Metiu ese E Torea

6 “Nahuamui ba toho, dia namo kara namodia ba kara,* taunimanima ese bae ita helaoreana. Unu bo kara tomamu neganai, Tamamui guba ai e nohomu ena amo hahenamo ta basio abiamu. 2 Una dainai umui ese harihari ḡaudia o henimu neganai, kibi na basio hiriri, koikoi taudia ese sinagog* bona dala ai e karamu heḡereḡerena, badina be idia na e uramu taunimanima ese bae imodaidia. Lau ese na hamaoromui momokanimu, idia davadia na vada e abi. 3 To, umui ese harihari ḡaudia na ogoḡami taudia o henidiamu neganai, imamu laurina* ese imamu idibana* e karaiamu ḡauna na basine diba, 4 unu amo emui harihari ḡaudia na bae hehuni.* Bena Tamamui, gabu hehunina amo e itamuimu ese davamui baine heni.

5 “Danu, o ḡuriḡurimu neganai, koikoi taudia basio tohotohodia, badina be idia na e uramu taunimanima ese bae itadia dainai, sinagog ai bona dala badadia badidiai e ginimu bena e ḡuriḡurimu. Lau ese na hamaoromui momokanimu, idia davadia na vada e abi. 6 To o ḡuriḡurimu neganai, daiutu ai ba vareai, bena iduara ba koua murinai, Tamamui, gabu hehunina ai e nohomu na ba ḡuriḡuri henia. Bena Tamamui, gabu hehunina amo e itamuimu ese davamui baine heni. 7 Umui na o ḡuriḡurimu neganai, tanobada taudia heḡereḡeredia basio kara, ḡau tamodia basio gwaurai loulou, badina be idia na e laloamu unu e kara tomamu neganai edia ḡuriḡuri na Dirava ese e kamonaimu. 8 Una dainai umui ese idia na basio tohotohodia, badina be Tamamui na mai dibana emui dabu* ḡaudia be dahaka, ena be umui ese ia na do asio noia.

9 “A umui na ini ba ḡuriḡuri toma:

“‘Tamamai e, guba ai o nohomu, oi ladamu ba hahelaḡaia. 10 Emu Gavamani bainema. Emu ura tanobada ai baine vara, guba ai e varamu na heto. 11 Hari dina ai emai aniani* bame heni, 12 bona emai dika* ba gwautao, ai ese e hadikamaimu taudia edia dika a gwautaomu heḡereḡerena. 13 Mani ba durumai kara dika* ai basia moru, to Dika Tauna* imana amo ba ruhamai.’*

14 “Bema umui ese taunimanima edia dika bo gwautaomu, Tamamui guba ai ese danu emui dika be gwautaomu. 15 To bema umui ese taunimanima edia dika basio gwautaomu, Tamamui ese danu emui dika na basine gwautaomu.

16 “Umui na basio aniani taravatuna* o badinaiamu neganai, lalohisihisi toana na basio hahedinaraia,* koikoi taudia heḡereḡeredia, badina be idia na vairadia toadia e hadikamu unu amo taunimanima na bae lalo idia na una taravatu e badinaiamu. Lau ese na hamaoromui momokanimu, idia davadia na vada e abi. 17 To umui ese basio aniani taravatuna o badinaiamu neganai, kwaramui ai oela bavato bona vairamui ba huri, 18 unu amo taunimanima na basie diba umui na una taravatu o badinaiamu, to Tamamui, gabu hehunina ai e nohomu mo baine diba. Bena Tamamui, gabu hehunina amo e itamuimu Tauna, ese davamui baine heni.

19 “Tanobada ai dava bada kohudia na basio habou,* badina be pitopito* bona rasta ese e hadikamu bona henaohenao taudia ese e henaomu. 20 To, guba ai emui dava bada kohudia ba habou, badina be pitopito bona rasta ese basie hadikamu bona henaohenao taudia ese danu basie henao dibamu. 21 Badina be emui dava bada kohudia e miamu gabuna ai, kudoumui* danu unuseniai.

22 “Mata na lamepa na heto.* Una dainai, bema matamu na namo,* tauanimu idoinai baine diari. 23 To bema matamu na dika,* taumu idoinai baine dibura. Una dainai, bema lalomu diarina baine dibura, una dibura na baine bada herea!

24 “Ta ese biagu rarua isiaidia na basine lao heni diba. Badina be ta baine inai henia, ta be baine lalokau henia, eiava ta baine badinaia, a ta be baine dadaraia. Dirava isiaina o lao henimu lalonai Taḡa isiaina na basio lao heni diba.

25 “Una dainai lau ese na hamaoromuimu: Emui mauri* ai dahaka bavani, eiava dahaka ba inu, eiava ededia dabua ba kara na basio lalohekwarahilai.* Mauri ese aniani e hereaiamu, bona tauani ese dabua e hereaiamu, ani? 26 Guba manudia a itadia; asie hadohadomu, asie ḡeiḡeimu bona kohu habou rumadia ai adia asie haboumu, to Tamamui guba ai ese e ubudiamu. Umui ese idia asio hereadiamu, a? 27 Umui daika be ena lalohekwarahi amo ena mauri taina baine hadaudaua* diba? 28 Bona dahaka dainai umui na dabua o lalohekwarahilaimu? Mani flaoa* e tubumu dalana ba haeroa; ena be asie ḡaukaramu bona asie turiturimu, 29 to lau ese na hamaoromuimu, Solomon ena kohu momo na mai hairaidia, to unu ḡau ta ese flaoa hairaina se hereaia. 30 Umui abidadama maraḡi-maraḡi taumui e, bema Dirava ese tubutubu ḡaudia, hari mimia to kerukeru lahi ai bae taho kau ḡaudia na e hahairaidiamu, o laloamu Dirava ese dabua basine henimui, a? 31 Una dainai basio lalohekwarahi bona basioto: ‘Dahaka baita animu?’ eiava ‘Dahaka baita inumu?’ eiava ‘Ededia dabua baita karamu?’ 32 Unu ḡau iboudiai na idau bese taudia ese e tahu goadagoadamu. To, Tamamui guba ai na mai dibana unu na emui dabu ḡaudia.

33 “Hanaihanai Dirava ena Gavamani bona ena kara maoromaoro* na emui mauri lalonai bavatodia guna, bena unu ḡau iboudiai baine henimui. 34 Una dainai kerukeru ḡaudia na basio lalohekwarahilai, badina be kerukeru na mai ena lalohekwarahi. Dina ta ta na mai edia lalohekwarahi.