Kingdom Hall—Dahaka Dainai A Haginimu Bona Ede A Hagini Tomamu?

Kingdom Hall lalodiai, ai ese Dirava ena Basileia (o Kingdom) a hahedibalaiamu, badina una na Baibel ena hereva badana bona Iesu ena haroro herevana badana.—Luka 8:1.

Iehova a toma henia dihomu gabuna. Kingdom Hall lalodiai Basileia sivaraina namona iharorolaina daladia a dibamu. (Mataio 24:14) Emai Kingdom Hall haida be babada, a haida be mamaraḡi. Nega momo kongrigeisen rua o toi ese Kingdom Hall tamona e ḡaukaralaiamu. Laḡani gunadiai, Kingdom Hall matamatadia tausen momo vada a hagini (anina na dina tamona lalonai Kingdom Hall faiv bamona a haginimu) badina kongrigeisen na e hutumamu. Una be ede e vara tomamu?—Mataio 19:26.

Kingdom Hall ihaginidia monidia. Taunimanima edia harihari monidia na brens ofesi a siai laomu, bena e ḡaukaralaimu kongrigeisen haida edia Kingdom Hall bae hagini o bae hanamo diba.

Gabu idau-idau amo e maimu volentia taudia ese emai Kingdom Hall e haginimu. Tano momo ai una ḡaukara na Kingdom Hall Konstraksen Grup ese e karaiamu. Una grup na taoni o gunika kongrigeisen idau-idau e laomu, e durudiamu edia Kingdom Hall bae hagini. Tano haida ai, konstraksen ḡaukara mai dibadia lo Witnes taudia e abidia hidimu, Kingdom Hall ihaginidia bona ihanamodia ḡaukaradia bae nari totona. Konstraksen grup ese Kingdom Hall e haginimu negadiai kongrigeisen taudia danu e hedurumu. Iehova ena lauma helaḡa ena heduru bona ena taunimanima na mai kudoudia idoidiai e ḡaukaramu dainai, ḡaukara iboudiai na e heau namonamomu.—Salamo 127:1; Kolose 3:23.

• Dahaka dainai emai tomadiho rumadia a gwauraidiamu Kingdom Hall?

• Dahaka dainai tanobada heḡeḡemadai Kingdom Hall ihaginidia ḡaukarana na e heau namonamomu?