Sivarai Namodia Haida be Dahaka?

1. Dirava ese e halasimu sivaraidia be dahaka?

Dirava na e uramu taunimanima na tanobada ai bae noho bona bae moale. Ia ese taunimanima e lalokau henidiamu dainai, ina tanobada bona tanobada latanai e nohomu ḡaudia iboudiai e karadia. Kahirakahira, Dirava ese tanobada idoinai baine hanamoa, bena taunimanima ese bae noholaia. Ia ese taunimanima e hahisidiamu ḡaudia baine haoredia.​—Ieremia 29:11; 1 Timoteo 6:19 duahidia.

Idaunega amo ema bona hari, gavamani ta ese daḡedaḡe, gorere, o mase do se haoredia. To, sivarai namona binai: Kahirakahira, Dirava ena gavamani na tanobada gavamanidia iboudiai gabudia baine abi. Dirava ena gavamani henunai bae noho taudia na maino bona mauri ḡoevadaena bae moalelaia.​—Isaia 25:8; 33:24; Daniel 2:44 duahidia.

2. Dahaka dainai sivarai namodia na hari mai anidia bada?

Dirava ese ina tanobada amo taunimanima dikadia mo baine kokidia neganai, hisihisi danu bae ore. (Sefania 2:3) Una be edena negai baine vara? Baibel na ḡau haida e perovetalai. Hari, unu ḡau e varamu daidiai, taunimanima edia mauri na e dika e laomu. Una ese e hahedinaraiamu, Dirava ese kara ta baine karaia negana na kahirakahira.​—2 Timoteo 3:1-5 duahidia.

3. Dahaka baita kara na namo?

Namona na Baibel amo Dirava baita dibaia. Baibel na leta ta heḡereḡerena, tama lalokauna ta ese ita e siai henida bamona. Baibel ese hari baita noho namonamo dalana, bona tanobada matamatana ai baita mauri hanaihanai dalana e hadibalaidamu. Momokani, Baibel anina ba lalopararalaia totona haida amo heduru o abimu, to haida na basie moalemu. To, Dirava na e gwauhamata, vaira negadiai eda mauri baine hanamoa, una dainai, Baibel istadilaina karana basita hadokoa na ḡau badana.​—Hereva Lada-isidia 29:25; Apokalupo 14:6, 7 duahidia.