Kaha 3

Iesu Keriso be Daika?

Dahaka dainai Iesu na e gwauraiamu Dirava Natuna “roboana”? (1)

Dahaka dainai e gwauraiamu “Hereva”? (1)

Dahaka dainai Iesu na tanobada ema, taunimanima ta ai ela? (2-4)

Dahaka dainai hoa karadia e kara? (5)

Iesu be kahirakahira dahaka baine kara? (6)

1. Iesu na tanobada do sema neganai, ia na lauma ta guba ai e nohova. Ia na Dirava ese e havaraia tauna ginigunana, una dainai e gwauraiamu Dirava Natuna “roboana.” (Kolose 1:15; Apokalupo 3:14) Iesu sibona mo Dirava sibona ese imana amo e havaraia Natuna. Taunimanima ai do sela neganai Iehova ese iena “ğaukara idibaka tauna” ai e halaoa, ğau oredia iboudiai guba ai bona tanobada ai e karadia. (Hereva Lada-isidia 8:​22-31; Kolose 1:​16, 17) Bona Dirava ese Iena hereva igwauraina tauna badana ai e halaoa. Una dainai Iesu na e gwauraiamu “Hereva.”​—Ioane 1:​1-3; Apokalupo 19:13.

2. Dirava ese Natuna tanobada e siaia mai dalana na ena mauri Maria bogana ai e atoa. Una dainai, Iesu tamana na dia tanobada tauna ta. Unu e vara toma dainai ia na asi ena kara dika, eiava ia na ğoevadae. Dirava ese Iesu tanobada e siaia mai badidia na toi: (1) Dirava sivaraina momokanina baine hadibadalaida (Ioane 18:37), (2) baine kara maoromaoro ğuğuru, unu amo baita badinaia dalana baine hahedinarai henida (1 Petro 2:21), bona (3) ena mauri baine bouboulaia, kara dika bona mase amo ita baine ruhada. Dahaka dainai una na mai anina bada?​—Mataio 20:28.

3. Tau ginigunana, Adam, ese Dirava ena haheğani se badinaia neganai, ia e karaia karana na Baibel ese e gwauraiamu “kara dika.” Una dainai Dirava ese e hamaoroa ia ahuna na mase. (Genese 3:​17-19) Dirava ena taravatu ibadinadiai ia na se heğereğere, una nega amo ia na vada dia ğoevadae. Metairametaira e buruka ela bona e mase. Adam ese kara dika na e heni hanai natuna iboudiai ediai. Una dainai ita danu ta burukamu, ta goreremu, bona ta masemu. Taunimanima ese hahemauri be ede bae abia toma?​—Roma 3:23; 5:12.

4. Iesu na tau ğoevadaena, Adam heğereğerena. To ena kara na dia Adam ena heğereğerena, Iesu na hahetoho bada hereana lalonai danu Dirava na e badinaia ğoevağoeva. Una dainai ena mauri ğoevadaena e bouboulaia Adam ena kara dika davana ihenina. Baibel ese una na e gwauraiamu “taunimanima iboudiai idavalaidia” ğauna. Una dainai, mase iğuina amo Adam natuna na mai iruhadia dalana. Iesu e abidadama heniamu taudia iboudiai edia dika na bae hegwautao diba bona mauri hanaihanai bae abia diba.​—1 Timoteo 2:​5, 6; Ioane 3:16; Roma 5:​18, 19.

5. Iesu tanobada ai e nohova neganai, gorere taudia e hanamodia, hitolo taudia e ubudia, bona lai badadia e koudia. Mase taudia danu e hamauridia. Dahaka dainai hoa karadia e kara? (1) Hisihisi e aniva taudia e bogadia hisi, bona e urava baine durudia. (2) Ena hoa karadia ese e hamomokania ia na Dirava Natuna. (3) Ia Pavapava ai bainela bena tanobada baine lohiaia neganai kamonai taudia daidiai baine kara karadia e hahedinarai.​—Mataio 14:14; Mareko 2:​10-​12; Ioane 5:​28, 29.

6. Iesu na e mase bena Dirava ese lauma tauna ta ai e hatoreaisi lou, bena guba e lou lao. (1 Petro 3:18) Una murinai, Dirava ese Pavapava ai e halaoa. Iesu ese kahirakahira ina tanobada amo kara dika bona hisihisi iboudiai baine haoredia.​—Salamo 37:​9-11; Hereva Lada-isidia 2:​21, 22.

[Pictures on page 7]

Iesu ena hesiai ğaukara lalonai ia na e hahediba, hoa karadia e kara, bona ita daidai ena mauri e atoa diho