Amos
Mata-hanai toi
7 Bena Ḡaubada Iehova ese e haheitalaigu, ia ese kwadi e haboudia heḡaeḡaeva, rei matamatana e tubu louva negana ai; una na rei ena tubu iharuana, pavapava ena rei vada e utua murinai. 2 Unu kwadi ese tano reina vada e ania ore murinai, lau na hereva, nato:
Ḡaubada Iehova e, lau na noimumu, ba heboga hisi.
Iakob ede baine gini toma?
Ia na maraḡi herea.
3 Bena Iehova ese e helalolaia kerehai;
Iehova eto “Ina na basine hekara”.
4 Taunabunai Ḡaubada Iehova ese e haheitalaigu, na itaia, Ḡaubada Iehova ese hahemaoro e boilaia, lahi ḡauna; bena una lahi ese gadobada e hakaukauava bona tano e araiava. 5 Bena lau nato:
Ḡaubada Iehova e, lau na noimumu, a doko.
Iakob ede baine gini toma?
Ia na maraḡi herea.
6 Bena Iehova ese e helalolaia kerehai; Ḡaubada Iehova eto “Ina danu basine hekara”.
7 Ma e haheitalaigu, na itaia, Ḡaubada na gini-maoro varona amo e haginia habana badibadinai e gini, mai gini-maoro varona ta imana ai. 8 Bena Iehova ese e hereva henigu, eto, Amos e, dahaka o itaiamu? Lau nato, Gini-maoro varona ta. Bena Ḡaubada eto:
A itaia, gini-maoro varona ta
egu bese Israel bogaragidiai na atoamu;
nega ta ai basina lagaudia hanai lou.
9 Isaak ena atai gabudia bae ḡaḡae,
Israel ena gabu helaḡadia bae vahu;
bona Ieroboam ena iduhu na dare amo baina tuari henidia.
Amos bona Amasia
10 Bena Amasia, hahelaḡa tauna Betele ai, ese gwaukau e siaia, Ieroboam, Israel pavapavana, dekenai, eto, Amos ese oi ihadikamu dalana e karaia hatamu, Israel besena bogaraginai; tano taudia lalodia na asie heḡereḡere iena hereva iboudiai ihaheaukalaidia ai. 11 Badina be Amos na ini e gwau toma:
Ieroboam na dare amo do baine mase,
bona Israel taudia na edia tano amo bae abidia oho,
dauhai bae hanohodia.
12 Bena Amasia ese Amos e hamaoroa, eto, Mata-hanai taumu e, aola, Iuda tanona ba heau lao, unuseni ai bavaniani bona ba peroveta; 13 a nega ta ai Betele ai basio peroveta lou, badina be ina na hanua pavapavana ena gabu helaḡana bona basileia ena dubu.
14 Bena Amos ese Amasia e haere henia, eto, Lau na dia peroveta tauna, bona dia peroveta tauna natuna. Lau na mamoe bona sukamore audia ireḡudia tauna; 15 bena Iehova ese mamoe serina iḡavana amo e abigu. Bena Iehova ese e hamaorogu, eto, Aola, egu bese Israel ediai ba peroveta.
16 Taunabunai, Iehova ena hereva a kamonai.
Oi na o tomu “Israel taudia latadiai basio peroveta
bona Isaak iduhuna taudia latadiai basio haroro”.
17 Taunabunai Iehova ini e gwau tomamu:
Adavamu na ariara hahinena ai bainela, hanua lalonai;
natumu mamaruanedia bona hahinedia na dare ai bae mase,
bona emu tano na haida ese bae heharilaia;
oi na tano dia ḡoeva ai ba mase,
bona Israel na momokani edia tano amo bae abidia oho,
dauhai bae hanohodia.