Emai Pablikeisen Itorena Bona Ihahanaina Daladia be Dahaka?

“Sivarai namona” na “bese iboudiai, iduhu iboudiai, gado iboudiai, tano iboudiai” baia harorolaia namonamo totona, emai pablikeisen na gado 700 mai kahana ai a halasimu. (Apokalupo 14:6) Una ḡaukara badana be ede a karaia tomamu? Emai pablikeisen e toremu taudia bona gado e hahanaimu taudia 3,300 mai kahana edia heduru amo una ḡaukara a karaiamu. Idia na tano idau-idau amo bona iboudiai na Iehova ena Witnes taudia.

English ḡauna e heḡaeḡaelaia gunamu. Emai hedikwota ai, Heitatao Oreana ese Toretore Dipatmen ena ḡaukara e nariamu. Una dipatmen ese hedikwota bona brens ofesi haida ai e nohomu toretore taudia edia ḡaukara e henimu. Toretore taudia na tano idau-idau amo bona ḡau idau-idau e sivarailaimu dainai, momo na e uramu emai pablikeisen bae duahi.

English ḡauna na trensleisen dipatmen e siai heniamu. English ḡauna e hamaoromaoroamu bona e hamomokaniamu murinai, kompiuta amo brens iboudiai e siai henidiamu, bena haida ese edia gado ai e hahanaimu, e sekemu, bona e duahimu. English anina baine hedinarai namonamo totona, idia ese “hereva momokanidia” bona hereva maorodia e abi hidimu.—Kohelete 12:10.

Kompiuta na ḡaukara e haharaḡaiamu. Kompiuta program idau-idau daidiai, toretore bona gado hahanai taudia edia ḡaukara na e haraḡamu. Iehova ena Witnes taudia ese program ta e karaia, ladana na MEPS (Multilanguage Electronic Publishing System). Unu amo gado momo ai hereva bae taipi, laulau bae ato, bona bae printa diba.

Dahaka dainai emai pablikeisen na gado idau-idau ai a hahanaimu, ena be gado haida na momo ese se herevalaimu? Badina Iehova na “e uramu taunimanima iboudiai bae mauri bona hereva momokani bae diba.”—1 Timoteo 2:3, 4.

• Emai pablikeisen be ede e tore tomamu?

• Dahaka dainai emai pablikeisen na gado idau-idau ai a hahanaimu?