Kaha 13

Tomadiho Momokanina be Ede Ba Davaria Toma?

Tomadiho tamona mo, eiava iboudiai ese Dirava e hamoaleamu? (1)

Dahaka dainai sibodia e hegwauraimu Kristen tomadihodia na momo? (2)

Kristen taudia korikoridia be ede ba dibadia toma? (3-7)

1. Iesu ese Kristen tomadiho momokanina na tamona mo e matamaia. Una dainai hari ina negai Iehova Dirava itoma diho henina taudia edia orea eiava grup na tamona mo. (Ioane 4:​23, 24; Efeso 4:​4, 5) Baibel ese e hadibadamu taunimanima dia hoho mo mauri e lao heniamu dalana hekahi-hekahina ai e rakamu.​—Mataio 7:​13, 14.

2. Baibel na e peroveta, aposetolo taudia bae mase murinai, hahediba hereva koikoidia bona dia Kristen karadia na Kristen kongregesen lalonai metairametaira bae vareai. Taunimanima ese abidadama taudia bae veridia dia Keriso bae badinaia, a idia bae badinadia totona. (Mataio 7:​15, 21-23; Kara 20:​29, 30) Una dainai sibodia e hegwauraimu Kristen tomadihodia na momo. Kristen taudia momokanidia be ede baita dibadia toma?

3. Kristen taudia korikoridia toadia badana na e helalokau hehenimu. (Ioane 13:​34, 35) Asie tomu idia na bese idaudia eiava kopi idaudia taudia e hereadia badina unu na se hadibadia tomamu. Bona se hadibadiamu idau tano taudia bae inai henidia. (Kara 10:​34, 35) Una dainai tuari ai na se vareaimu. Kristen taudia korikoridia iboudiai na e hetadikakamu.​—1 Ioane 4:​20, 21.

4. Tomadiho momokanina toana ma ta na e badinaiamu taudia ese Baibel na e laloa badamu. E abia daemu una na Dirava ena Hereva bona ena hereva na e abi daemu. (Ioane 17:17; 2 Timoteo 3:​16, 17) Idia ediai ğau badana na Dirava ena Hereva, a dia taunimanima edia lalohadai eiava kastom idauidau. (Mataio 15:​1-3, 7-9) Edia mauri dinadia ta ta iboudiai lalodiai e hekwarahimu Baibel bae badinaia. Una dainai idia na dia ğau idauna ta e harorolaiamu a edia kara be ma idau.​—Tito 1:​15, 16.

5. Tomadiho momokanina ese Dirava ladana na e matauraiamu. (Mataio 6:9) Iesu ese Dirava ladana, Iehova, na ma haida e hadibalaidia. Kristen taudia korikoridia danu unu bae kara toma. (Ioane 17:​6, 26; Roma 10:​13, 14) Emu gabu ai be daidia ese Dirava ladana ma haida e hamaorolaidiamu?

6. Kristen taudia korikoridia ese Dirava ena Basileia bae harorolaia. Iesu na unu e kara toma. Ia na hanaihanai Basileia e herevalaiava. (Luka 8:1) Ena hahediba taudia e hamaorodia tanobada heğeğemadai una hereva tamona bae harorolaia. (Mataio 24:14; 28:​19, 20) Kristen taudia korikoridia na e diba momokanimu, Dirava ena Basileia sibona ese ina tanobada ai maino bona noho namo korikorina baine havaraia.​—Salamo 146:​3-5.

7. Iesu ena hahediba taudia na dia ina tanobada dikana ena. (Ioane 17:16) Idia na ina tanobada ena politikol karadia bona taunimanima edia hepapahuahu lalodiai na se vareaimu. Idia ese ina tanobada ai e vara momomu hahedika karadia bona lalohadaidia na e dadaraimu. (Iakobo 1:27; 4:4) Emu gabu ai unu Kristen taudia korikoridia toadia e hahedinaraimu tomadihona ta o itaiamu, a?

[Pictures on page 26, 27]

Kristen taudia korikoridia na e helalokau hehenimu, Baibel e laloa badamu, bona Dirava ena Basileia e harorolaiamu