Salamo

7 Iehova e, egu Dirava, lau oi na abidadama henimumu;

e havagumu taudia edia amo ba harohogu mauri, ba hamaurigu,

 2 leona na heto bae daregu na garina,

asi ihamaurigu bae verigu oho na garina.

 3 Iehova e, egu Dirava, ini bama kara toma,

eiava imagu bema kerere,

 4 eiava turagu bama kara dika henia,

eiava inaigu ena ḡau bama dadi kava.

 5 Inaigu ese baine havagu ela bona baine lasigu tao,

egu mauri na tano ai baine moia tao,

bona laumagu na ḡahu ai baine moimoilaia. (Selah)

 6 Iehova e, mai badumu ida a tore isi,

lau inaigu edia badu ba laoa ahu totona a tore isi;

Egu Dirava e, a noga,

hahemaoro vada o haheḡanilaia.

 7 Bese idau-idau edia hegogo ese baine ḡeḡemu ahu;

atai ai ba helai, idia daediai.

 8 Iehova ese bese idau-idau e hahemaoro henidiamu:

Iehova e, egu kara maoromaoro bona egu lalo-ḡoevaḡoeva heḡereḡeredia ba hahemaoro henigu.

 9 Kara havara taudia edia dika ba hadokoa,

a kara maoromaoro taudia do ba haginidia;

badina be oi na kara maoromaoro Diravana,

taunimanima daradia bona lalodia o dibadiamu.

10 Dirava na egu kesi,

ia ese lalo-ḡoevaḡoeva taudia e hamauridiamu.

11 Dirava na hahemaoro tauna, mai ena kara maoromaoro;

dina iboudiai Dirava ese kara dika e badu heniamu.

12 Tau ta basine helalo kerehai,

Dirava ese ena dare baine segea.

Ena peva vada e beua, vada e rohea,

13 ena ala-ala ḡaudia vada e abi heḡaeḡae,

ena diba na lahi dibadia ai e halaodiamu.

14 A itaia, kara havara tauna ese dika e havaraiamu,

kara dika ai e rogorogomu,

koikoi daladia e havaramu.

15 Ia ese guri e ḡeia dobumu,

bena e ḡeia gurina lalonai e moru dobimu.

16 Ena kara dika na sibona kwarana ai ma e kaumu,

ena daḡedaḡe na sibona tubuana ai e dihomu.

17 Iehova baina hanamoa, ena kara maoromaoro dainai,

Iehova, atai doriva-doriva Diravana, ladana baina imodaia.