Metiu ese E Torea

5 Iesu ese hutuma e itadia neganai, ia na ororo ela. Bena ia na e helai diho murinai, ena disaipol na ia dekena ema. 2 Bena ia ese idia e hadibadia matama, eto:

3 “Dirava e henimu ḡaudia iboudiai* hitolona e hitolomu taudia na e moalemu, badina be guba Gavamanina na idia edia.

4 “Taitai taudia na e moalemu, badina haida ese lalodia bae hagoada.

5 “Manau taudia na e moalemu, badina be idia ese tanobada bae noholaia.

6 “Kara maoromaoro e ura heniamu taudia na e moalemu, badina be Dirava ese edia ura ḡaudia na be henidiamu.

7 “Hebogahisi taudia na e moalemu, badina be idia na do bae bogadia hisi.

8 “Kudoudia na ḡoḡoeva taudia na e moalemu, badina be idia ese Dirava do bae itaia.

9 “Herohemaino taudia na e moalemu, badina be idia na bae gwauraidia Dirava natuna.*

10 “Kara maoromaoro dainai haida ese e daḡedaḡe henidiamu taudia na e moalemu, badina be guba Gavamanina na idia edia.

11 “Umui na lau daiguai taunimanima ese e hahisimuimu, e daḡedaḡe henimuimu bona latamui ai hereva koikoi e gwauraimu negadia ai, ba moale. 12 Gunaguna peroveta taudia na unu e kara henidia toma. Una dainai umui na ba moale, ba moale hisi dae, badina be guba ai ahumui na bada herea.

13 “Umui na tanobada damena na heto, to bema damena mamina e oremu, damena mamina be ede bavatoa lou toma? Una damena na basie ḡaukaralaia diba dainai murimuri ai bae negea bona taunimanima ese bae moimoilaia.*

14 “Umui na tanobada diarina na heto. Ororo latanai e hadaia siti na basine hehuni diba. 15 Taunimanima ese lamepa e ha’araiamu neganai, bosea henunai se atoamu, to teibolo latanai e atoamu, unu amo ruma taudia iboudiai ediai baine diari.* 16 Una heḡereḡerena, emui diari na taunimanima vairadiai ba hahedinaraia, unu amo idia ese emui kara namodia bae ita bona Tamamui guba ai na bae imodaia.

17 “Umui na basioto lau nama na Taravatu* bona Peroveta Taudia* edia hahediba herevadia baina hadikadia,* lasi, to lau nama na baina haḡuḡurudia. 18 Lau ese na hamaoromui momokanimu, ena be guba bona tanobada na bae ore diba, to Taravatu ena leta maraḡi-maraḡina ta* eiava una leta kahana ta na basine boio ela bona lalonai e tore ḡaudia iboudiai bae ḡuḡuru. 19 Una dainai, bema ta ese taravatu maraḡi-maraḡina ta baine tataia utu bona ia ese ma haida baine hadibadia unu bae kara toma, ia na dia heḡereḡere guba Gavamanina ai baine vareai. To bema ta na unu taravatu e badinamu bona e hahedibalaimu, ia na heḡereḡere guba Gavamanina ai baine vareai. 20 Badina be lau ese na hamaoromuimu, bema emui kara maoromaoro na itorena taudia* bona Farisea taudia* edia heḡereḡerena, umui na guba Gavamanina ai basio vareaimu, lasi ona lasi vaitani.

21 “Umui na vada o kamonai seneda na e hamaorodia, eto: ‘Umui na basio ala-ala. Baine ala-ala tauna na kota vairanai baine gini.’ 22 To lau ese na hamaoromuimu, tadikakana* e badu heniamu tauna na kota vairanai baine gini. Bona hereva dika rohorohodia amo tadikakana e gwauraia dikamu tauna na Kota Badana* vairanai baine gini. To bema ta ese tadikakana e hamaoroamu, ‘Oi na ḡau ta lasi, kava!’ ia na Gehena* lahina ai bae tahoa dobi.

23 “Bema oi ese emu harihari ḡauna o laohaia boubou patana bona unuseniai o helalotao tadikakamu na mai ena lalohisihisi oiemu ai, 24 namona na oi ese emu harihari ḡauna na boubou patana vairanai ba rakatania, bona oi na baola, tadikakamu ida ba herohemaino guna. Bena, una murinai oi na ba lou emu harihari ḡauna ba heni.

25 “Oi e samanimu tauna ida kota gabuna ai do asio kau ai, emui hekwakwanai na ba hamaoromaoroa haraḡa. Unu amo ia ese hahemaoro tauna imana ai basine atomu bona hahemaoro tauna ese gadi tauna imana ai oi na basine atomu, bena dibura ruma ai basine tahomu vareai. 26 Lau ese na hamaoromu momokanimu, oi na dibura ruma ai ba noho ela bona emu abitorehai monina* ibounai ba heni.

27 “Umui na vada o kamonai, eto: ‘Umui na basio heudahanai.’ 28 To lau ese na hamaoromuimu, tau ta na hahine ta baine raraia ela bona baine ḡahusia, ia na kudouna ai vada e heudahanai. 29 Bema oi na matamu idibana* ese e hahekwakwanaimumu, ba kokia* bona ba negea. Badina be matamu kahana baine boio be namo, to tauanimu idoinai Gehena* ai bae negea be dika. 30 Bema oi na imamu idibana ese e hahekwakwanaimumu, ba utua oho bona ba negea. Badina be imamu kahana baine boio be namo, to tauanimu idoinai Gehena* ai bae negea be dika.

31 “Bona vada o kamonai, eto: ‘Adavana e divosiamu tauna ese divos pepana* baine henia.’ 32 To lau ese na hamaoromuimu, tau ese adavana na basine divosia kava. Bema tau ese adavana baine divosia kava, una na dia maoro badina una ese dala be kehoamu hahine baine heudahanai* totona, bona una hahine baine adavaia tauna danu vada heudahanai tauna ai bainela. Tau ese adavana baine divosia diba negana tamona binai: Bema ia ese e adavaia hahinena na matabodaḡa* karadia e kara.

33 “Bona ma o kamonai seneda na e hamaorodia, eto: ‘Umui na basio gwauhamata kava, to Iehova* enai o kara gwauhamatadia na ba haḡuḡurudia.’ 34 A lau ese na hamaoromuimu: Umui na guba ladana ai basio gwauhamata, lasi ona lasi vaitani, badina be una na Dirava ena helai gabuna.* 35 Bona umui na tanobada ladana ai basio gwauhamata, badina be una na ia aena e atoamu gabuna bona umui na Jerusalem ladana ai basio gwauhamata, badina be una na King badana* ena siti. 36 Bona kwaramu ladana ai basio gwauhamata, badina be hui ta basio hakurokuroa eiava basio hakoremaia diba. 37 Namona na emui ‘Oibe’ be oibe, emui ‘Lasi’ be lasi, badina be ena hereva se badinaiamu tauna na Dika Tauna* ena amo.

38 “Vada o kamonai, eto: ‘Mata davana be mata bona ise davana be ise.’ 39 To, lau ese na hamaoromuimu: E hahisimuimu tauna na basio dadaraia. A ta ese vahamu idibana e pataiamu, kahana danu ba mede henia. 40 Bema ta na e uramu oi na kota ai baine atomu bona emu dabua* baine abia, latanai o rioa dabuana danu ba heni; 41 bona bema mai ena dagi tauna ta* ese baine haḡanimu ḡau metauna ta ba huaia bona kilomita* ta heḡereḡerena ba raka, namona na ia ida kilomita rua ba raka. 42 Oiemu ai e noinoimu tauna ena noinoi ḡauna na ba henia, bona oiemu ai e uramu baine abitorehai* tauna na basio dadaraia.

43 “Vada o kamonai, eto: ‘Dekemu tauna ba lalokau henia bona inaimu ba inai henia.’ 44 To, lau ese na hamaoromuimu: Umui ese inaimui na ba lalokau henidia bona e daḡedaḡe henimuimu taudia daidiai ba ḡuriḡuri, 45 unu amo umui na Tamamui guba ai e nohomu natuna ai baola. Badina be ia ese dina na kara dika bona kara namo taudia ediai e hadaeamu bona ia ese medu na kara maoromaoro taudia bona asi edia kara maoromaoro taudia latadiai e hadihoamu. 46 Bema umui na e lalokau henimuimu taudia mo ba lalokau henidia, ahumui be dahaka? Tax gogo taudia* danu unu e kara tomamu, ani? 47 Bona bema umui na tadikakamui ediai mo hahenamo herevadia o gwauraimu, o laloamu una be kara idau hereana ta, a? Idau bese taudia* danu unu e kara tomamu, ani? 48 Una dainai namona na umui na ba ḡoevadae, badina Tamamui guba ai na ḡoevadae.*