Metiu ese E Torea

8 Iesu na ororo amo e diho murinai, hutuma bada na ia murina amo e raka. 2 Bena lepera tauna ta na ia dekena ela, ia vairanai e tui diho,* bona eto: “Lohiabada e, bema o uramu, ba haḡoevagu.” 3 Una dainai Iesu na imana e toia roro, e daua toho, bona eto: “Na uramu. Vada a ḡoeva.” Bena maoromaoro una lepera tauna na e ḡoeva. 4 Bena Iesu ese e hamaoroa, eto: “Tau ta basio hamaoroa, to baola, prist vairanai ba hedinarai, bona harihari ḡauna ba heni Mose ese e gwauraia heḡereḡerena, unu amo bae itamu oi na vada o ḡoeva.”

5 Iesu na Kapenaum ai e vareai neganai, tuari biaguna ta* na ia dekena ela, e noia goadagoada, 6 eto: “Tau badana e, egu hesiai tauna na e paralais dainai ruma ai hekure, e hisihisi bada hereamu.” 7 Iesu ese e hamaoroa, eto: “Unu bainala neganai, baina hanamoa.” 8 To tuari biaguna na eto: “Tau badana e, lau be daika be egu ruma ai ba raka vareai? Mani a hereva mo, bena egu hesiai tauna na baine namo. 9 Badina lau danu haida edia siahu henunai na ḡaukaramu, bona soldia haida na lau henuguai e ḡaukaramu. Ta na hamaoroamu, ‘Aola!’ vada e laomu, bona ma ta na hamaoroamu, ‘Aoma!’ vada e maimu, bona egu hesiai tauna na hamaoroamu, ‘Ina a karaia!’ vada e karaiamu.” 10 Iesu ese una hereva e kamonaia neganai, ia na e hoa bona murinai e raka taudia e hamaorodia, eto: “Lau na na hereva momokanimu, ina tau ena abidadama na bada herea, Israel ai ta asina itaia ena abidadama na unu bamona. 11 Bona lau ese umui na hamaoromuimu, momo na east bona west kahadia amo be maimu, bona guba Gavamanina lalonai Abraham, Isaak bona Jeikob ida teibol ai be helaimu. 12 A Dirava ese e boiridia ena Gavamani ai bae vareai taudia na murimuri diburana ai bae tahodia lasi. Unuseniai idia na bae tai bona gadigadidia bae hahedai.” 13 Bena Iesu ese tuari biaguna e hamaoroa, eto: “Aola, emu abidadama dainai, emu noinoi ḡauna baine vara.” Bena maoromaoro ena hesiai tauna na una hora ai e namo.

14 Bona Iesu na Pita ena ruma ai e vareai neganai, Pita ravana hahinena e itaia, tauna na siahu dainai hekure. 15 Bena Iesu na ia imana ai e dau kau, bona hahine na e namo, bena e tore isi ia isiaina e lao heni matama. 16 To dina e dihova ai, demoni ese e biagudia taudia momo na Iesu dekena e laohaidia. Bona ia na ena hereva amo demoni e luludia, bona gorere taudia iboudiai e hanamodia. 17 Unu amo Dirava ese peroveta tauna Isaia amo e gwauraia herevana na e ḡuḡuru, eto: “Ia ese emai gorere e hanamo bona e hahisimaimu ḡaudia e kokidia.”

18 Iesu ese hutuma e itadia neganai, ena disaipol e hamaorodia ia ida bouti amo gohu kahana baela. 19 Bena itorena tauna* ta na Iesu dekena ema bona e gwa: “Hahediba tauna e, lau na oi baola gabudia iboudiai lalodiai baina badinamu.” 20 To Iesu ese e hamaoroa, eto: “Uda sisiadia na mai edia kohua bona guba manudia na mai edia ruma, to taunimanima Natuna* na asi ena mahuta gabuna.” 21 Bena disaipol ma ta na eto: “Lohiabada e, mani do ainala tamagu do baina ha guria guna.” 22 Iesu na eto: “Oi na lau a badinagu,* bona mase taudia* be edia mase bae guridia.”

23 Bena Iesu bona ena disaipol na bouti ai e gui. 24 Una murinai lai badana ta e toa bona bouti na hurehure ese e ḡovaia ahu. Una dainai bouti na ranu amo e honu, a Iesu be mahuta. 25 Bena idia ese Iesu e haoa, eto: “Lohiabada e, a durumai! Ita na vada baita masemu.” 26 To ia ese e hamaorodia, eto: “Abidadama maraḡi-maraḡi taumui e, dahaka dainai o garimu?”* Bena ia na e tore isi, lai bona hurehure e haḡanidia bae doko, bena nega na e namo lou. 27 Una dainai hahediba taudia na e hoa bona e gwa: “Ina tau be tau ede bamona be lai bona hurehure ese danu erena e kamonaiamu?”

28 Idia na gohu kahana ela bena Gadarens hanuana ai e ginidae. Unuseniai demoni ese e biagudia tataudia rarua na gara* gabuna amo e lasi bona ia ida e hedavari. Unu tatau na e daḡedaḡeva dainai, taunimanima na e gariva una dala amo bae raka hanai. 29 Bona idia na e lolo, eto: “Dirava Natuna e, emai amo dahaka o uramu? Oi be e abia hidi negana do se kau ai ipanisimai oma, a?” 30 Gabu taina daudauna ai be boroma serina ta e anianiva. 31 Bena unu demoni na ia e noia matama, eto: “Bema bo lulumaimu, boma siaimai lao boroma lalodiai.” 32 Bena ia ese e hamaorodia, eto: “Aola!” Bena idia na ela bona boroma lalodiai e vareai. Bena unu boroma iboudiai na hagahaga amo e roho-roho dobi bona gohu lalonai e mase. 33 To unu boroma e nariva taudia na e heau, bona e vara ḡaudia iboudiai na siti lalonai e sivarailai. Demoni ese e biagudia taudia sivaraidia danu e gwaurai. 34 Una dainai, una siti taudia iboudiai na Iesu dekena ela bona e itaia neganai, e noia una gabu baine rakatania.