ena aonega bona hoa karadia e karamu siahuna be ede amo e abi? 55 Ia be dia kapenta tauna natuna, a? Ia sinana ladana be dia Maria, bona tadina be dia Jeims, Josef, Saimon bona Judas, a? 56 Taihuna veridia danu dia nonoho ita padadai, a? Ini iboudiai be ede amo e abi?” 57 Una dainai idia na asie ura ia bae abidadama henia. To Iesu ese e hamaorodia, eto: “Peroveta tauna na gabu iboudiai lalodiai be matauraiamu, to ena hanua bona ruma ai mo basie matauraiamu.” 58 Bona unuseniai ia ese hoa karadia momo se kara badina idia na asi edia abidadama.