Roma

Kara dika enai vada ta mase

6 O edeheto: kara dikadia ma baita kara loulou, harihari-bada ihabadana helaoreana a? 2 Lasi vaitani. Ita ese kara dika na vada ta masetania, be ede baita lou henia toma? 3 Asi dibamui a, Keriso Iesu ladana ai e bapatisoda tauda na ena mase ai vada e bapatisoda? 4 Taunabunai, bapatiso ai ita na ia ida ta mase bona ia ida e gurida; bena Keriso na mase amo Tamana hairaina ai e tore isi lou heḡereḡerena ita danu mauri matamatana lalonai baita raka. 5 Badina be ia ida tama mase bou, ia ida danu tama tore isi lou. 6 Dibada ita tauda gunadia na ia ida satauro ai e mase, kara dika iha-orena; taunabunai, ita na kara dika isiaina basita lao heni lou. 7 Mase tauna na kara dika ena amo vada e roho mauri.

8 Benaini, ita na Keriso ida tama mase hebou, dibada ia ida danu tama mauri hebou. 9 Bona dibada Keriso na mase amo vada e tore isi dainai ia na basine mase lou; mase na asi siahuna ienai. 10 Badina be e mase negana ai, ia na kara dika enai e mase vaitani, a e maurimu be Dirava enai e maurimu. 11 Unuhetomana, umui danu sibomui unu na ba helalolai: kara dika enai vada o mase, Dirava enai vada o mauri, Keriso Iesu iseda Lohiabada bagunai.

12 Kara dika ese tau-animui basine lohiadia; ena hekise-hekise basio kamonai henia. 13 Bona taumui regedia na kara dika basio henia, isiaina basie lao heni; a taumui na Dirava ba henia, mase amo e roho mauri taudia na heheto, bona taumui regedia danu ia ba henia, kara maoromaoro ikarana ḡaudia ai baela. 14 Kara dika ese basine lohiamui, badina be taravatu henunai asio nohomu, a harihari-bada henunai o nohomu.

15 Edeheto? Taravatu henunai asita nohomu a harihari-bada henunai ta nohomu dainai baita kara dika a? Lasi ona lasi vaitani. 16 Asi dibamui a, erena o kamonaimu tauna ena hesiai ai baola, o kamonai heniamu dainai? Kara dika isiaina ba lao heni, mase bavabia; eiava kamonai korikori isiaina ba lao heni, kara maoromaoro bavabia. 17 Dirava baita hanamoa, badina be gunaguna umui na kara dika isiaina o lao heniva, a harihari a hadibamuiva herevana vada o kamonai henia mai daramui ida. 18 Kara dika amo e ruhamui nege; kara maoromaoro enai vada e ḡuimui kau. 19 Taunimanima edia hereva kava heḡereḡeredia ai na gwauraimu, tau-animui edia manoka-manoka dainai. Badina be gunaguna taumui regedia ese kara dika bona lebulebu isiaidia e lao heniva heḡereḡerena, harihari taumui regedia ba heni, kara maoromaoro isiaina ilao-henina ai bae helaḡa. 20 Kara dika isiaina o lao heniva negana ai, umui na kara maoromaoro enai o heruha negeva.

21 Ḡau tamona, harihari o hemarailaimu karadia o karava negana ai anidia be dahaka emui ai? Unu ḡau dokodia na mase. 22 A harihari, kara dika amo vada o heruha nege, Dirava ena hesiai ai vada ola, anina emui ai be vada o helaḡa, bona dokona be mauri hanaihanai. 23 Badina be kara dika davana be mase; a Dirava ena harihari ḡauna na mauri hanaihanai, Keriso Iesu iseda Lohiabada bagunai.