Metiu ese E Torea

18 Una hora ai Iesu ena disaipol na ia dekena ema bena, eto: “Guba Gavamanina ai daika be bada?” 2 Una dainai Iesu na natu maraḡina ta e boiria, bogaraḡidiai e haginia 3 bena eto: “Lau ese na hamaoromui momokanimu, guba Gavamanina ai ba vareai helaoreana, namona na natu maraḡidia heḡereḡeredia, emui kara na ba haidau vaitani. 4 Una dainai, ina natu maraḡina heḡereḡerena sibona baine hahe-manau tauna na guba Gavamanina ai do baine bada; 5 bona lau ladagu ai natu maraḡina ta baine abia dae tauna ese lau danu baine abigu dae. 6 To ini e abidadama henigumu maraḡi-maraḡidia ta baine hahekwakwanaia tauna na aiona ai witi e hamakohiamu nadina, doniki ese e giroamu ḡauna bema kwatua kau, bena gadobada ai bema tahoa dobi hari namo.

7 “Tanobada madi ihabaina, hekwakwanai ḡaudia daidiai. Momokani hekwakwanai ḡaudia na bae vara, to unu hekwakwanai e havaramu tauna madi ihabaina. 8 Una dainai, bema imamu eiava aemu ese e hahekwakwanaimumu, ba utua oho bona ba negea. Badina be aemu tamona eiava imamu tamona ai mauri bavabia be namo, to imamu ruaosi eiava aemu ruaosi ida e ara hanaihanaimu lahina* ai bae tahomu vareai na dia namo. 9 Danu, bema matamu ese e hahekwakwanaimumu, ba kokia oho bona ba negea. Matamu tamona ai mauri bavabia be namo, to matamu ruaosi ida Gehena* lahina ai bae tahomu vareai na dia namo. 10 Nahuamui ba toho, ini maraḡi maraḡidia ta ba dadaraia na garina, badina na hamaoromuimu edia aneru guba ai ese Tamagu guba ai e nohomu vairana na e itaia hanaihanaimu. 11* ——

12 “Umui be dahaka o tomamu? Bema tau ta ena mamoe na 100, bona ta baine boio, ia ese ororo ai 99 basine rakatanidiamu bena e boio ḡauna basine ha tahuamu, a? 13 Bona bema baine davaria, lau ese na hamaoromui momokanimu, ia na una e davaria ḡauna dainai be moale badamu, una ese se boio mamoedia 99 ediai e abiamu moalena baine hereaia. 14 Una heḡereḡerena, Tamagu* guba ai e nohomu na se uramu ini maraḡi maraḡidia ta na baine mase.

15 “Danu, bema tadikakamu* na kara dikana ta e karaia, baola sibomui padamui ai ena kerere ba herevalaia bona ba hamaoromaoroa. Bema baine kamonai, oi ese ia na vada o durua dala maorona ma baine badinaia lou. 16 To bema se kamonaimu, ta o rarua ida baola, badina witnes rarua o tatoi edia hereva* daidiai ḡau iboudiai bae hamomokanidia. 17 To bema idia basine kamonai henidia, kongrigeisin* ba hadibaia. To bema ia ese kongrigeisin danu se kamonai heniamu, idau bese tauna ta bona tax gogo tauna ta heḡereḡerena ba kara henia.

18 “Lau ese na hamaoromui momokanimu, tanobada ai ba ḡui ḡaudia na guba ai vada e ḡui, bona tanobada ai ba ruha ḡaudia na guba ai vada e ruha. 19 Danu, ma na hamaoromui momokanimu, bema tanobada ai umui rarua na Tamagu guba ai ena amo mai anina bada ḡauna ta ba noia, ia ese do baine henimui. 20 Badina be rarua eiava tatoi lau ladagu ai bae hebou, lau na idia bogaraḡidiai baina noho.”

21 Bena Pita na ema bona Iesu e hereva henia, eto: “Lohiabada e, bema tadikakagu ena kara na didika egu ai, nega hida ena dika baina gwautao? Nega 7 eiava?” 22 Iesu eto: “Lau ese na hamaoromumu, dia nega 7, to nega 77.

23 “Una dainai, guba Gavamanina na king ta na heto, e ura ena hesiai taudia ese edia abitorehai davadia bae halou. 24 Edia abitorehai e gogo matama neganai, ia enai talent 10,000* e abitorehai tauna ta na king dekena e hakaua lao. 25 To ia enai na se heḡereḡere davana baine haloua dainai, king na e haheḡani ia, adavana, natuna, bona ena ḡau iboudiai bae hoihoilai, unu amo ena abitorehai davana baine haloua. 26 Una dainai una hesiai tauna na king vairanai e tui diho,* bona e gwa: ‘Nega taina do ba henigu, bena davana ibounai baina haloua.’ 27 Bena king ese e bogaia hisi dainai, e ruhaia bona ena abitorehai davana e gwaua tao. 28 To, una hesiai tauna na ela bona bamona hesiai tauna ma ta, ia enai 100 dinari* e abitorehai tauna, e davaria neganai aiona e gigia mokona e hamasea, bena e hamaoroa, eto: ‘Emu abitorehai ibounai ba haloua.’ 29 Bena bamona hesiai tauna na e tui diho bona e noia, eto: ‘Nega taina do ba henigu, bena davana baina haloua.’ 30 To, ia na se ura, a ela bamona hesiai tauna na dibura ruma ai e tahoa vareai, unuseniai baine noho ela bona ena abitorehai baine haloua. 31 Bena bamodia hesiai taudia ese e vara ḡauna e itaia neganai, e lalohisihisi bada, bena ela bona e vara ḡaudia iboudiai na king e habadelaia. 32 Bena king ese e boiria bona e hamaoroa, eto: ‘Oi na hesiai tauna dikana, o noigu dainai emu abitorehai ibounai na gwaua tao. 33 Oi danu bamomu hesiai tauna boma bogaia hisi lau ese na bogamu hisi heḡereḡerena, ani?’ 34 King na e badu dikadika dainai una hesiai tauna na dibura ruma ai e atoa, unuseniai baine noho ela bona ena abitorehai ibounai baine haloua. 35 Una heḡereḡerena, Tamagu guba ai ese danu umui na unu baine kara henimui toma, bema umui ta ta ese mai kudoumui idoinai tadikakamui edia dika basio gwau tao neganai.”