Ruta

3 Ravana Naomi ese Ruta e hereva henia, eto, Ravagu e, emu noho gabuna ta baina lailaia bena unuseni ai ba noho namonamo ani? 2 Varavarada Boa, ena hesiai hahinedia o bamodia tauna, na hari ina hanuaboi ena bali e tapoamu, ena gwada-gwada gabuna ai. 3 Taunabunai, a digu, kopimu dehoro amo ba dahua, emu dabua namona ba hahedokia, bena hari gwada-gwada gabuna baola; to ienai basio hedinarai ela bona baine aniani bona baine inuinu vaitani. 4 Bena baine hekure negana ai ena hekure gabuna do ba itaia, gabeai ba raka vareai, ena hetaru aena amo bavabia isi, ba hekure diho; bena ede ba kara toma ia ese baine hadibamu.

5 Ruta eto, Emu hahedua heḡereḡerena baina karaia. 6 Taunabunai ia na hari gwada-gwada gabuna ela, ravana ese e haduaia heḡereḡerena e karaia. 7 Boa na e aniani bona e inuinu vaitani, bena mai moalena ida e hekure diho, uit senuna gwaduna ai. Bena Ruta na asi reḡereḡena ela, hetaru na aena amo e abia isi, e hekure diho. 8 Malokihi, Boa na e noga, e hoa, e helai tore, hahine na e itaia, ia aena badinai e hekure. 9 Ia eto, Oi be daika? Hahine na e haere, eto, Lau binai Ruta, emu hesiai hahinena; emu hesiai hahinena ba tarugu, badina be oi na adavagu e mase tauna varavarana. 10 Boa eto, Natugu e, Iehova ese baine hanamomu; ina emu kara namona gini-gabena ese emu kara namona gini-gunana vada e hereaia: badina be oi na uhau, mai edia ogoḡami eiava mai edia taḡa, so sihari henidia. 11 Taunabunai, natugu e, basio gari; emu noinoi heḡereḡerena do baina kara henimu, badina be egu hanua taudia iboudiai dibadia oi na kara-namo hahinena. 12 Momokani, lau na adavamu e mase tauna varavarana; ḡau tamona, ia varavara-dosina ta do noho. 13 Hari hanuaboi iniseni ai ba noho. Daba ai, ia na baine ura baine adavamu, namo; a bema lasi, lau ese baina adavamu. Iehova maurina ladana ai na herevamu. A hekure diho ela bona daba.

14 Taunabunai, ia na ia aena badinai e hekure ela bona daba. Daba vaburana ai, taunimanima do basie heita heheni negana ai, ia na e tore isi. Boa ese e hahedua, eto, Tau ta basine diba hari hahine na gwada-gwada gabuna ema. 15 Bena ia ese hahine na e hereva henia, eto, O dokiamu dabuana a mailaia, avabia papa. Hahine na e abia papa, bena Boa ese bali efa tauratoi e uda, e henia, baine laohaia; bena hahine na hanua e lou lao.

16 Ravana dekenai e kau negana ai, ravana ese e nanadaia, eto, Natugu e, edeheto? Bena ia ese Boa ena kara idoinai sivaraina e gwauraia. 17 Ma eto, Ia danu bali efa tauratoiosi bini e henigu, eto “Ima kavakava ai ravamu basio lou henia”. 18 Ravana eto, Natugu e, ba henari ela bona ba diba ede baine kara toma: badina be hari tau na laḡana basine ania to hari dina ai ina ḡau baine haḡuḡurua.