Metiu ese E Torea

9 Iesu na bouti ai e gui bena e hanai ena siti* ela. 2 Bena haida ese paralais tauna ta na geda* ai hekurena ai e mailaia. Iesu ese edia abidadama e itaia neganai, ia ese una paralais tauna e hamaoroa, eto: “Natugu e, asio lalohekwarahi. Emu dika vada eme hegwautao.” 3 Bena itorena taudia* na sibodia e hereva heheni, eto: “Ina tau na Dirava ihadikana herevadia e gwauraimu.” 4 Iesu na edia lalohadai e diba dainai, e gwa: “Dahaka dainai ḡau dikadia o lalomu? 5 Edena be haraḡa, baoto, ‘Emu dika vada eme hegwautao,’ eiava baoto ‘A tore isi, a raka’? 6 To na uramu baina hahedinaraia taunimanima Natuna na mai ena siahu tanobada ai dika baine gwautao.” Bena e hegiro paralais tauna e hereva henia, eto: “A tore isi, emu geda avabia bona emu ruma baola.” 7 Bena paralais tauna na e tore isi ena ruma ela. 8 Hutuma ese una e itaia neganai, e hoa dikadika bona Dirava e hanamoa, badina ia ese siahu unu bamona na taunimanima e henidiamu.

9 Bena Iesu na e raka hanaiva ai tau ta ladana Metiu e itaia, ia na tax gogo ofesina ai helai, bona e hereva henia, eto: “Aoma lau ba badinagu.” Bena ia na e tore isi Iesu murinai e raka. 10 Gabeai Iesu na Metiu ena ruma ai, teibol badinai helaina ai, tax gogo taudia bona kara dika taudia momo na ela bena ia bona ena disaipol ida e aniani hebou. 11 To Farisea taudia ese idia e itadia neganai, ena disaipol e nanadaidia, eto: “Dahaka dainai emui hahediba tauna na tax gogo taudia bona kara dika taudia ida e aniani heboumu?” 12 Iesu ese edia hereva e kamonai neganai, eto: “Asi edia gorere taudia ese dokta na se tahuamu, to gorere taudia hari. 13 Aola, ina hereva anina ba dibaia: ‘Lau na hebogahisi na uramu, to dia boubou ḡauna.’ Badina lau nama na dia kara maoromaoro taudia daidiai, to kara dika taudia daidiai.”

14 Gabeai Jon ena disaipol na Iesu dekena ela bena e nanadaia, eto: “Dahaka dainai ai bona Farisea taudia ese basio aniani taravatuna* a badinaiamu, to oiemu disaipol be lasi?” 15 Bena Iesu na e gwa: “Headava matamata tauna turana na basie lalohisihisimu badina ia na idia ida, ani? To negana baine kau headava matamata tauna na idia edia amo bae abia oho, bena idia na basio aniani taravatuna bae badinaia. 16 Ta ese dabua gunana hedarena latanai dabua matamatana na se turia kaumu, badina matamatana ese gunana be hahedareamu bona hedarena na be badamu. 17 Bona taunimanima ese wain matamatana na wain pusena* gunana ai asie bubuamu. Bema unu be kara tomamu wain pusena na be poumu, wain be hebubumu bena puse na be dikamu. To taunimanima ese wain matamatana na puse matamatana ai e bubuamu unu amo wain bona puse na asie dikamu.”

18 Iesu na unu e herevalaiva lalonai, hegunalai tauna ta na ela ia vairanai e tui diho,* bena e gwa: “Natugu na reana vada e hamase, to do aoma tauna ai bame dau kau bena baine mauri.”

19 Bena Iesu na e tore isi, bona ena disaipol ida ia murina amo ela. 20 Bona laḡani 12 rara moru gorerena e abia hahinena ta na Iesu murina amo ela bona ena dabua dorina ai e dau kau, 21 badina ia na lalona ai e gwauva: “Ena dabua dorina ai mo baina dau kau, vada baina namo.” 22 Iesu na e hegiro, hahine e itaia bena e gwa: “Natugu e, asio gari. Emu abidadama dainai vada ome namo.” Bena una hora amo hahine na vada e namo.

23 Iesu na hari hegunalai tauna ena ruma ai e vareai bena fluti* e gadaralaiva taudia bona hutuma e taitaiva e itadia neganai, 24 ia na eto: “A raka lasi, badina be kekeni maraḡina na se mase, a ia na mahuta.” Una nega ai, idia na ia e kirikirilaia. 25 Hutuma e raka lasi murinai, Iesu na kekeni maraḡina dekena ela, imana e dogoatao bena kekeni na e tore isi. 26 Oibe, una sivarai na una gabu ibounai lalonai e gwauraia.

27 Iesu na una gabu amo e raka e laova ai mata kepulu taudia rarua na ia murina amo ela, bona e boiva: “David Natuna e, ame bogamai hisi.” 28 Iesu na ruma ai e raka vareai neganai unu mata kepulu taudia raruosi na ia dekena ema, bena Iesu ese e nanadaidia, eto: “O abia daemu lau ese baina hanamomui, a?” Idia na e haere, eto: “Oibe, Lohiabada.” 29 Bena ia ese matadia e dau toho bona eto: “Emui abidadama dainai bo namomu.” 30 Bena matadia na e papa. To Iesu ese e hamaorodia, eto: “Ina na ta basine diba na namo.” 31 To idia e raka lasi neganai, una sivarai na gabu ibounai lalonai e gwauraia.

32 Unu tatau e raka ohova ai, taunimanima ese mu* tauna ta na Iesu dekena e mailaia, una tau na demoni ta ese e biagua. 33 Iesu ese una demoni e lulua lasi murinai, ia na vada e hereva. Una dainai hutuma na e hoa bona e gwa: “Israel ai nega ta ḡau ini hetomana ta asia itaia.” 34 To Farisea taudia na e gwauva: “Ia na demoni edia lohia ena siahu amo demoni e luludiamu.”

35 Iesu na siti bona hanua iboudiai e laova, bona edia sinagog* ai e hahedibava bona Dirava ena Gavamani sivaraina namona e harorolaiava bona gorere idauidau e hanamova. 36 Hutuma e itadiava neganai, e bogadia hisiva, badina idia na mamoe asi inaridia na heheto, taunimanima ese e hahisidiava bona e dadaraidiava. 37 Bena Iesu na ena disaipol e hamaorodia, eto: “Uma anianidia na momo, to igogodia taudia na dia momo. 38 Una dainai uma Biaguna ba noia ḡaukara taudia baine siaidia.”