Salamo

84 Iehova Sabaota e,

emu noho gabuna na mai hairaina.

 2 Lau laumagu na e ḡanaḡanamu,

Iehova ena maḡu e mase heniamu;

lalogu bona hidiogu na moale anedia e abimu,

mauri Diravana ena.

 3 Iehova Sabaota e,

egu pavapava, egu Dirava,

bisini na ena noho gabuna e davariamu,

emu pata helaḡana enai;

aibisi danu ena ruma unuseni ai e karaiamu,

bona natuna e havaradiamu.

 4 Emu ruma ai e nohomu taudia na nanamo,

idia ese oi ihanamomu anedia e abi hanaihanaimu. (Selah)

 5 Edia goada oiemu amo e abiamu taudia na nanamo,

Siona ilao-henina daladia na idia lalodia ai.

 6 Baka kourana e rakaia hanaimu negana ai,

idia ese ranu lohilohi gabuna ai e halaoamu;

medu matamana ai danu,

una koura na gohugohu ai e hahonuamu.

 7 Edia goada na e bada e laomu;

dirava edia Dirava na Siona ai baine hedinarai.

 8 Iehova Sabaota e, egu ḡuriḡuri a kamonaia;

Iakob ena Dirava e, a hakala henigu. (Selah)

 9 Dirava e, emai kesi a itaia;

o horoa tauna vairana ba haḡerea.

10 Badina be dina tamona emu maḡu ai ese

dina daha idau gabu ai na e hereadiamu;

egu Dirava ena ruma iduarana inarina ai bama lao hari namo herea,

a kara dika taruhadia ai bama noho na dia namo.

11 Badina be Ḡaubada Iehova na dina bona kesi,

ia na harihari-bada bona hairai e henimu.

Iehova ese ḡau namona ta se ruamu,

e raka maoromaoromu taudia ediai.

12 Iehova Sabaota e,

oi e abidadama henimumu tauna be namo.