Kongrigeisen ai Hesiai Taudia Edia Ḡaukara be Dahaka?

Baibel ese kongrigeisen ai maduna e huamu Keristani tataudia na grup rua ai e herevalaidiamu, ta be “heitatao” o elda taudia, ma ta be “diakono” o hesiai taudia. (Filipi 1:1) Kongrigeisen haida na mai edia elda bona hesiai taudia. To, hesiai taudia edia ḡaukara be dahaka?

Elda oreana e duruamu. Hesiai taudia na Iehova e badinaiamu, edia maduna e lalo badamu bona e karadia namonamomu, idia haida na eregabe, a haida be iahu. Idia ese kongrigeisen ena ḡaukara haida e karamu dainai, elda taudia na kongrigeisen taudia ihadibadia bona ivadivadidia ḡaukaradia e karamu.

Kongrigeisen e duruamu. Hesiai taudia haida na atendan ḡaukarana e karaiamu, unu amo hebou e maimu taudia e welkam henidiamu. A haida be saun ḡaudia e narimu, buka bona magasin e harimu, kongrigeisen akaun e narimu, bona haroro gabudia e abi hidimu. Danu, Kingdom Hall ihanamona ḡaukaradia ai e hedurumu. Nega haida na elda taudia ese hesiai taudia e noidiamu burukadia bae durudia. Hesiai taudia na mai lalodia idoidiai edia ḡaukara e karamu dainai, kongrigeisen ese e matauraidiamu.—1 Timoteo 3:13.

Haheitalai namona e hahedinaraiamu. Hesiai taudia na edia kara namodia daidiai e abidia hidimu. Hebou ai e henimu tok amo emai abidadama e hagoadamu. Idia ese haroro ḡaukara e goadalaiamu dainai, ai ese haroro ḡaukara a goadalaiamu. Idia ese elda oreana e duruamu dainai, moale bona lalotamona e varamu. (Efeso 4:16) Gabeai idia danu elda taudia ai baela diba.

• Hesiai taudia be daidia?

• Hesiai taudia ese kongrigeisen be ede e durua tomamu?