Iona

Egu dara-doko ai Iehova na hahanea,

bena ia ese e haere henigu;

Mase gabuna lalona amo na tai,

bena oi ese lau gadogu o kamonai.

 3 Badina be dobu gabuna ai o tahogu dobi,

davara bogaragidiai;

utu-utu ese e ha-utugu dae,

emu hurehure bona emu sinaia ese e habubunigu.

 4 Bena lau nato “Oi vairamu amo

vada o negegu daure,

emu dubu helaḡana

ede baina itaia lou toma?”

 5 Davara ese e habubunigu,

dobu gabuna ese e ḡeḡegu ahu,

alaga ese kwaragu e ḡovaia ahu,

 6 ororo e badidia gabudia ai.

Ikoukouna ese e kougu hanaihanaimu tanona

na diho henia;

a oi ese egu mauri na Guri amo o rauaia,

Iehova e, egu Dirava.

 7 Laumagu e daure negana ai

lau ese Iehova na laloa tao;

egu ḡuriḡuri na e dae vasi,

emu dubu helaḡana ai.

 8 Kaivakuku asi anidia e matauraidiamu taudia ese

edia heabidadama ḡauna korikorina e rakataniamu.

 9 A lau ese oi baina boumu,

mai egu hahenamo herevadia ida,

egu gwauhamata baina hamomokanidia.

Hahemauri na Iehova enai.

10 Bena Iehova ese una gwarume e hereva henia; bena una gwarume ese Iona e kakaia lasi, tano kaukauna ai.