Metiu ese E Torea

7 “Umui ese ma haida na basio hahemaoro henidia,* bena Dirava ese basine hahemaoro henimui. 2 Badina be umui ese haida o hahemaoro henidiamu heḡereḡerena do bae hahemaoro henimui, bona umui ese ma haida o kara henidiamu heḡereḡerena do bae kara henimui. 3 Dahaka dainai tadikakamu* matana ai momoru-momoru be o itaiamu, to oi matamu ai au badabada be so itaiamu? 4 Eiava dahaka dainai oi ese tadikakamu o hamaoroamu, ‘Matamu ai momoru-momoru aina kokia,’ to oi matamu ai be au badabada ta mia? 5 Koikoi taumu! Matamu amo au badabada ba kokia guna, unu amo ba roharoha namonamo, bena tadikakamu matana ai momoru-momoru ba kokia diba.

6 “Umui ese helaḡa ḡaudia na sisia basio henidia eiava pel* na boroma vairadiai basio nege, bae moimoilaidia bona bae hegiro, bae haberomui na garina.

7 “Ba noinoi loulou, bena bae henimu, ba hetahu goadagoada bena ba davaria, ba kokokoko loulou bena bae kehoa, 8 badina e noinoimu taudia na do bae henidia, bona e hetahumu taudia na do bae davari, bona e kokokokomu taudia na iduaradia do bae keho. 9 Umui daika be natuna parao be noimu neganai nadi be heniamu? 10 Eiava bema gwarume be noimu, gaigai be heniamu? 11 Una dainai, bema umui dika taumui na harihari ḡaudia namodia natumui ihenidia na mai dibamui, anina na, Tamamui guba ai e nohomu ese ia enai ḡau namodia e noimu taudia na be henidiamu.

12 “Una dainai ḡau iboudiai lalodiai, umui na o uramu taunimanima ese umui na bae kara namo henimui. Una heḡereḡerena, umui ese idia danu unu ba kara henidia toma. Una na Taravatu bona Peroveta Taudia* ese e hahedibalaia herevana.

13 “Umui na geidi hekahi-hekahina amo ba vareai, badina mase e lao heniamu dalana na bada, geidina danu lababa, bona momo na unu amo e vareaimu. 14 To mauri e lao heniamu dalana na maraḡi bona geidina danu hekahi-hekahi, bona una dala na haida ese mo e davariamu.

15 “Umui na peroveta taudia koikoidia daidiai nahuamui ba toho. Idia na dekemui e vasimu mamoe na heheto, to lalodia na uda sisiadia* na heheto. 16 Idia na huahuadia amo bo dibadiamu. Taunimanima ese greips na au mai hegwada-hegwadana amo asie abimu eiava fig na flaoa auna mai ḡiniḡinina amo asie abimu, ani? 17 Una heḡereḡerena, au namodia ese huahua namodia e havaramu, to au dikadia ese huahua dikadia e havaramu. 18 Au namona ese huahua dikana na basine havaraia diba, bona au dikana ese huahua namona na basine havaraia diba. 19 Huahua namodia asie havaramu audia iboudiai na bae utudia bena lahi ai bae tahodia vareai. 20 Momokani, peroveta taudia koikoidia na huahuadia amo bo dibadiamu.

21 “Dia bae hereva henigu, baeto ‘Lohiabada e, Lohiabada e,’ taudia iboudiai na guba Gavamanina lalonai bae vareai, to Tamagu guba ai e nohomu ena ura e karaiamu tauna mo. 22 Una dina ai momo ese bae hereva henigu baeto: ‘Lohiabada e, Lohiabada e, oi ladamu ai asia peroveta, a? Oi ladamu ai demoni asia luludia, a? Bona oi ladamu ai hoa karadia asia kara, a?’ 23 Bena lau ese baina hamaorodia bainato: ‘Kara havara taumui e, dauha aola! Lau na asi dibagu umui!’

24 “Una dainai, egu hereva e kamonaimu bona e badinamu taudia na aonega tauna na heto, iena ruma na nadi latanai e haginia. 25 Bena medu bada herea e diho, abata e dae, bona lai bada herea e toa, to una ruma na se moru, badina nadi latanai e haginia. 26 A egu hereva e kamonaimu to se badinamu taudia na kavakava tauna na heto, iena ruma na miri latanai e haginia. 27 Bena medu bada herea e diho, abata e dae, bona lai bada herea e toa. Bena una ruma na e kohu bona e heḡiḡi rohoroho.”

28 Iesu ese ena hereva e hadokoa murinai, hutuma ese ena hahediba dalana na e hoalaia, 29 badina ia na Dirava ese siahu e henia heḡereḡerena ai e hahedibava, to itorena taudia* be dia unu bamona.