Edeseniai Helaro Korikorina Ba Davaria Diba?

EMU dina-ḡauna na se ḡaukaramu bona e dika. O uramu ba hanamoa neganai, abi hidi na momo. Dina-ḡau ikaradia advatais-dia na momo, iboudiai e gwaumu bae hanamoa diba, to haida na e koikoimu. To bema haida ese bae hadibamu, una dina-ḡauna ginigunana na laḡani momo gunanai oi dekemu tauna ese e karaia, be ede bamona? Bona danu, ia na e uramu baine durumu, asi davana. Oi na da bo dibamu daika bavabia hidi, ani?

Una dina-ḡau na emu helaro iabina karana ida ba haheḡereḡerea. Bema o mamiamu taunimanima ma haida heḡereḡeredia emu helaro na e oremu, edeseniai heduru bavabi diba? Taunimanima idauidau na bae gwa diba una na bae hamaoromaoroa diba, to lalohadai na momo dainai daradara e varamu bona unu lalohadai haida ese ma haida na e hakoikoidiamu. Una dainai, taunimanima e karadia Tauna baita lao henia na namo, badina ia ese helaro baine henida diba, ani? Baibul na e gwaumu “ia bona ita ta ta padada na dia daudau,” bona ia na e ura dikadikamu baine duruda.—⁠Aposetolo Edia Kara 17:27; 1 Petro 5:7.

Helaro Anina Dobuna

Baibul ese e gwauraiamu helarona anina na bada bona dobu, dia dokta, saiens taudia, bona taunimanima e stadilaidiamu taudia ese e gwauraiamu helarona heḡereḡerena. Baibul e torea gadodia amo ina hereva “helaro” e hahanaia neganai, anina na ba nari mai emu ura ida bona bavabia dae ḡau namona ta na be varamu. Baita gwa diba, helaro na ḡau rua amo e varamu. Ia na ḡau namona ta baine vara urana, bona baine vara momokani badidia dainai e varamu ḡauna. Baibul ese e gwauraia helarona na dia taunimanima edia lalohadai amo e varamu ḡauna. Ia na ḡau momokanidia bona badi korikoridia amo e varamu.

Una dainai, helaro na abidadama heḡereḡerena, badi momokanidia dainai e varamu, to dia taia kamonai ḡaudia dainai e varamu. (Heberu 11:1) To Baibul ese abidadama bona helaro edia idau na e herevalaia.—⁠1 Korinto 13:13.

Ini baita haheḡereḡerea toma: Bema turamu namona ta bo noiamu baine durumu, bo uramu baine durumu. O uramu baine vara ḡauna na dia o uralaia kavamu, badina turamu na o abidadama heniamu, mai dibamu be durumu. O abia daemu ḡauna bona o laroamu ḡauna na heḡereḡere, eiava unu kara ruaosi na nega tamona baita karadia hebou diba, to idia na kara idaudia rua. Edena dalai helaro unu bamona Dirava enai bavabia diba?

Helaro Badina

Dirava na helaro korikorina badina. Baibul negadiai, Iehova na e gwauraiava “Israel ena helaro.” (Ieremia 14:8) Iena taunimanima ese e abiva helaro namodia iboudiai na iena amo e maiva; una dainai, ia na edia helaro. Helaro unu hetomana na, dia ura kava amo e varava ḡauna. Dirava ese edia helaro badina, na e henidiava. Laḡani hanred momo lalodiai e kara henidiava neganai, ia ese gwauhamata momo e kara bona e hamomokanidia danu. Edia hegunalai tauna Iosua ese Israel taudia e hereva henidia, e gwa: “Umui iboumui ai vada o diba, . . . Iehova, emui Dirava, ese ena gwau-hamata namodia iboudiai emui ai vada e hamomokanidia, ta se reaia.”—⁠Iosua 23:14.

Laḡani tausen momo muridiai, una hereva na doini mia. Baibul lalonai Dirava ese e gwaurai gwauhamata namodia momo bona e ḡuḡuru sivaraidia na e momo. Ia ese e perovetalai gwauhamatadia na e abi dae momokaniva dainai, idia ediai unu peroveta herevadia na da bema momokani na heto.

Una dainai Baibul na baita gwauraia diba helaro bukana. Dirava ese taunimanima e kara henidia sivaraidia bo stadilaimu neganai, oiemu ai Dirava bavabidadama henia badidia na be goadamu. Aposetolo Paulo na e gwa: “E tore guna ḡaudia na ita ihadibalaida totona e tore, bena Buka Helaḡa ese haheauka bona tauhalo bae havara, ela bona helaro baita davaria.”—⁠Roma 15:4.

Dirava ese Dahaka Helaro E Henida?

Edena negai baita uramu helaro tama baita abia na namo? Kahirakahira baita mase neganai, a? To momo ediai, nega unu hetomadia—⁠heḡereḡere, lalokau tauna ta e masemu neganai—⁠una helaro na e boiomu. Momokani, mase e varamu neganai helaro na e oremu, ani? Mase na ita iboudia e hahavadamu. Kahirakahira be abidamu, bona ita na asi siahuda mase karana baita haidaua. Una dainai, Baibul ese e gwauraia “inai gini-gabena” na maoro.—⁠1 Korinto 15:26.

Una dainai, edena dalai mase neganai, baita helaro diba? Mase e gwaurai inai ginigabena sirina, na ma e gwa danu, una inai ḡauna na “baine haorea.” Iehova Dirava ena siahu ese mase ena siahu na e hereaia. Nega momo ai una na e hamomokania. Edena dalai? Mase taudia e hatoredia isi lou karana amo una na e hamomokania. Baibul lalonai nega idaudia nain ai Dirava ese ena siahu e ḡaukaralaia taunimanima idaudia nain e hamauridia lou.

Hoa dalanai, Iehova ese Natuna, Iesu, na siahu e henia turana Lasaro, dina hani e mase tauna, e hatorea isi lou. Iesu na dia hehuni ai, to taunimanima hutuma vairadiai una e karaia.—⁠Ioane 11:38-​48, 53; 12:​9, 10.

Reana bo henanadaimu, ‘Dahaka dainai taunimanima na e hatoredia isi lou?’ Idia na ma e buruka bena e mase, ani? Oibe. Unu toreisi lou sivaraidia na momomo-kakani dainai, eda lalokau mase taudia edia toreisi lou karana na dia ura kavakavana ta mo; badi namodia dainai ta dibamu idia na do bae toreisi lou. Eiava baita gwau dibamu, ita na mai eda helaro korikorina.

Iesu na e gwa: “Tore-isi-lou be lau; mauri danu lau.” (Ioane 11:25) Ia na Iehova ese be hasiahuamu tanobada heḡeḡemadai ai toreisi lou ḡaukarana baine karaiamu. Iesu na e gwa: “Nega ta be maimu, gara ai e nohomu taudia iboudiai ese ia gadona bae kamonai; bena bae raka lasi.” (Ioane 5:​28, 29) Oibe, gara ai e mahutamu taudia iboudiai na tanobada paradaisona ai do bae toreisi lou diba.

Peroveta tauna Isaia ese toreisi lou karana na e herevalaia ḡoevaḡoeva: “Emu mase taudia bae mauri, tau-anidia bae tore isi. Ḡahu ai o nohomu taumui e, a noga! Moale anedia bavabi. Badina emu hunu na diari hununa; oi ese mase laulaudia edia tano ai ba hadihoa.”—⁠Isaia 26:19, The New English Bible.

Una na tauhalo herevana namona, ani? Mase taudia na ḡau ta ese asie hadikadiamu, boga pusena ese natu e gimaiamu heḡereḡerena. Gara ai e laḡa-animu taudia na Siahu Idoinai Diravana ese e lalodia taomu. (Luka 20:37, 38) Bona kahirakahira tanobada ai be mauri loumu, be moalemu, bona varavaradia ese be hedavari henidiamu, e vara matamata natuna na varavarana ese nega ginigunana e hedavari heniamu heḡereḡerena! Una dainai, mase neganai, helaro na mia.

Helaro ese Oi Daimu ai Baine Karaia Ḡauna

Paulo ese helaro anina na dala momo ai e hahedinaraia. Ia ese helaro na e gwauraia lauma tuari dabuana ena kaha badana ta—⁠kwara ḡauna. (1 Tesalonika 5:8) Ena hereva anina be dahaka? Baibul negadia ai, tuari tauna ese auri kwara ḡauna na tuari neganai e karaiava, hanaihanai wulu eiava leda kwara ḡauna ta latanai e karaiava. Una kwara ḡauna dainai, tuari tauna kwaranai e tubuva ḡaudia momo ese kwarana na se haberoava. Paulo ena hereva anina be dahaka? Kwara ḡauna ese kwara e gimaiava heḡereḡerena, helaro ese laloda, eda haero-haero karana baine gimaia diba. Bema Dirava ena ura dainai bae vara ḡaudia ai emu helaro na goada, nega dikadia be varamu neganai, gari o lalo-hekwarahi ese emu lalo-maino na basie hadikaiamu. Ita iboudai una kwara ḡauna ta uramu, ani?

Paulo ese haheitalai namona ma ta amo Dirava ena ura dainai e varamu helarona e hahedinaraia. E gwa: “Helaro na laumada dogona na heto, se idaumu bona se mareremu.” (Heberu 6:​19) Paulo e gui kadadia momo na e helakwa eiava nadi ai e tatakau, una dainai mai dibana dogo ena ḡaukara na mai anina bada. Dikadika negadiai, kada ai e ḡaukaramu taudia ese dogo na e hadihoava. Bema dogo na e headaiva bona se hekokiva, dikadika lalonai kada na kone kahana se odaia laova bena nadi ai se hatatakauva.

Una heḡereḡerena, bema Dirava ena gwauhamata ilarodia karana na ‘basita haidaua bona basita hamarerea,’ una helaro ese baine duruda diba, ina nega dika ena hekwakwanai ese basine hadikada diba. Iehova na e gwauhamata, kahirakahira nega na be maimu, taunimanima na tuari, kara havara, lalo-hisihisi, eiava mase ese ma basine hahisidia loumu. (Rau 10 ai maua ba itaia.) Una helaro baita dogoatao auka karana ese be durudamu hari e varamu hekwakwanaidia baita hahanaimu bona be durudamu Dirava ena dala baita badinaiamu, to dia ina tanobada ena dala dikadia bona matabodaḡa karadia.

Iehova ese e henimu helarona ese oi na baine durumu diba. Ia na e uramu mauri na Adam Eva e karadia neganai e ura bae maurilaia heḡereḡerena ai baita maurilaia. Iena ura na “taunimanima iboudiai bae mauri.” Edena dalai? Ḡau ginigunana na, taunimanima iboudiai ese “hereva momokani” bae dibaia namonamo. (1 Timoteo 2:4) Ina magasin e halasia taudia ese e hagoadamumu Dirava ena Hereva ese e halasiamu mauri ihavarana dibana bavabia. Dirava ese e henimu helarona ese ina tanobada ese e henimu helarona na e hereaia momokani.

Una helaro dainai basio mamiamu oi na asi idurumu, badina Dirava ese goada baine henimu diba ena ura heḡereḡerena o uramu ba kara ḡaudia iboudiai na bo haḡuḡurumu. (2 Korinto 4:7; Filipi 4:​13) Una na o uramu helarona, ani? Una dainai, bema helaro o uramu, bona o tahuamu, ba lalo-goada. Helaro na mia. Ba davaria diba!

[Box/Picture]

Dahaka Dainai Ita Na mai Eda Helaro?

Emu helaro baine goada diba badina be Baibul siri haida na ini e gwa toma:

◼ Dirava na e gwauhamata vaira negana ai moale baine havaraia.

Iena Hereva ai e gwa, tanobada idoinai na paradaiso ai bainela bona bese iboudiai na mai moaledia bona lalotamonadia ida bae noho.—⁠Salamo 37:11, 29; Isaia 25:8; Apokalupo 21:​3, 4.

◼ Dirava na basine koikoi diba.

Ia na se uramu baine koikoi. Hanaihanai Iehova na helaḡa o ḡoeva dainai, ia na basine koikoi diba.—⁠Hereva Lada-isidia 6:​16-​19; Isaia 6:​2, 3; Tito 1:2; Heberu 6:​18.

◼ Dirava ena siahu na bada.

Iehova mo sibona na siahu idoinai Diravana. Ia ese ena gwauhamata iboudiai baine haḡuḡuru neganai, universe ai ḡau ta ese basine koua diba.—⁠Esodo 15:11; Isaia 40:25, 26.

◼ Dirava na e uramu oi na ba mauri ela bona hanaihanai.

—⁠Ioane 3:​16; 1 Timoteo 2:​3, 4.

◼ Dirava na e uramu ita na baita noho namonamo.

Dirava na se uramu eda kerere maraḡidia o eda manoka ḡaudia baine ita hanaihanai, lasi, to ia na e uramu eda kara namodia o hekwarahi baine itadia. (Salamo 103:12-​14; 130:3; Heberu 6:​10) Ia na e uramu ita na kara maorona baita karaia, bona una baita karaiamu neganai, ia na be moalemu.—⁠Hereva Lada-isidia 27:11.

◼ Dirava na e gwauhamata baine durumu bema Iena ura ihaḡuḡuruna karana ta ba karaia.

Iena hesiai taudia dibadia heduru na be abimu. Dirava ese ena lauma helaḡa—⁠goada iboudiai e hanaidia siahuna—⁠amo be durudamu.—⁠Filipi 4:​13.

◼ Dirava baita abidadama henia, bona nega ta ai basita lalohisihisimu.

Dirava na bavabidadama henia vaitani; ia ese oi na basine hahemaraimu diba.—⁠Salamo 25:3.

[Picture]

Kwara ḡauna ese kwara e gimaiamu heḡereḡerena, helaro ese laloda e gimaiamu

[Picture]

Dogo heḡereḡerena, helaro goadana dainai ḡau ta ese basine hamarereda diba

[Credit Line]

Courtesy René Seindal/Su concessione del Museo Archeologico Regionale A. Salinas di Palermo