Salamo

9 Iehova baina hanamoa mai lalogu idoinai:

emu hoa karadia iboudiai baina herevalaidia.

 2 Baina moale, oi baina imodaimu,

oi ladamu ihanamolaina anena baina abia,

Herea-Mikamika Diravana e!

 3 Lau inaigu e raka kerehai negana ai,

e hekwakwanai bona e mase oi vairamu ai.

 4 Badina be egu dala maoromaorona vada o hamomokania,

terono ai vada o helai, hahemaoro maoromaorona vada o karaia.

 5 Bese idau-idau vada o gwau henidia,

kara dika taudia vada o habuadia tari;

ladadia vada o Ialodia nege ela bona hanaihanai.

 6 Inai taudia vada e dika hanaihanai, vada e puki;

edia hanua vada o raḡadia oho,

ilalotaodia vada e boio.

 7 A Iehova na terono ai e helai hanaihanaimu,

ena terono vada e haginia, hahemaoro totona;

 8 ia ese tanobada e hahemaoro heniamu mai maoromaorona ida,

tanobada besedia e hahemaoro henidiamu mai maoromaorona ida.

 9 Haida ese e daḡedaḡe henidiamu taudia edia kohoro na Iehova,

ia na edia kohoro, dika negadia ai.

10 Oi ladamu dibadia taudia ese e abidadama henimumu,

badina be, Iehova e, oi vada e tahumu taudia na asio rakatanidia.

11 Iehova, Siona ai e nohomu Diravana, ba imodaia!

Iena kara na bese idau-idau bogaragidiai ba herevalaidia!

12 Badina be rara davana iabina Diravana ese e lalodiamu;

haida ese e daḡedaḡe henidiamu taudia edia taitai na ia ese se laloa boiomu.

E inai henigumu taudia edia amo na abi hisidia na ba itadia,

mase ikoukoudia amo o abigu isimu Diravana e!

14 Bena oi ihanamolaimu herevadia iboudiai baina gwaurai;

Siona natuna kekenina ena ikoukou ai emu hahemauri baina moalelaia.

15 Bese idau-idau na sibodia e ḡei guridia lalodiai vada e moru dobi;

sibodia e otoa huona ai aedia vada e headai,

16 Iehova na sibona e hahedinarai, hahemaoro vada e karaia;

kara dika taudia na sibodia imadia karadia ai vada e heidoa. (Higgaion. Selah)

17 Kara dika taudia na mase taudia edia gabu baela;

Dirava e laloa boiomu besedia iboudiai na unu baela.

18 Badina be e dabumu taudia na basine lalodia boio hanaihanai,

bona ogoḡami taudia edia helaro na basine mase hanaihanai.

19 Iehova e, a tore isi! Taunimanima na basie kwalimu;

bese idau-idau na oi vairamu ai bae hahemaoro henidia.

20 Iehova e, ba hagaridia!

Bese idau-idau taudia bae diba idia na taunimanima mo. (Selah)