Kaha 7

Ğuriğuri amo Dirava Ba Raka Henia Kahi

Dahaka dainai baita ğuriğuri hanaihanai na ğau badana? (1)

Daika baita ğuriğuri henia, bona ede baita ğuriğuri henia toma? (2, 3)

Baita ğuriğurilai ğaudia maorodia be dahaka? (4)

Ededia negai ba ğuriğuri? (5, 6)

Dirava ese ğuriğuri iboudiai e hakala henimu, eiava? (7)

1. Ğuriğuri na manau ai Dirava ihereva henina karana. Dirava ba ğuriğuri henia hanaihanai. Unu amo bo hemamimu oi na ia dekedekenai, turamu namona ta dekedekenai na heto. Iehova na hereadae bona siahu herea, to eda ğuriğuri na e hakala henidiamu! Oi ese Dirava o ğuriğuri henia hanaihanaimu, a?​—Salamo 65:2; 1 Tesalonika 5:17.

2. Ğuriğuri na eda tomadiho kahana ta. Una dainai, Iehova Dirava sibona mo baita ğuriğuri henia. Iesu tanobada ai e nohova neganai, ia na hanaihanai tamana e ğuriğuri heniava, dia ta. Ita danu unu baita kara toma. (Mataio 4:10; 6:9) To, eda ğuriğuri iboudiai na Iesu ladanai baita gwaurai. Una ese e hahedinaraiamu ita na Iesu ena dagi ta matauraiamu, bona mauri e davalaia boubouna na ta abidadama heniamu.​—Ioane 14:6; 1 Ioane 2:​1, 2.

3. Ta ğuriğurimu neganai, kudouda amo Dirava baita hereva henia. Ita eda ğuriğuri na dia kwarada ai ta lalotao herevadia baita gwaurai eiava dia ğuriğuri bukana ta amo baita duahi. (Mataio 6:​7, 8) Hemataurai daladiai, nega idauidau ai, bona gabu idauidau ai baita ğuriğuri diba. Dirava na laloda ai baita gwaurai ğuriğuridia danu baine kamonai diba. (1 Samuel 1:​12, 13) Namona na gabu asi reğereğena ta baita tahua siboda eda ğuriğuri baita gwaurai totona.​—Mareko 1:35.

4. Dahaka ba ğuriğurilai diba? Ia ida emui hetura karana baine hadikaia eiava baine hanamoa diba ğaudia. (Filipi 4:​6, 7) Iesu e hahedibalaia ğuriğurina ese e hahedinaraiamu namona na Iehova ladana bona ena ura baita ğuriğurilai. Bona tauanida idurulaidia ğaudia daidiai, eda dika baine gwautao, bona baine duruda hedibağani baita dadarai totona baita noinoi. (Mataio 6:​9-13) Dia siboda eda ura ğaudia mo daidiai baita ğuriğuri. Namona na Dirava ena ura ida e heğereğere ğaudia mo baita ğuriğurilai.​—1 Ioane 5:14.

5. Lalomu ai o uramu Dirava ba tanikiu henia eiava ba hanamoa negadia iboudiai ba ğuriğuri henia diba. (1 Sisiğa 29:​10-13) Hekwakwanai o davarimu bona emu abidadama e tohoamu negadiai ba ğuriğuri. (Salamo 55:22; 120:1) Emu aniani do so ani negadiai ba ğuriğuri na maoro. (Mataio 14:19) Iehova ese e hamaorodamu “nega idoinai” baita ğuriğuri.​—Efeso 6:18.

6. Baita ğuriğuri na ğau badana bema ita na kara dika badana ta ta karaia. Nega unu bamodiai, namona na Iehova baita noia baine bogada hisi bona eda dika baine gwautao. Bema eda kara dika na ia vairanai baita gwaurai hedinarai bona baita hekwarahi basita kara lou totona, Dirava ese eda dika na ‘baine gwau tao.’​—Salamo 86:5; Hereva Lada-isidia 28:13.

7. Iehova na kara maoromaoro taudia edia ğuriğuri mo e kamonaimu. Dirava ese emu ğuriğuri baine kamonaidia totona, namona na iena taravatu ba badina goadagoada. (Hereva Lada-isidia 15:29; 28:9) O ğuriğurimu negadiai ba manau. (Luka 18:​9-14) O ğuriğurilaiamu ğauna dainai ba hekwarahi. Unu amo ba hamomokania oi na mai emu abidadama bona o gwauraiamu ğauna na mai momokanimu ida o gwauraiamu. Unu mo ba kara toma negadiai, Iehova ese emu ğuriğuri baine haerelai.​—Heberu 11:6.